Salmo 114 - Tayta Diospa Wilakuynin

Salmo 114 (113a) Egiptupita yarqayämushqanta yarpäyashqan

¹ Jacobpita miraq Israel runakuna Egiptupita yarqamur nacionninman chäyaptinmi

² Tayta Dios täkunan nación rikakurqan. Israel runakunami Tayta Dios mandashqan nación rikakuyarqan.

³ Israel runakuna shamuykäyaqta rikaykurmi lamarpis ishkayman rakikarqan. Jordán mayupis aywaykashqanpita jinalanchömi takyaskirqan.

⁴ Puntakunapis carnishnömi saltaykachäyarqan. Qaqakunapis uysha malwanömi pañaykachäyarqan.

⁵ Lamar, ¿imanirtaq ishkayman rakikashkanki? Jordán mayu, ¿imanirtaq takyakuykushkanki?

⁶ Jirkakuna, ¿imanirtaq carnishno saltaykachäyashkanki? Qaqakuna, ¿imanirtaq uysha malwano pañaykachäyashkanki?

⁷ Pasa, Jacob yärakushqan Tayta Diospa nawpancho mansakaywan suksukyay.

⁸ Paymi qaqapita yakuta pashtasimurqan. Rumi kashqanchömi pukyuta yurisimurqan.