Salmo 11 - Tayta Diospa Wilakuynin

1

Salmo 11 (10) Tayta Diosman lapan shonqunwan yärakushqan

1 (1) Cantaqkunapa mandaqninpaqmi. David qelqashqan salmu.

¹ 1 (1b) Tayta Dioslamanmi noqa yärakü. Sayno kaykaptinqa ¿imanirtaq niyämanki pishqukuna muntipa qeshpiyashqanno noqapis qeshpinäpaq?

² Yaqa runakunaqa flëchayänanpaq listumi kaykäyan. Pakakuykurmi ali runakunata flëchaykäyan.

³ Kay pasacho munayashqantami rurayan. Sayno rurayaptinmi ali runa karpis justicia rurayta kamäpakunsu.

⁴ Tayta Diosqa sagrädu templunchömi kaykan. Paypa trönunqa jana pasachömi kaykan. Saypita pasami runakuna imata rurayashqantapis rikaykämun.

⁵ Tayta Diosqa ali runata probanmi. Mana ali runata y wanusikuqkunataqa alma y vïdami chikin.

⁶ Yaqa runakunataqa jusankunaman tupumi castiganqa. Paykunataqa ninawan talush azufri tamyawan y shanaq wayrawanmi ushakäsinqa.

⁷ Tayta Dios pitapis manami jananpansu. Payqa alilatami ruran. Pay munashqanno kawaqkunaqa nawpanman char qaqlantami rikayanqa.