Proverbios 18 - Tayta Diospa Wilakuynin

¹ Kikilanpaq imatapis munaq runaqa wakinpaqqa manami yarpachakunsu. Pï yäsiptinpis manami chaskikunsu.

² Mana tantiyakuq runaqa yachakuyta manami munansu. Saypa trukanqa ichik yachashlantami halagakun.

³ Yaqa runaqa jamurashqami kanqa. Runa tukuqqa manakaqman churashqami kanqa.

⁴ Tantiyakuq runa parlashqanqa mana sakiq pukyunömi kaykan. Saymi yachasishqanqa maypis wiyakuy munay kaykan.

⁵ Manami alisu kaykan jusayuq runapa favornin sharkur jusaynaq runata tumpashqan.

⁶ Mana tantiyakuq runaqa lutalami piwanpis rimanakun. Shimilanpitami maqaytukunpis.

⁷ Mana tantiyakuq runataqa shimilanmi condenan. Paytaqa shimilanpitami wanusiyanqapis.

⁸ Tulu shimi parlashqanqa mishkinöraqmi runata gustan. Saymi wiyaqkunapa shonqunyaq chaykun.

⁹ Qela runawan fiyu runaqa say wawqinölami kaykäyan.

¹⁰ Tayta Diosqa shumaq sharkasish törrinömi kaykan. Paymanmi jusaynaq runakuna amparakuyan.

¹¹ Rïcu runaqa riquëzankunaman atiënikurmi yarpan murallash markano següru kashqanta. Saymi imapis mana päsananpaq kashqanta yarpan.

¹² Runa tukuq runaqa pasaypami nakanqa. Mana runa tukuqtami isanqa pïmaypis respitan.

¹³ Parlayta manaraq ushaptin contestaq runaqa mana tantiyakuq karmi penqaypaq kaykan.

¹⁴ Qeshyarpis aliyayta yarparqa aliyanqami. Aliyayta mana yarparqa ¿imanöraq aliyanman?

¹⁵ Yachaq runaqa masmi yachaq kayta munan. Tantiyakuq runaqa masmi yachakun.

¹⁶ Imalanwanpis chaqkunataqa pïmaypis kushishqami chaskikun. Qarayninwanqa munayyuq runamanpis yaykurinmi.

¹⁷ Puntata quejakuq chaq kaqqa autoridäta criyirasinmi. Contrapartin chaykur declaraptinraqmi musyakan mayqanpis jusayuq kashqan.

¹⁸ Suertita jitarqa demandukuna aja arreglay kaptinpis juklami arreglayan. Munayyuq runakunapis suerti yarqamushqantami rurayan.

¹⁹ Markapa murällan aja juchusiy kashqanpitapis mas ajami kaykan wawqinwan rimanakush runata amistasiyqa. Sayno runaqa barritawan trancash punkunömi kaykan.

²⁰ Shimilanpitami runaqa chikish o kuyashqapis kaykan.

²¹ Wanuytapis kawaytapis shimilanpitami tarin. Jaku shimi runaqa chikipashqami kanqa.

²² Warmiyuq runaqa kushishqami kawan. Ali warmita tarishqanqa Tayta Diospa bendicionninmi kaykan.

²³ Pobri runaqa imalapaqpis ruwakunmi. Rïcu runaqa pitapis olqutupanmi.

²⁴ Wakin amïguykikunaqa ishkay cärami kaykäyan. Wakinkunami isanqa wawqikipitapis mas yärakuypaq kaykäyan.