Miqueas 1 - Tayta Diospa Wilakuynin

¹ Moreset markacho taq Miqueastami Tayta Dios revelacionkunacho rikasirqan Samaria markata y Jerusalén markata ima päsananpaq kashqantapis. Sayno rikasirqan Judá nacioncho Jotam rey kaykänan wisan, Acaz rey kaykänan wisan y Ezequías rey kaykänan wisanmi.

Samaria runakunata Tayta Dios castigananpaq kashqan

² Maysay markakunacho taqkuna, Tayta Dios nishqanta lapayki wiyayay. Munayyuq Tayta Diosmi sagrädu templunpita pasa jusalikuyashqaykita shimpiyäshunkipaq.

³ Täkunanpita shamurmi jirka puntakunapa purinqa.

⁴ Jaruptinmi ninacho cëra suluqno say puntakuna sulunqa. Pampakunapis aska yaku aywar raqrayäsishqannömi raqrayash quëdanqa.

⁵ Lapan saykuna kanqa Jacobpita miraq runakuna jusalikuyashqanpitami. Israel runakuna jinan Samaria markachömi jusalikuykäyan. Judá runakunapis jinan Jerusalénchömi ïdulukunata adoraykäyan.

⁶ Tayta Diosmi nin: <

⁷ Contrapartinkuna shamurmi Samaria runakuna adorayashqan ïdulunkunatapis pasaypa pakir ushayanqa. Qerupita rurash sagrädu kaqkunatapis lapantami rupasiyanqa. Prostitütakuna gänapakuyashqan qellaywanmi say ïdulukunata rurasiyarqan. Contrankuna shamurmi say ïdulukunata sulusir qellayta fundiyanqa prostitütakunawan kakur pägayänanpaq>>.

Miqueas lakikushqan

⁸ Tayta Dios sayno castigananpaq kashqanta musyarmi lakikur iksuypa iksur waqaykä. Qara chakila y qarapächulami lakish puriykä. Saynöpis chacal aulaqnömi pasaypa waqaykä. Avestruz qaparaqnömi qaparaykä.

⁹ Samaria markapa qerinqa ima jampiwanpis manami aliyansu. Say qeriqa Judátapis jukushqami. Judá mayïkuna täyashqan Jerusalénmanpis chashqami.

¹⁰ Saytaqa Gat markacho runakunata ama wilapäyaysu. Desgracia päsamashqansita mana musyayänanpaq ama waqayaysu. Bet-le-afracho taq runakuna, fiyupa lakikur alpacho qoshpayay.

¹¹ Safircho taqkuna, nacionnikipita juklämanmi qarapächulata prësu apayäshunki. Zaanáncho taqkuna, yanapäyäshunaykipaq manami pipis yarqayämunqasu. Beteselcho taqkuna, waqayaptikipis manami pipis kuyapäyäshunkisu.

¹² Marotcho taqkunaqa fiyupami lakikuyanqa pipis salvananta munar. Paykunamanqa desgracialatami Tayta Dios kachamunqa. Say desgraciaqa Jerusalén marka punkuyaqmi chanqa.

¹³ Laquischo taq runakuna, qamkunami Israel nación runakunano mas puntata Judá nacioncho jusalikuyarqayki. Jusalikuyänanpaq Sión runakunatapis qamkunami yachasiyarqayki. Kananqa qamkunamanmi castïgu chämunqa. Say castïgupita qeshpiyänaykipaq cawalluykikunaman carrëtaykikunata watayay.

¹⁴ Imaypis mana kutiyämunaykipaqna Moreset-gat markapita despidikur aywakuyay. Israel nacionpa mandaqnin reykunaqa Aczib marka runakunamanmi yärakuykäyan. Sayno yärakuyaptinpis Aczib runakunaman castïgu chaptin say reykunata manami imanöpapis yanapäyanqasu.

¹⁵ Maresacho taqkuna, qamkunamanmi contraykikunata kachamushaq ushakäsiyäshunaykipaq. Saymi Israel nacioncho mas rïcukunapis mansarir qeshpiyashpan Adulam machayman pakakuyanqa.

¹⁶ Jerusaléncho taq runakuna, kuyayashqayki surikikunatami karu nacionman apakuyanqa. Sayno kananpaq kashqanpita lakikuyashpayki qara putuypa rutukuyay. Wiskurno kayänaykipaq qara putuypa rutukuyay.