Salmo 105 - Tayta Diospa Wilakuynin

Salmo 105 (104) Kuyashqan runakunata Tayta Dios ali rikashqan

¹ ¡Tayta Diosta agradëcikuyay! ¡Paypa jutinta joqariyay! Lapan rurashqanta maysay nacionchöpis wilakuyay.

² Salmukunata cantar alabayay. Mansariypaq rurashqankunata wilakuyay.

³ Tayta Diosta ashiqkuna, lapan shonquykikunawan payta alabayay. Japalan santu Dios kashqanpita kushikuyay.

⁴ Munayyuq Tayta Diosta imaypis ashiyay. Yanapäshunaykipaq payta imaypis manakuyay.

⁵ Espantaypaq rurashqan milagrukunata yarpäyay. Contransikunata imano vincishqanta ama qonqäyaysu.

⁶ Tayta Diosta sirviq Abrahampita miraqkuna, saykunata yarparäyay. Akrashqan Jacobpita miraqkuna, lapan rurashqankunata ama qonqäyaysu.

⁷ Paymi noqansipa Tayta Diosninsi. Intëru kay pasachömi munashqanta ruran.

⁸ Pactu rurashqanta manami imaypis qonqansu. Waranqa (1,000) generación päsaptinpis yarparaykanmi.

⁹ Say pactuta Abrahamwanmi rurarqan. Jurashpanmi Isaactapis promitirqan.

¹⁰ Imaypis cumplinanpaqmi Jacobta y paypita miraq Israel runakunatapis promitirqan.

¹¹ Promitishpanmi nirqan: <>.

¹² Say wisanqa Israel runakuna walkaqlaraqmi kayarqan. Jäpa nacioncho yupashlami kayarqan.

¹³ Paykuna nacionnin nacionnin y markan markanmi puriyarqan.

¹⁴ Sayno kaykaptinpis manami Tayta Dios kachaparqansu pipis nakasinanta. Saymi reykunatapis castigar nirqan:

¹⁵ <>

¹⁶ Tayta Diosmi paykuna täyashqan nacioncho muchuy kananpaq kamakäsirqan. Saymi mikuyänanpaq imapis karqansu.

¹⁷ Isanqa paykunapa puntantami Egiptuman Joséta kacharqan muchuypita salvananpaq. Sayman charqan ashmay kananpaq wawqinkuna rantikuyaptinmi.

¹⁸ Egipto runakuna Josépa chakinta cadinawanmi wataräsiyarqan. Kunkapitami fiërru cadinawan wataräsiyarqan.

¹⁹ Saychömi wichqararqan sueñushqankuna cumplishqanyaq. Saynöpami rasun kaqta sueñushqanta Tayta Dios runakunata tantiyasirqan.

²⁰ Saypitanami say nacionpa mandaqnin rey carcilpita jorqasimurqan.

²¹ Jorqurkurmi palaciunta y lapan imaykantapis shumaq rikananpaq churarqan.

²² Saynöpis churarqan mandäsiqninkunata y mayor runakunata shumaq yäsinanpaqmi.

²³ Saypitanami Israel runakuna Egiptuman aywakuyarqan. Saynöpami Cam particho surinkunawan Jacob tarqan.

²⁴ Tayta Diospa bendicionninwanmi askaqman mirayarqan. Egipto runakunapitapis mas askaqmi kayarqan.

²⁵ Saymi Egipto runakunata Tayta Dios yarpayta qorqan Israel runakunapa contran sharkuyänanpaq. Saynöpami Tayta Diosta sirviq runakunata nakasiyarqan.

²⁶ Saypitami Tayta Dios kacharqan sirviqnin Moisésta y akrashqan Aarónta.

²⁷ Paykunami Tayta Diospa munayninwan Cam particho espantaypaq kaqkunata rurayarqan.

²⁸ Saymi say nacioncho yanawyayparaq sakäsirqan. Sayno kaptinpis Egipto runakunaqa Moisés nishqanta manami cäsuyarqansu.

²⁹ Yawarmanmi mayukunatapis Tayta Dios tikrasirqan. Pescädukunapis lapanmi wanur ushakäyarqan.

³⁰ Intëru nacionmanmi rasakkuna juntäyarqan. Mandaq reypa palaciunmanpis juntäyarqanmi.

³¹ Tayta Dios mandaptinmi upakurukunapis y chushpikunapis intëru Egiptuman juntäyarqan.

³² Tamyapa trukan runtu tamyatami tamyasimurqan. Intëru say nacionman maqakuytami pashtasimurqan.

³³ Say runtu tamyami üva jachakunatapis hïgus jachakunatapis tululantana kachaykurqan. Egiptucho lapan jachakunatami rapraynaqlatana kachaykurqan.

³⁴ Tayta Dios mandaptinmi imayka niraq chukluskunapis sayman juntäyarqan. Yupaytapis mana atipaypaqmi saysika kayarqan.

³⁵ Saykunami lapan qewakunatapis ushayarqan. Chakracho mikuykunatapis chipyaqmi ushayarqan.

³⁶ Egipto runakunapa lapan qechpa surinkunatapis Tayta Diosmi wanusirqan.

³⁷ Aska qoriyuqta y aska qellayyuqtami kuyashqan runakunata jorqamurqan. Yarqayämuptin manami pipis sapata churaparqansu.

³⁸ Egipto runakuna selläma mansakash kaykäyashqanchömi aywakuyaptinqa kushikuyarqan.

³⁹ Israel runakunata lantupänanpaqmi pukutayta Tayta Dios kamariparqan. Sakaypa aksipänanpaqnami waruruyparaq rupaykaq ninata puestuparqan.

⁴⁰ Aysata manakuyaptinnami codornizkunata yurisipämurqan. Pacha junta mikuyänanpaqmi jana pasapita mikuytapis kamaripämurqan.

⁴¹ Upuyänanpaq yakutapis qaqapitami pashtasimurqan. Saymi sunyaq jirkapa saysika yaku aywarqan.

⁴² Saynömi sirviqnin Abrahamta promitishqanta cumplir Israel runakunata Tayta Dios yanaparqan.

⁴³ Egiptupitami kuyashqan runakunata jorqamurqan. Jorqamuptinmi seqaypa kushish yarqayämurqan.

⁴⁴ Paykunatami jäpa runakunapa markankunata Tayta Dios qoykurqan. Jäpa runakunapa imaykantapis paykunatami qoykurqan.

⁴⁵ Sayno qoykurqan estatütunkunata y leyninkunata cäsukuyänanpaqmi. ¡Aleluya!