Salmo 104 - Tayta Diospa Wilakuynin

Salmo 104 (103) Tayta Dios kamashqankunapita alabashqan

¹ Tayta Diostami lapan shonqüwan alabashaq. Tayta Dios, lapanpaq munayyuqmi kaykanki. Qamqa asikyaypa asikyaykaq mödanashnömi kaykanki.

² Chipipiynikiwanmi mödanawannöpis sapakunki. Jatun säbanastanömi jana pasatapis mashtamushkanki.

³ Jana pasacho kaykaq yaku jananchömi wayikitapis sharkasishkanki. Pukutaytapis guërra carrëtaykimanmi tikrasinki. Wayra jananchömi maypapis aywanki.

⁴ Wayrapis wilakuqnikimi kaykan. Bunyaypa bunyar rupaykaq ninapis sirvishuqnikimi kaykan.

⁵ Cimientuta ruraykurmi pasatapis jamasishkanki. Jamasishqaykipitaqa manami imaypis kuyukunsu.

⁶ Mödanawannömi lamarwan saparkushkanki. Altunnin puntakunatapis yakuwanmi saparkushkanki.

⁷ Olqutupaptikimi saparaq yaku jukla aywakurqan. Maqakuynöraq parlaptikimi witikurqan.

⁸ Saymi puntakunapis raqrakunapis yuriyarqan. Qam nishqaykichömi rikakuyarqan.

⁹ Pasaman yaku yapay mana juntänanpaqmi señalapashkanki. Say señalapashqaykitaqa manami päsansu.

¹⁰ Qam mandaptikimi jirkakunapita yakupis pashtamur raqrakunapa aywan.

¹¹ Say yakutami munti uywakunapis upuyan. Munti ashnukunapis yakunar saypitami upuyan.

¹² Raqrakuna kuchunchömi pishqukunapis qeshunkunata rurayan. Jachakunapa rämankunachömi rezakuyan.

¹³ Qammi jana pasacho kaykaq wayikipita jirkakunata parqumunki. Tamyawanmi alpatapis ushmasimunki.

¹⁴ Uywakunapaq qewatapis winasimunki. Mikuyta shuntananpaq runa murushqantapis winasimunki.

¹⁵ Saynölami vïnuta kamaripanki upur kushikunanpaq, aceitita kamaripanki qaqlanman lushikur chipipïnanpaq y mikuytapis kamaripanki kalpan kananpaq.

¹⁶ Líbanucho kaq cedru jachakunapis qampami kaykäyan. Yaku kashqancho kayashpanmi copösu winayan.

¹⁷ Rämankunachömi pishqukunapis qeshunkunata rurakuyan. Cigüeñakunapis say jachakunachömi täyan.

¹⁸ Jirkakunachöpis munti cabrakunami kaykäyan. Qaqakunachöpis tejonkunami pakakuyan.

¹⁹ Killatapis kamashkanki fëchata qatiyänäpaqmi. Intipis musyanmi imay höra jeqarpunanpaq kashqantapis.

²⁰ Pasa tardiyaptinqa sakarpasinkimi. Sakaypanami munti uywakuna punukuyänanpita yarqayämun.

²¹ Leonkunapis mikuyänanpaq uywata ashirmi qaparäyan. Qamtami manakuyäshunki uywata tarisinaykipaq.

²² Pasa waraptinqa punukuyänanmanmi kutikuyan. Junaqpaqa machayninkunachönami punukuyan.

²³ Runakunanami aruyninkunaman aywayan. Saychömi tardiyaq qoyayninpa aruyan.

²⁴ Tayta Dios, imaykatapis qammi kamashkanki. Lapantapis shumaq tantiyaykurmi kamashkanki. Kay pasacho kamashqaykikuna maysaychömi kaykan.

²⁵ Lamarpis jatunkaray y anchumi kaykan. Saychömi jatusaqpis y takshapis saysika uywakuna kaykäyan.

²⁶ Lamar jananpami büquikunapis puriyan. Lamarchömi jatunkaray Leviatán waräkuypis kaykan. Saytaqa puklanaykipaqmi kamashkanki.

²⁷ Lapan uywakunami qamta shuyaraykäyäshunki höralancho mikuyta kamaripänaykipaq.

²⁸ Kamaripaptikimi mikuyänanpaq shuntakuyan. Bendicionnikiwanmi pacha junta mikuyan.

²⁹ Manana kamaripaptikiqa fiyupami turbatäyan. Jämayninta sapaskiptikiqa wanurmi alpaman tikrayan.

³⁰ Mirayänanta munaptikiqa seqaypami mirayan. Saynöpami yapay kay pasaman juntäyan.

³¹ ¡Tayta Dios imayyaqpis alabash kaykuläsun! ¡Kamashqanta rikar Tayta Dios kushikusun!

³² Pay rikäriptinqa pasapis mansarir suksukyanmi. Yataykuptinqa jirkakunapis qoshtatäyanmi.

³³ Kawashqäyaqqa imaypis Tayta Diostami alabashaq.

³⁴ Yarpachakushqäpis Tayta Diospa shonqunpaqno kaykuläsun. Paypa makincho karmi imaypis kushikü.

³⁵ Jusalikuqkuna kay pasacho ushakäyäsun. Yaqa runakuna lapanpis elaqäyäsun. Lapan shonqüwanmi Tayta Diosta alabashaq. ¡Aleluya!