Salmo 135 - Tayta Diospa Wilakuynin

Salmo 135 (134) Tayta Diosta alabashqan

¹ ¡Aleluya! ¡Tayta Diosta alabayay! Sirviqninkuna, Tayta Diosta alabayay.

² Tayta Diospa wayincho kaykaqkuna, payta alabayay. Tayta Diosninsipa wayin patiucho kaykaqkuna, payta adorayay.

³ Alilata ruraq kashqanpita Tayta Diosta adorayay. Kuyakuq kashqanpita salmukunata cantar alabayay.

⁴ Jacobpita miraq runakunatami paypa kananpaq Tayta Dios akrarqan. Israel runakunatami akrarqan herencian kananpaq.

⁵ Noqa musyämi Tayta Dios munayyuq kashqanta. Payqa lapan dioskunapitapis mas munayyuqmi kaykan.

⁶ Jana pasacho, kay pasacho, lamarcho y lamar rurin liwliwyaykaqkunachöpis Tayta Diosqa munashqantami ruran.

⁷ Kay pasapa kuchunpitami pukutayta sharkasin. Tamyamunanpaqpis maqakasimunmi. Churaraykäsishqanpitami wayratapis jorqamun.

⁸ Egipto runakunapa qechpa surinkunatapis wanusirqanmi. Uywankunapa punta kaq wawankunatapis ushakäsirqanmi.

⁹ Faraón y mandäsiqninkuna rikayänanpaqmi espantaypaq kaqkunata rurarqan.

¹⁰ Aska nacionkunachömi runakunata wanusirqan. Munayyuq reykunatapis ushakäsirqanmi.

¹¹ Say reykunami kayarqan amorreo runakunapa mandaqnin Sihón, Basáncho taq rey Og y cananeo runakunapa mandaqnin reykunapis.

¹² Say runakunapa nacionninkunatami kuyashqan Israel runakunata entregarqan posisionninkuna kayänanpaq.

¹³ Tayta Dios, mana ushakaqmi kaykanki. Qamta imayyaqpis yarparäshunkimi.

¹⁴ Tayta Diosqa kuyashqan runakunata yanapanqami. Sirviqninkunataqa kuyapanqami.

¹⁵ Juklä nación runakuna adorayashqan ïdulukunaqa qorilapita y qellaylapitami kaykäyan. Saykunataqa runakunalami rurayan.

¹⁶ Shimin kaptinpis manami parlayansu. Nawin kaptinpis manami rikayansu.

¹⁷ Rinrin kaptinpis manami wiyayansu. Manami jämayninpis kansu.

¹⁸ Ïdulu munayniynaq kashqannömi ïdulukunata ruraqkunapis kaykäyan. Ïdulukunaman yärakuqkunaqa ïdulunölami lapanpis kaykäyan.

¹⁹ Israel mayikuna, ¡Tayta Diosta alabayay! Aarónpita miraqkuna, ¡Tayta Diosta alabayay!

²⁰ Leví trïbu runakuna, ¡Tayta Diosta alabayay! Tayta Diosta mansapakuqkuna, ¡payta alabayay!

²¹ Siónpita pasa Tayta Dios alabash kaykuläsun. Paymi Jerusaléncho taykan. ¡Aleluya!