Salmo 127 - Tayta Diospa Wilakuynin

Salmo 127 (126) Tayta Dios yanapämashqansi

Kay salmuqa Jerusalénman aywaqkuna cantayänanpaqmi kaykan. Salomón qelqashqan.

¹ 1 (1b) Wayita Tayta Dios mana sharkasiptinqa wayi aruqkunapis walälapaqmi wayikunata sharkasiyan. Markata Tayta Dios mana täpaptinqa rondërukunapis yanqalälapaqmi täpayan.

² Pasa warashqanpita pasa sakashqanyaq nakar aruyashqaykipis manakaqlapaqmi kanqa. Tayta Diosmi kuyashqan runakuna punuyashqanyaq nistashqankunata kamaripan.

³ Surinsikunapis Tayta Dios qomashqansi herenciami kaykäyan. Wamransikunapis bendicionmi kaykäyan.

⁴ Maqtalaraq kaykash yuriq surinsikunaqa soldädupa makincho kaykaq flëchakunanömi kaykäyan.

⁵ Aska suriyuq karqa kushishqami kaykansi. Chikimaqninsikuna juezman apamashqapis surinsikunaman atiënikurmi mansarinsisu.