Salmo 146 - Tayta Diospa Wilakuynin

Salmo 146 (145) Tayta Diosta alabashqan

¹ ¡Aleluya! Lapan shonqüwanmi Tayta Diosta alabashaq.

² Kawashqäyaqqa Tayta Diostami imaypis alabashaq. Shuntakamashqanyaqmi salmukunata cantar alabashaq.

³ Ama yärakushunsu munayyuq runakunamanqa. Paykunaqa runala karmi salvamäshunsu.

⁴ Wanuyashpan kashlanmi alpaman tikrayanqa. Yarpäyashqankunata manaraq rurarmi wanuyanqa.

⁵ Tayta Dios yanapashqan runami isanqa kushish kawanqa. Payqa Tayta Dioslamanmi imay hörapis yärakun.

⁶ Tayta Diosmi jana pasata, kay pasata, lamarta y lapan saycho kaqkunatapis kamash. Nishqantaqa imaypis cumplinmi.

⁷ Nakaycho kaykaq runakunata yanapanmi. Mikanaqkunatapis mikuyta kamaripanmi. Prësu kaykaqkunatapis Tayta Dios jorqamunmi.

⁸ Qaprakunapa nawintapis Tayta Dios kichanmi. Desanimash kaykaq runakunatapis Tayta Dios valurasinmi. Pay munashqanno kawaqkunataqa Tayta Dios kuyanmi.

⁹ Jäpa runakunatapis Tayta Dios sapanmi. Waksakunatapis viüdakunatapis yanapanmi. Yaqa runakunatami isanqa yarpashqanta mana rurayänanpaq sapata churapan.

¹⁰ Sión, Tayta Diosmi imayyaqpis rey kanqa. Mandamaqninsi reymi imayyaqpis kanqa. ¡Aleluya!