Salmo 103 - Tayta Diospa Wilakuynin

1a

Salmo 103 (102) Tayta Diosta alabashqan

1a (1a) David qelqashqan salmu.

¹ 1 (1b) Tayta Diostami lapan shonqüwan alabashaq. Lapan voluntänïwanmi santu jutinta joqarir agradëcikushaq.

² Tayta Diostami lapan shonqüwan alabashaq. Kuyapämar yanapämashqanta manami imaypis qonqäshaqsu.

³ Paymi lapan jusalikushqäta perdonaman. Imayka niraq qeshyapitapis aliyäsiman.

⁴ Wanuypitapis paymi salvaman. Kuyapämashpanmi imachöpis yanapäman.

⁵ Alinnin kaqkunatami kamaripäman. Ankano mana utikaq kanäpaqmi maqtayäsiman.

⁶ Pobrikunata alquysakuyaptin Tayta Diosmi favornin sharkun.

⁷ Imano kawanansipaqpis Moiséstami musyasirqan. Rurashqankunatami Israel runakunata tantiyasirqan.

⁸ Tayta Diosqa ali shonqu y kuyapäkuqmi. Kuyakuq karmi juklaqa rabyakunsu.

⁹ Manami yaparir yaparirsu castigamansi. Manami imayyaqpis nanaparämäshunsu.

¹⁰ Manami jusalikushqansiman tupusu castigamansi.

¹¹ Kay pasapita jana pasayaq selläma altu kashqannömi payta mansapakuqkunapaqqa kuyakuynin jatun kaykan.

¹² Pasapa juk kuchunpita jukaq kuchunyaq jitariqnömi jusalikushqansitapis karuman jitarish.

¹³ Surinta taytan kuyashqannömi payta mansapakuqkunata kuyan.

¹⁴ Pay musyanmi imano kashqansitapis. Alpalapita kashqansita musyanmi.

¹⁵ Runakunaqa qewano ushakaqlami kaykäyan. Waytano shushuqlami kaykäyan.

¹⁶ Akaq wayra shamur jachata ushakäsinmi. Ushakäsiptinmi maycho kashqanpis musyakannasu.

¹⁷ Tayta Diospa kuyakuyninmi isanqa mana ushakaq kaykan. Payta mansapakuqkunataqa imaypis kuyanmi. Paykunapa surinkunapaq y wilkankunapaqpis alikunalatami ruran.

¹⁸ Saynölami yanapan rurashqan pactuta cumpliqkunata y mandamientunkunata cäsukuqkunata.

¹⁹ Jana pasachömi Tayta Diospa trönun kaykan. Saypitami lapan kay pasacho kaqkunata mandaykämun.

²⁰ Munayyuq angilkuna, Tayta Diosta alabayay. Nishqanta cäsukuq kayashpayki payta alabayay.

²¹ Tayta Diosta sirviq y munashqanta ruraq angilkuna, payta alabayay.

²² Lapan kamashqankuna, maysaychöpis payta alabayay. Paytami lapan shonqüwan noqapis alabashaq.