Nehemías 12 - Tayta Diospa Wilakuynin

Jerusalénman aywaq levitakuna y cürakuna

¹ Babiloniapita Jerusalénman aywarmi Salatielpa surin Zorobabelwan mandaq cüra Jesúa cürakunata y levitakunata pushayarqan. Pushayashqan cürakunami kayarqan Seraías, Jeremías, Esdras,

² Amarías, Maluc, Hatús,

³ Secanías, Rehum, Meremot,

⁴ Iddo, Gineto, Abías,

⁵ Mijamín, Maadías, Bilga

⁶ y Semaías. Saynölami paykunawan kayarqan Joiarib, Jedaías,

⁷ Salú, Amoc, Hilcías y Jedaías. Wakin kayarqan cürakunapa mandaqnin y wakinnami kayarqan cürakunala. Paykuna cüra kayarqan Jesúa mandaq cüra kashqan wisanmi.

⁸ Pushayashqan levitakunami kayarqan Jesúa, Binúi, Cadmiel, Serebías, Judá y Matanías. Paykunami levita mayinkunawan Tayta Diosta alabayaq.

⁹ Tayta Diosta alabayaptinmi nawpanman Bacbuquíaswan Uni ichikuyarqan paykunapis Diosta alabayänanpaq. Bacbuquíaswan Unipis levitami kayarqan.

¹⁰ Jesúa karqan Joiacimpa taytanmi. Joiacim karqan Eliasibpa taytanmi. Eliasib karqan Joiadapa taytanmi.

¹¹ Joiada karqan Jonatánpa taytanmi. Jonatán karqan Jadúapa taytanmi.

¹² Kaychömi qelqaraykan cüra ayllukunapa mandaqninkuna pï pï kayashqanpis. Paykuna mandaq kayarqan Joiacim mandaq cüra kaykänan wisanmi: Seraías ayllucho mandaq karqan Meraías. Jeremías ayllucho mandaq karqan Hananías.

¹³ Esdras ayllucho mandaq karqan Mesulam. Amarías ayllucho mandaq karqan Johanán.

¹⁴ Melicú ayllucho mandaq karqan Jonatán. Sebanías ayllucho mandaq karqan José.

¹⁵ Harim ayllucho mandaq karqan Adna. Meraiot ayllucho mandaq karqan Helcai.

¹⁶ Iddo ayllucho mandaq karqan Zacarías. Ginetón ayllucho mandaq karqan Mesulam.

¹⁷ Abías ayllucho mandaq karqan Zicri. Miniamín ayllucho mandaq karqan.... Moadías ayllucho mandaq karqan Piltai.

¹⁸ Bilga ayllucho mandaq karqan Samúa. Semaías ayllucho mandaq karqan Jonatán.

¹⁹ Joiarib ayllucho mandaq karqan Matenai. Jedaías ayllucho mandaq karqan Uzi.

²⁰ Salai ayllucho mandaq karqan Calai. Amoc ayllucho mandaq karqan Eber.

²¹ Hilcías ayllucho mandaq karqan Hasabías. Jedaías ayllucho mandaq karqan Natanael.

²² Levitakunapa mandaqninkuna pï pï kashqanta y cüra ayllukunapa mandaqninkuna pï pï kashqanta qelqayarqan Eliasib mandaq cüra kaykänan wisan, Joiada mandaq cüra kaykänan wisan, Johanán mandaq cüra kaykänan wisan y Jadúa mandaq cüra kaykänan wisanmi. Sayno qelqayarqan hasta Persia nacioncho rey Darío mandaykänan wisanyaqmi.

²³ Levitakunapa mandaqninkuna sayno acta libruman jutinkunata qelqayarqan hasta Eliasibpa surin Johanán wanushqanyaqmi.

²⁴ Levitakunapa mandaqninkunami kayarqan Hasabías, Serebías y Cadmielpa surin Jesúa. Paykunapa nawpanmanmi levita mayinkuna ichikuyarqan Tayta Diosta agradëcikur alabäsiyänanpaq. Turnun töcaptin sayno rurayänanpaqmi Tayta Diosta sirviq David unay mandarqan.

²⁵ Almacén cuartukunata täpakuqkuna kayarqan Matanías, Bacbuquías, Obadías, Mesulam, Talmón y Acub. Say cuartukunaqa templu patiuman yaykuna punkukuna nawpanchömi kayarqan.

²⁶ Paykunaqa kawayarqan Jesúapa surin Joiacim mandaq cüra kaykänan wisanmi. Joiacimqa karqan Josadacpa wilkanmi. Saynöpis paykuna kawayarqan Nehemías gobernador kaykänan wisan y cüra Esdras leyta yachasiq kaykänan wisanmi.

Jerusalén murällata inaugurayashqan

²⁷ Jerusaléncho sharkasiyashqan murällata inaugurayänanpaqmi levitakunata maysaycho täyaptinpis Jerusalénman qayasimurqan. Sayno qayasimurqan platïllukunata, salteriukunata y arpakunata tukar Tayta Diosta agradëcikur kushikuypita cantayänanpaqmi.

²⁸ Saymi cantayänanpaq levitakuna shuntakäyarqan Jerusalénpa nawpan markakunapita y Netofapa nawpan markakunapita.

²⁹ Saynöpis shuntakäyarqan Gilgal, Geba y Azmavet cercankunapitami. Say cercankunachömi levitakuna wayinkunata sharkasish kayarqan.

³⁰ Fiestata rurayänanpaqmi puntata cürakuna y levitakuna armakur purificakuyarqan. Purificakurirnami runakunata, marka murällata y murällapa punkunkunata purificayarqan.

³¹ Saypitanami Judá provinciapa mandaqninkunata wisäsirqä murälla jananman. Saychömi churarqä ishkay grüpu cantaqkunata. Punta kaq grüpumi aluq kaqläpa aywarqan Qanra Jitakuna jutiyuq punku jananpa.

³² Paykunapa qepantami aywarqan Osaías pulan Judá mandaqkunata pushash.

³³ Saynöpis aywayarqan Azarías, Esdras, Mesulam,

³⁴ Judá, Benjamín, Semaías y Jeremías.

^35-36 Paykunaqa cüralantaqmi kayarqan. Say cürakunami cornëtata tukaraykar aywayarqan. Paykunawanmi aywayarqan Zacarías y ayllunkuna Semaías, Azarael, Milalai, Gilalai, Maai, Natanael, Judá y Hanani. (Zacaríasqa karqan Jonatánpa surinmi, Jonatán karqan Semaíaspa surinmi, Semaías karqan Mataníaspa surinmi, Matanías karqan Micaíaspa surinmi, Micaías karqan Zacurpa surinmi y Zacur karqan Asafpa surinmi.) Lapanpis say cürakunami instrumentukunata tukaraykar aywayarqan. Say instrumentukunaqa Tayta Diosta sirviq David tukashqan instrumentunömi kayarqan. Paykunapa nawpantami aywarqan leykunata yachasiq Esdras.

³⁷ Pukyu jutiyuq punkuman chaykurmi grädapa wisäyarqan Davidpa Markan nishqan partiyaq. Saypa aywarmi päsayarqan Davidpa palaciunpa. Nirkurnami inti jeqamunan kaqläpa päsar chäyarqan Yaku jutiyuq punkuyaq.

³⁸ Ishkay kaq grüpu cantaqkunanami isuq kaqläpa aywayarqan murälla janalanpa. Qepantami wakin runakunawan juntu noqapis aywarqä. Päsayarqä Jornu törrita, Anchu Perqa nishqanta,

³⁹ Efraín punku jananpa, Jesana punku jananpa, Pescädu punku jananpa, Hananeel törrita, Pachak jutiyuq törrita y Uyshakuna punku jananpa. Wardiakuna jutiyuq punku jananman chaykurmi ichikuykuyarqä.

⁴⁰ Saypitanami ishkan grüpu cantaqkuna Tayta Diospa templunman chaykur sitiunman kamakäyarqan. Noqapis saynölami noqawan kaykaq mandaqkunawan kamakäyarqä.

⁴¹ Cornëtan aptash cürakunapis noqawanmi kaykäyarqan. Say cürakunami kayarqan Eliacim, Maaseías, Miniamín, Micaías, Elioenai, Zacarías y Hananías.

⁴² Paykunapa qepantami aywayarqan Maasías, Semaías, Eleazar, Uzi, Johanán, Malquías, Elam y Ezer. Alabanzakunata cantaqkunami fuertipa cantayarqan. Paykunapa directorninmi karqan Izrahías.

⁴³ Say junaqmi Tayta Diospaq saysika uywakunata pishtar sacrificiuta rupasiyarqan. Tayta Dios yanapäyämaptinmi fiyupa kushikur fiestata rurayarqä. Warmikunapis wamrakunapis kushishqami saycho kaykäyarqan. Jerusaléncho fiestata kushish rurayashqä karuyaqmi wiyakarqan.

Cürakunapaq y levitakunapaq apayämushqan

⁴⁴ Say junaqmi churayarqan almacén cuartu täpaqkunata. Ofrendakunata, primiciakunata y diezmukunata markakunapita y chakrakunapita Judá runakuna apayämuptinmi say täpaqkuna chaskiykur almacén cuartukunaman churayarqan. Leykuna nishqannömi say shuntayashqan karqan cürakunapaq y levitakunapaq. Judá runakuna sayno shuntayarqan cürakuna y levitakuna Tayta Diospa templuncho sirviyashqanpita kushikurmi.

⁴⁵ Cürakunawan levitakunami purificación ruraykunata rurayashpan Tayta Diosta shumaq sirviyarqan. Saynölami cantaqkuna y punku täpakuqkunapis David y surin Salomón ordenayashqannöla lapanta cumpliyarqan.

⁴⁶ Tayta Diosta sayno sirviyarqan rey David y cantaqkunapa directornin Asaf kawashqan wisan Tayta Diosta sirviyashqannömi. Say wisanmi cantaqkunapa directornin dirigiptin Tayta Diosta agradëcikur templucho alabayarqan.

⁴⁷ Zorobabel mandashqan wisan y Nehemías mandashqan wisanpis waran waranmi Israel runakunaqa saki mikuy ofrendakunata cantaqkunapaq y punku täpakuqkunapaq apayämuq. Saynölami levitakunapaqpis apayämuq. Levitakunanami chaskiyashqankunata Aarónpita miraqkunata aypuyaq.