Proverbios 30 - Tayta Diospa Wilakuynin

Agur tantiyasishqankuna

¹ Jaquépa surin Agurmi Itielta y Ucalta wilapar nirqan:

² Lapanpitapis mas mana tantiyakuq upanömi kä. Imatapis mana tantiyaq runanömi kä.

³ Tantiyakuq kaytapis lapantaqa manami yachakushkäsu. Santu Tayta Diospa yachasikuynintapis lapantaqa manami shumaq musyäsu.

⁴ Manami pï runapis jana pasaman aywaykur kutimushsu. Saynölami pï runapis wayrata aptaransu, ni lamarta jakunwan qepinsu ni kay pasapa lindërunkunata churashsu. Pilapis rurashqanta musyarqa mä jutinta wilamay. Tantiyakuq karqa mä surinpa jutintapis wilamay.

⁵ Tayta Dios sapanmi payman yärakuqkunataqa. Lapan promitishqanta payqa cumplinmi.

⁶ Paypa palabranman kikikipa yarpaynikita ama yapaysu. Yapaptikiqa olqutupäshushpayki castigashunkipaqmi. Saynöpami musyakanqa lulakuq kashqayki.

⁷ Kawashqäyaq ishkay cösalatami manakamü, Tayta Dios.

⁸ Tantiyaykasilämay pitapis mana lulapänäpaq. Ama poquqyäsimaysu ni muchuqyäsimaysu. Saypa trukanqa waran waran nistashqäkunata kamaripaykalämay.

⁹ Poquq karqa capazchir qamta qonqarpis qonqayküman. Pishïpakur suwakushpä penqaymanpis churaykümanchi.

¹⁰ Ashmay lutanta ruraptinpis patronninta imatapis ama wilapaysu. Wilapaptikiqa say ashmay maldicionarpis maldicionaykushunkimanmi.

¹¹ Wakin runaqa mamantapis taytantapis maldicionanmi.

¹² Wakin runakunaqa jusayuq kaykarpis jusaynaq tukuyanmi.

¹³ Wakin runakunaqa lapanpita mas ali kayashqanta yarparmi runa mayinta manakaqman churayan.

¹⁴ Wakin runakunanaqa ambiciösu karmi pobrikunapa imaykantapis qechur qarapachayan. Mana kuyapäkuq kayaptinmi paykunapaqa kirunpis espädanöraq y waqunpis puñalnöraq kaykan.

¹⁵ Ambiciösu runaqa imayka yawar shoquq kurunömi kaykan. Say runaqa aykata chaskirpis manami contentakunsu. Saynöpis kimsa cösa y juk masmi kaykäyan mana contentakuqkunaqa.

¹⁶ Saykuna kaykäyan sepultüra, qoluq warmi, saki chakra y ninami.

¹⁷ Taytanta manakaqman churaqkunata y maman yäsishqanta mana chaskikuqkunataqa nawintapis wiskurkuna jorquyäsun. Condorkunapis kawaykaqta mikuyäsun.

¹⁸ Kimsa cösa y juk masmi mana tantiyaypaq kaqkuna kaykäyan.

¹⁹ Saykuna kaykäyan anka imano pajashqan, rumi jananpa culebra imano purishqan, lamar jananpa büqui imano aywashqan y jipashwan maqta imano wamrata rurashqanmi.

²⁰ Runan qanrataq warmiqa juk runawan punurkurpis manami penqakunsu. Nirkurpis nin: <>.

²¹ Kay pasacho kimsa cösa y juk masmi kaykan runakuna mana munashqan.

²² Saykunaqa kaykäyan juk ashmay rey kayman yaykushqan, mana tantiyakuq runa imaykayuqpis rikakushqan,

²³ despreciash warmi runayuq rikakushqan y patrönanpa trukan ashmay warmi patröna rikakushqanmi.

²⁴ Kay pasacho chusku akapala kaqkunami tantiyaqpitapis mas tantiyaq kaykäyan.

²⁵ Saykuna kaykäyan pitishkuna (paykunaqa kalpaynaq karpis usya wisanmi mikuyninta churakuyan),

²⁶ wishkashkuna (paykunaqa kalpaynaq karpis ranrakunachömi wayinta rurakuyan),

²⁷ chukluskuna (paykunaqa mandaqnin rey mana kaykaptinpis qatinaylanpami puriyan)

²⁸ y arashkuna (paykunaqa fácil sariy kaykarpis reypa palaciunmanmi yaykuyan).

²⁹ Kimsa cösa y juk masmi kaykan waräwa puriqkuna.

³⁰ Saykuna kaykäyan león (leonqa lapan uywapitapis mas mansaypaq y imapitapis manami qeshpinsu),

³¹ pelyaq kakash, yayan chïvu y soldädukunapa puntanta aywaq reymi.

^32-33 Lichipa nätasninpitami mantequïllata ruran. Sinchipa sinyakuptinqa yawarmi yarqun. Saynölami piwanpis wajupänakurqa ansäsinakuyan. Mana tantiyakuypa runa tukur pitapis wajuparqa saykunata tantiyakuy.