Salmo 1 - Tayta Diospa Wilakuynin

Libru 1 Salmo 1—41 Salmo 1 Tayta Dios munashqanno kawaq runa y jusasapa runa imano kashqanpis

¹ Kushishqami kawan Tayta Dios munashqanno kawaq runaqa. Say runaqa lutan yäsikuykunata manami chaskipansu. Wakin runakuna jusalikuyaptinpis payqa manami jusalikunsu. Lutankunata parlayaptinpis payqa manami lutanta parlansu.

² Saypa trukanqa Tayta Diospa leyninkunata kushishqami cäsukun. Paqasta junaqtapis say leykunalapaqmi yarparaykan.

³ Say runaqa kaykan mayu kuchuncho plantash jachanömi, tiempun chämuptin ali wayuq jachanömi, y raprankunapis mana qarwashtaypa loqluypa loqluykaqnömi. Lapan rurashqankunapis alimi yarqapan.

⁴ Jusalikuycho kawaq runakunaqa manami saynösu kawaykäyan. Paykunaqa wayra apashqan saki punshanömi kaykäyan.

⁵ Paykunataqa Tayta Diosmi juzganqa. Manami kuyashqan runasu kayanqa.

⁶ Cäsukuqkunataqa Tayta Diosmi yanapan ali kawayänanpaq. Jusalikuqkunatami isanqa jusalikuykaqlata ushakäsinqa.