Miqueas 3 - Tayta Diospa Wilakuynin

Mana ali autoridäkunata castigananpaq nishqan

¹ Saypitanami noqa nirqä: ¡Jacobpita miraq runakunapa autoridäninkuna! ¡Israel runakunapa mandaqninkuna! ¡Shumaq wiyayämay! ¿Manaku tantiyakuyanki ali kaqta rurayänaykipaq kashqanta?

² Qamkunaqa alikunata rurayänaykipa trukan mana alikunatami ruraykäyanki. Saymi runa mayikipa qaranta lushtiqno y tulunpita aysanta shipliqno kaykäyanki.

³ Tayta Dios kuyashqan runakunata mikuqnömi kaykäyanki. Qaranta shipraskir tulunta pakiqnömi kaykäyanki. Caldukuyänaykipaq aysanta kusuqnömi munashqaykita ruraykäsiyanki.

⁴ Sayno kayashqaykipitami manakuyaptikipis Tayta Dios yanapäyäshunkisu. Rabyanäsir jusalikuyashqaykipitami rikaytapis munayäshunkisu.

Lula profëtakunata castigananpaq nishqan

⁵ Lula profëtakunami Tayta Dios kuyashqan runakunata lulapaykäyan. Paykunaqa imatapis aptapaq kaqpaqqa bendición kananpaq kashqantami niyan. Mana aptapaq kaqpaqmi isanqa maldición kananpaq kashqanta niyan. Say lula profëtakunatami Tayta Dios nin:

⁶ <>.

⁷ Say lula profëtakunaqa pasaypa penqaychömi kayanqa. Tayta Dios mana tantiyasiptinmi imata wilakuyänanpaqpis shimin tarinqasu.

⁸ Noqatami isanqa Tayta Diospa Espïritun yanapaykäman pay munashqanno wilakunäpaq. Saymi valornï kan Israel runakuna mana cäsukuq kayashqanta y jusayuq kayashqanta mana mansariypa wilakunäpaq.

Jerusalén marka ushakänanpaq nishqan

⁹ ¡Jacobpita miraq runakunapa autoridäninkuna! ¡Israel runakunapa mandaqninkuna! ¡Shumaq wiyayämay! ¿Imanirtaq demandukunata shumaq arreglayankisu? ¿Imanirtaq leykunatapis cumpliyankisu?

¹⁰ Sayno kayaptikimi Jerusalénchöqa mana ali ruraykunala y wanusinakuyla kaykan.

¹¹ Autoridäkunapis ashäkuyta apapaqnin kaqlapaqmi favornin sharkuyan. Cürakunapis qellaypaq kashlami yachasiyan. Profëtakunapis qellaypaq kashlami wilakuyan. Sayno kaykarmi niyan: <>.

¹² Sayno kayashqaykipitami Sión löma imayka barbichash chakrano quëdanqa. Jerusalén markata ushakäsiptinmi raqälana quëdanqa. Templutapis juchusiyaptinmi jachakunalana saycho winanqa.