Proverbios 28 - Tayta Diospa Wilakuynin

¹ Jusalikush runaqa pipis mana qatikachaykaptinmi qeshpir aywakun. Ali runami isanqa imayka leonno imatapis mansansu.

² May nacionchöpis mana ali kawayaptinqa aska autoridätaraqmi nistäyan. Autoridä tantiyakuq karqa lapantapis sitiunmanmi churan.

³ Pobrikunata nakasiq yaqa runaqa poquraykaq mikuyta loqla apaqnömi kaykan.

⁴ Leykunata mana cäsukuq runaqa yaqa runatami alaban. Leykunata cumpliq runami isanqa yaqa runata chaskipansu.

⁵ Yaqa runakunaqa alita rurayänanpaq kaqta manami tantiyayansu. Tayta Diosta ashiqkunami isanqa ali kaqkunata rurayänanpaq tantiyakuyan.

⁶ Rïcu kaykar yatapakuq kashqanpitaqa mas ali kaykan pobrila karpis mana yatapakuq kashqanmi.

⁷ Tayta Diospa leyninkunata cäsukuq runaqa tantiyakuqmi kaykan. Aläpa mikuq runakunawan puriq runaqa taytanta penqaymanmi churan.

⁸ Qellayninpa wachayninwan rïcuyaq runaqa manami say qellayta provichanqasu. Saypa trukanqa pobrikunata kuyapaq runami provichanqa.

⁹ Tayta Diospa leyninkunata mana cäsukuq runataqa manakushqantapis Tayta Dios manami chaskinqasu.

¹⁰ Jawkala kawakuq runata jusalikuyman qarpuq runaqa kikinpis jusalikuymanmi chanqa. Mana jusalikunanpaq tantiyasiq runami isanqa ali kawayman chanqa.

¹¹ Rïcu runaqa tantiyakuq kashqantami yarpan. Pobrila karpis tantiyakuq runami isanqa say rïcu runa imano kashqantapis tantiyan.

¹² Ali runa gänaptinqa fiestataraqmi pïmaypis rurayan. Yaqa runa gänaptinmi isanqa pïmaypis mansarir pakakuyan.

¹³ Jusalikushqanta mana reconöciptinqa manami ima rurashqanpis alisu kanqa. Jusalikushqanta reconöcir kachariptinmi isanqa Tayta Dios perdonanqa.

¹⁴ Tayta Diosta imaypis mansapakuq runaqa kushishqami kawan. Mana cäsukuq runami isanqa nakaykunaman chanqa.

¹⁵ Imayka malaqash ukumaryano o malaqash leonnömi mana ali autoridäqa pobrikunata nakasir ushaypa ushan.

¹⁶ Mana tantiyakuq autoridäqa mandashqan runakunata mana kuyapaypami nakasin. Mana yatapakuq autoridäqa aska watami kawanqa.

¹⁷ Wanusikuq runaqa qeshpi qeshpilami wanushqanyaqpis purinqa. Say runapa favornin pipis ama sharkusunsu.

¹⁸ Ali runaqa ima desgraciapitapis salvakunqami. Yaqa runami isanqa desgraciaman chanqa.

¹⁹ Arukuq runapaqa mikuyninpis pusuy pusuymi kanqa. Qela runakunawan talukaq runapami isanqa mikunanpaqpis kanqasu.

²⁰ Yärakuypaq kaq runaqa halagashqami kanqa. Jukla rïcuyayta munaq runaqa lutan ruraykunamanmi jatikanqa.

²¹ Pitapis juzgarqa mana jananpaypa juzganki. Wakin juzgaqkunaqa juk amuy tantalapaqpis jusalikuqpa favorninmi sharkuyan.

²² Ambiciösu runaqa rïcuyaylapaqmi yarpachakun. Manami musyanraqsu ambiciösu kashqanpita muchuyman chänanpaq kashqanta.

²³ Wakinqa mana alita ruraptiki alabashunaykipa trukan corrigishunkimi. Saypita jaqayarpis nirkurraqmi tantiyakunki alipaq kashqanta.

²⁴ Taytanta y mamanta suwaparkur <> niq runaqa wanusikuq runapa cumpinchinnömi kaykan.

²⁵ Imaykapaqpis wachakash runaqa piwanpis rimanakularmi kawan. Tayta Diosman yärakuqkunami isanqa imaykayuqmi rikakuyan.

²⁶ Kalpanman y yachaq kayninman yärakuq runaqa mana tantiyakuqmi kaykan. Tantiyakuq runaqa imapitapis salvakunqami.

²⁷ Pobrikunata yanapaqtaqa manami imapis pishinqasu. Muchuqkunata mana yanapaqtami isanqa pïmaypis maldicionanqa.

²⁸ Yaqa runakuna mirayaptinqa runakuna mansariyanmi. Say runakuna ushakäyaptinqa kushikuyanmi.