Salmo 10 - Tayta Diospa Wilakuynin

Salmo 10 (9b) Fiyu runakunata castigananpaq Tayta Diosta manakushqan

¹ Tayta Dios, ¿imanirtaq karucho kaykanki? ¿Imanirtaq laquësacho kaykaptï pakakunki?

² Jusalikuq runakunaqa orgullösu kayashpanmi pobrikunata alquysakuyan. Isanqa jukpaq trampata churayashqanmanmi kikinkuna jeqayanqa.

³ Mana ali runakunaqa lutanta yarpäyashqanpita alabakuyanmi. Wachakash runakunawan kuyanakurmi Tayta Diosta manakaqman churayan.

⁴ Ali chölu kayashqanta yarparmi Diosta ashiyansu. Dios kashqantaqa manami yarpaylapis yarpäyansu.

⁵ Lapan rurayashqankunapis yarpäyashqannömi kamakan. Tayta Dios juzgananpaq kashqantaqa manami tantiyayansu. Contrankunatapis pasaypa manakaqmanmi churayan.

⁶ Desgraciaman imaypis mana chäyänanpaq kashqantami yarpäyan. Imaypis kushishla kawayänanpaq kayashqantami criyiyan.

⁷ Runa mayinta lutalami maldicionayan, lulapäyan y ashliyan. Ali shimilanpa parlapar lulapaykäyanmi.

⁸ Jäkuqninman pakakuykurmi runa mayinta asaltayan. Nänipa aywaykaqtami shuyaykur traicionpa wanusiyan. Pïninpis mana kaqkunata atacayänanpaqmi rikapäyan.

⁹ Machaynincho pakakuykur león shuyaraqnömi pobrikunata shuyaräyan. Redwan sariqnömi mana ali yarpayninkunawan lulapaykäyan.

¹⁰ Lätakuykur león imatapis sariqnömi aska runakunata sariyan.

¹¹ Paykunaqa Dios mana juzgananpaq kashqantami yarpäyan. Dios mana rikashqantami yarpäyan.

¹² Tayta Dios, mana ali runakunataqa jukla juzgaykulay. Nakasiyashqan runakunata isanqa ama qonqaykulaysu.

¹³ ¿Imanirtaq yaqa runakuna manakaqman churayäshunki? ¿Imanirtaq yarpäyan mana juzganaykipaq kashqanta?

¹⁴ Qam rikaykankimi pasaypa mana alikunata rurayashqanta. Paykunataqa rurayashqanman tupu castigaykulay. Pïninpis mana kaqkunaqa qammanmi yärakaykäyämun. Waksakunapa yanapaqninmi qam kaykanki.

¹⁵ Jusalikur kawaq runakunapataqa rikrantapis pakiykulay. Jusalikuyashqanpita juzgaykulay. Say niraq runakunataqa lapanta ushakaykasilay.

¹⁶ Tayta Dioslami imaypis rey kaykan. Payta mana cäsukuq runakunaqa ushakäyanqami.

¹⁷ Tayta Dios, cäsukushuqniki runakuna manakayämushqantaqa imaypis wiyankimi. Paykunataqa shakyäsinkimi y kuyapankimi.

¹⁸ Waksakunata y nakaycho kaykaq runakunata yanapankimi. Alpalapita kamashqayki runaqa runa mayinta ama nakasiyäsunnasu.