Salmo 112 - Tayta Diospa Wilakuynin

Salmo 112 (111) Ali runa imano kawashqan

¹ ¡Aleluya! Kushishqami kawan Tayta Diosta mansapakuq runaqa. Say runaqa Diospa mandamientunkunata cumplirmi kushikun.

² Paypita miraqkunami Israel nacioncho munayyuq kayanqa. Paykunaqa bendiciontami chaskiyanqa.

³ Wayincho imaykankunapis pusuy pusuymi kanqa. Paykunaqa pïmaypaqpis ali shonqumi kayanqa.

⁴ Wakin runakuna sakäpakushno kayaptinpis ali runaqa aksichönömi kaykan. Payqa ali shonqumi, kuyapäkuqmi y alilata ruraqmi kaykan.

⁵ Ali runaqa manakuptin pitapis juklami makyan. Ima rurayninkunatapis shumaq yarpachakuykurmi ruran.

⁶ Manami imaypis lutanta ruransu. Paytaqa pïmaypis yarparkunmi.

⁷ Mana ali noticiata wiyarpis manami mansarinsu. Ima kaptinpis Tayta Dioslamanmi yärakun.

⁸ Imaypis jawkalami kawan. Manami imapitapis mansarinsu. Chikiqninkuna ushakäyashqantapis rikanmi.

⁹ Pobrikunata imaypis milqaparkunmi. Alilatami imaypis ruran. Pïmaypis paytaqa respitanmi.

¹⁰ Sayta rikarmi yaqa runaqa payta chikin. Rabyashpan kiruntapis uchunraqmi. Lutanta rurananpaq yarpachakushqankunaqa manami kamakanqasu.