Salmo 141 - Tayta Diospa Wilakuynin

1a

Salmo 141 (140) Mana jusalikunanpaq Tayta Diosta manakushqan

1a (1a) David qelqashqan salmu.

¹ 1 (1b) Tayta Dios, qamtami manakamü. Yanapämänaykipaq jukla shamuykulay. Ruwakamuptï jukla yanapaykalämay.

² Manakamushqäpis inciensuno nawpaykiman chaykalämusun. Makïta joqarkur ruwakamushqäpis tutapa rupasishqan sacrificiuno kaykuläsun.

³ Tayta Dios, lutankunata mana parlanäpaq shimïta sujetaykulay. Mana alikunata mana parlanäpaq imaypis yanapaykalämay.

⁴ Lutankunata mana yarpachakunäpaq tantiyaykasilämay. Jusalikuqkunawan cumpinchi kanäta ama permitiykulaysu. Paykunawan mikur upur shuntaränätapis ama kachapaykalämaysu.

⁵ Ali runa corrigimar astamaptinpis chaskikümi. Anyapämashqanta cäsukümi. Jusalikuqkuna yäsiyämashqantami isanqa wiyaytapis munäsu. Paykunata castigananpaqmi Tayta Diosta imaypis manakuykä.

⁶ Cabecïllankunataqa imayka desgraciami päsanqa. Sayraqmi tantiyakuyanqa noqa wilapashqä rasun kaq kashqanta.

⁷ Yapyaptin kurpakuna mashtaräyashqannömi tulunkunapis panteonkunacho mashtaräyanqa.

⁸ Tayta Dios, qamlamanmi yärakaykämü. Ama kachaykalämaysu.

⁹ Yaqa runakuna trampata churapäyämashqanman mana jeqanäpaq sapaykalämay.

¹⁰ Trampata churapäyämashqanman kikinkuna jeqayäsun. Noqata isanqa salvaykalämay.