Lamentaciones 4 - Tayta Diospa Wilakuynin

Chusku kaq poesía Álef

Álef

¹ ¡Qoripis yanayashnami kaykan! ¡Mananami chipipinnasu! Templu perqaraq rumikunapis intëru cälli esquïnakunachömi jitaraykäyan.

Bet

Bet

² Sión runakunaqa alinnin qoripitapis mas kuyaylapaqmi kayash. Kananqa mana yachaq runa rurashqan mitu mankanömi kaykäyan.

Guímel

Guímel

³ Chacalkunapis wawankunata kuyarmi chuchuyan. Kuyashqä runakunami isanqa sunyaq jirkacho taq avestruzno wamrankunatapis kuyayansu.

Dálet

Dálet

⁴ Chuchuykaq wamrakunapa qallunpis yakunaywan sakirmi jaqrunman laqakaykan. Wamrakuna mikanar manakuyaptinpis manami pipis kansu imalatapis makyaykunanpaq.

He

He

⁵ Ali alilata mikuqkunapis kananqa mikanaywanmi cällikunacho wanuykäyan. Kuyaylapaq wayicho shakshaqkunapis kananqa qanra jitakunachömi taykäyan.

Vav

Vav

⁶ Sodoma runakuna jusalikuyashqanpitapis peormi marka mayïkuna jusalikuyash. Sodoma markaqa pipis mana atacaykaptinmi elaqpita ushakarqan.

Zayin

Zayin

⁷ Rashtapis lëchipis yuraq kashqannömi Jerusalén autoridäkunapis jusaynaq y ali runakuna kayarqan. Wera kayaptinmi nawinkunapis elaqanarqanraq. Qaqlankunapis zafiro ruminöraqmi llushwarraq chipipirqan.

Jet

Jet

⁸ Kananqa mankapa sikinno yanami kaykäyan. Cällikunacho purirpis mana reqiypaqnami kaykäyan. Pasaypa uyu kayaptin tulunkunapis yupanakuykäyanmi.

Tet

Tet

⁹ Malaqaywan wanuqkunaqa pasaypami nakayash. Guërracho wanuqkunami isanqa aläpa nakayashsu.

Yod

Yod

¹⁰ Jerusalénpita yarquyta mana kamäpakur pasaypa malaqäyashpanmi wamrankunatapis mikuyash. Kuyapäkuq warmikunapis wawankunatami yanukuyash.

Caf

Caf

¹¹ Jerusalénta sayno castigarraqmi fiyupa rabyakushqanta Tayta Dios paskakäsish. Sión markata ninawan rupasirmi wayikunata cimientuntinta chipyaq ushakäsish.

Lámed

Lámed

¹² Maysay nacioncho reykunapis ni pï runapis manami criyiyashsu chikimaqninsikuna Jerusalénman yaykayämunanpaq kashqanta.

Mem

Mem

¹³ Sayno lapanpis kash profëtakuna jusalikuyashqanpita y cürakuna mana alikunata rurayashqanpitami. Saynölami paykunaqa jusaynaq runakunatapis wanusiyash.

Nun

Nun

¹⁴ Say profëtakunawan cürakuna kananqa cällikunacho qapranömi tapra tapra puriykäyan. Wanusiyashqan runakunapa yawarninwan pichukash kayaptinmi pipis yataylapis yataykuyta munansu.

Sámej

Sámej

¹⁵ Paykunata rikarmi runakuna niyan: <<¡Qanra shonqu runakuna, ama yatayämaysu! ¡Kaypita maypapis waqranyäyay!>> Sayno chikiyaptinmi Jerusalénpita qeshpir maysay nacionkunamanpis aywakuyash. Say nacionkunacho taq runakunapis niyan: <>.

Pe

Pe

¹⁶ Kikin Tayta Diosmi rabyakushpan profëtakunata y cürakunata Jerusalénpita qarqush. Paykunataqa manami yanapannasu. Saymi cüratapis ni mayor runakunatapis respitayannasu.

Ayin

Ayin

¹⁷ Juklä nación soldädukuna yanapämänansipaq shuyarashqapis manami chäyämushsu. Shuyakur rikachakuykashlami nawinsipis sakaskish.

Tsade

Tsade

¹⁸ Contrapartinsi runakuna watqarämashqami cälliman yarquytapis valurashkansisu. Ushakänansipaq höransi chämuptinmi wanuypis janansichöna kash.

Qof

Qof

¹⁹ Ankapitapis mas pajarayla aywaqmi contrapartinsi runakuna kayash. Jirkakunapapis qatikachämashkansimi. Sunyaq jirkapa qeshpishqapis shuyaraykämashkansimi.

Resh

Resh

²⁰ Tayta Dios akrashqan mandamaqninsi reytapis prësumi sariyash. Paymi sapämaqninsi kash. Saymi mayqan nacionpis achäquita mana ashipämänansipaq kashqanta yarparqansi.

Sin/Shin

Sin/Shin

²¹ Uz particho kaq Edom nación runakuna, ama kushipäyämaysu. Qamkunamanpis castïgu chämunqami. Saymi shinkash qarapächu jitaraq runa penqaypaq kashqanno qamkunapis penqaypaq kayankipaq.

Tav

Tav

²² Sión runakuna, castïguta chaskikushkansinami. Yapayqa mananami prësu apamäshunnasu. Edomita runakuna, qamkunatami isanqa jusalikuyashqaykipita Tayta Dios castigayäshunkipaq. Paymi lapan jusaykikunata shimpiyäshunkipaq.