Salmo 132 - Tayta Diospa Wilakuynin

Salmo 132 (131) Davidta promitishqanta cumplinanpaq Tayta Diosta manakushqan

Kay salmuqa Jerusalénman aywaqkuna cantayänanpaq alabanzami kaykan.

¹ Tayta Dios, yarpaykulay David imano nakashqantapis.

² Jacob yärakushqan Tayta Dios, yarpaykulay David promitishushqaykita.

³ Promitirmi kayno nishurqayki: <

⁴ manami yanqalatapis punushaqsu, manami ichiklatapis qepishtarkushaqsu

⁵ munayyuq Tayta Diospaq sitiuta manaraq tarirqa y pay tänanpaq wayita manaraq rurarqa>>.

⁶ Efratacho kaykarmi wiyayarqä Pactu Babulpita parlaqta. Jaar pampachömi babulta tariyarqä.

⁷ Saymi wilanakuyarqä: <<¡Tayta Diospa wayinman aywashun! ¡Puntanman qonqurpakushun!>>

⁸ Tayta Dios, tänaykipaq kaqman shamuykulay. Munayyuq babulniki kashqancho taykulay.

⁹ Sirvishuqniki cürakunapis lapan voluntäwan sirviykuyäläshunki. Munashqaykino kawaqkunapis kushish alabaykuyäläshunki.

¹⁰ Sirvishuqniki David rayku akrashqayki reyta yanapaykulay.

¹¹ Davidta promitishqaykitaqa imaypis cumplinkipaqmi. Promitirmi nirqayki: <

¹² Sayno kayanqa wilakuynïta y pactu rurashqäta cumpliyaptinmi. Saynöpami qampita miraqkuna trönuykicho imaypis rey kayanqa>>.

¹³ Tayta Diosmi Sión lömata akrash. Saycho tänanpaqmi akrash.

¹⁴ Saymi nirqan: <

¹⁵ Kaycho mikuy aska kananpaqmi bendicionnïta churashaq. Pobrikunapis pacha juntami mikuyanqa.

¹⁶ Cürakunapis respitashqami kayanqa. Wiyakamaqkunaqa kushishqami alabayämanqa.

¹⁷ Kaychömi Davidpita miraqkunata churashaq rey kayänanpaq. Akrashqä kayaptinmi yanapäshaq munayyuq kayänanpaq.

¹⁸ Chikiqninkunataqa penqaymanmi churashaq. Mandaq reymi isanqa chipipiykaq corönan jatish kanqa>>.