Salmo 14 - Tayta Diospa Wilakuynin

1a

Salmo 14 (13) Lapan runakuna jusalikur kawayashqan

1a (1a) Cantaqkunapa mandaqninpaqmi. David qelqashqan salmu.

¹ 1 (1b) Mana tantiyakuq runakunaqa <> nirmi shonquncho yarpäyan. Paykunaqa lutan rurayman uman churakashqami kaykäyan. Rurashqankunapis pasaypa melanaypaqmi kaykan. Paykuna mayqanpis manami alitaqa rurayansu.

² Tayta Diosqa jana pasapita pasami runakunata rikaykämun. Paymi ashiykan pitapis tantiyakuqta. Saynölami ashiykan pitapis payta ashiqta.

³ Nishqan kaqqa lapan runakunapis jusalikurmi kawaykäyan. Lapanpis lutantami ruraykäyan. Pipis manami kansu alita ruraqqa. Ni juklaylapis manami kansu.

⁴ Yaqa runakunaqa manami imaypis tantiyakuyansu. Paykunaqa tantata mikuqnömi Tayta Dios kuyashqan runakunata ushakäsiyan. Tayta Diosta manami imaypis manakuyansu.

⁵ Sayno kaptinpis cäsukuqkunawanmi Tayta Dios kaykan. Sayta rikarmi yaqa runakuna suksukyayparaq mansakäyan.

⁶ Paykunaqa pobri runakuna yarpäyashqanta sapatami churapäyan. Tayta Diosmi isanqa pobrikunata yanapan.

⁷ ¡Ima aliraq kanman Siónpita pasa Israel runakunata Tayta Dios salvaptin! Salvaptinmi Jacobpita miraq Israel runakuna seqaypa kushikuyanqa.