Salmo 102 - Tayta Diospa Wilakuynin

1

Salmo 102 (101) Lakikur manakushqan

1 (1) Pasaypa nakaycho kar Tayta Diosta manakushqan.

¹ 1 (2) Tayta Dios, manakamushqäta wiyaykalämay. Qayakamushqäta chaskiykulay.

² 2 (3) Lakikushqä höra noqapita ama pakakuykulaysu. Ruwakamuptï chaskiykalämay. Manakamushqäta jukla wiyaykalämay.

³ 3 (4) Qoshtay elaqashqannömi vïdäpis ushakaykan. Ninanöraqmi tulükunapis rupapan.

⁴ 4 (5) Qewa sakir ushakashqannömi shonqüpis aywapakaykan. Mikanaypis ni malaqaypis manami kannasu.

⁵ 5 (6) Lakikuylawanmi tulükunapis yupanakuykäyan.

⁶ 6 (7) Jäkuqcho tukunömi kaykä. Raqäkunacho chushiqnömi kaykä.

⁷ 7 (8) Manami punuytapis tarïsu. Wayi janancho japalan chankishnömi kaykä.

⁸ 8 (9) Mana jamaypami contrapartïkuna wajupäyäman. Imay hörapis jutïta joqarirmi maldicionayäman.

⁹ 9 (10) Mikunäpa trukanqa uchpa janalanchömi jamaraykä. Yakutapis weqilätawanmi upuykä.

¹⁰ 10 (11) Sayno kaykä rabyar castigamaptikimi. Joqarkamarmi saqtariykamashkanki.

¹¹ 11 (12) Lantuy päsashqannömi vïdä ushakaykan. Qewa sakishqannömi pasaypa sakiykäna.

¹² 12 (13) Tayta Dios, qammi imayyaqpis rey kaykanki. Qamta imayyaqpis yarparäyäshunkimi.

¹³ 13 (14) Siónta kuyapashpayki favornin sharkuykulayna. Kuyapar perdonanaykipaq kaq hörapis chämushnami.

¹⁴ 14 (15) Sirvishuqnikikunaqa saycho kaq rumikunatapis kuyayanmi. Raqälana kaykaqta rikarmi selläma lakikuyan.

¹⁵ 15 (16) Siónta kuyapaptikimi maysay nacioncho taq runakunapis respitayäshunki. Kay pasacho lapan reykunami munayyuq kashqaykita tantiyayanqa.

¹⁶ 16 (17) Sayno tantiyayanqa Siónta yapay sharkasiptikimi. Sayta rikarmi pïmaypis musyayanqa munayyuq kashqaykita.

¹⁷ 17 (18) Pobrikuna manakayämushqanta wiyankimi. Manakayämushuptiki manami upa tukunkisu.

¹⁸ 18 (19) Qepa yuriqkunapis Tayta Diosta alabayänanpaq pay rurashqankunata qelqashun.

¹⁹ 19 (20) Tayta Diosmi jana pasacho kaykaq sagrädu wayinpita kay pasata rikamurqan

²⁰ 20 (21) waqaykaq prësukunata wiyar yanapänanpaq y condenash runakunata wanuypita salvananpaq.

²¹ 21 (22) Saymi Sióncho Tayta Diospa jutinta joqarir adorayanqa. Alita ruraq kashqanpitami Jerusaléncho alabayanqa.

²² 22 (23) Saychömi lapan nación runakuna Tayta Diosta adorayänanpaq shuntakäyanqa.

²³ 23 (24) Tayta Diosmi kalpätapis ushakäsish. Walka watalana kawanäpaqmi kamakäsish.

²⁴ 24 (25) Saymi manakur nirqä: <

²⁵ 25 (26) Kamashqayki hörami kay pasatapis shumaq takyasishkanki. Jana pasatapis makikiwanmi kamashkanki.

²⁶ 26 (27) Lapan kamashqayki ushakaptinpis qamqa imaypis kaykankimi. Mödana makwayar ushakashqannömi lapanpis ushakanqa. Mödanata trukasiqnölami trukarasinkipaq. Trukarkasirnaqa manami cäsupankinasu.

²⁷ 27 (28) Lapan ushakaptinpis qamqa imaypis kashlanmi kaykanki. Qamqa manami imaypis awkinyankisu.

²⁸ 28 (29) Sirvishuqnikikunapita miraqkunataqa imaypis yanapankimi. Paykunaqa nawpaykichömi imaypis kawayanqa>>.