Lamentaciones 3 - Tayta Diospa Wilakuynin

Kimsa kaq poesía Álef

Álef

¹ Tayta Dios rabyakushpan castigamaptinmi fiyupa nakashkä.

² Aksi kashqanpa pushamänanpa trukan yanawyaykaq sakaypami pushamash.

³ Yaparir yaparirmi noqataqa imaypis castigaykäman.

Bet

Bet

⁴ Qaräpis aysäpis pasaypanami shintiyaykan. Tulükunatapis lapantanami pakir ushaskin.

⁵ Mayman chaptïpis lakikuylami y nakaylami kaykan.

⁶ Wanushno kanäpaqmi sakäpakushta kachaykamash.

Guímel

Guímel

⁷ Maypapis mana qeshpinäpaqmi wichqaykamash. Fiyupa lasaq cadinakunawanmi wataykamash.

⁸ Yanapämänanpaq ruwakuptïpis manami wiyamansu.

⁹ Nänita sapaqnömi imata rurayta munaptïpis sapäman. Nänita jukläpa jitariqnömi mana ali kawayman churaman.

Dálet

Dálet

¹⁰ Imatapis sarinanpaq shuyaraykaq ukumaryanömi shuyaraykäman. Pakaraykaq leonnömi atacamänanpaq kaykan.

¹¹ Alipa aywaykaqtami pantakäsimash. Chipyaq rachir ushamaqnömi mansakashta kachaykamash.

¹² Flëcha jitakunanta apuntarmi flëchamash.

He

He

¹³ Flëchamashqanqa shonqüyaqmi jatikash.

¹⁴ Marka mayïkunapis asipäyämanmi. Asikuyänalanpaqmi jutïtapis joqarkuyan.

¹⁵ Fiyupa lakikuylamanmi Tayta Dios churamash. Ayaq ilawrutami upusimashqapis.

Vav

Vav

¹⁶ Rumiwan takaypami kirütapis jorqush. Uchpaman lätakaqpaqmi saqtamash.

¹⁷ Noqaqa imaypis lakishlami kawä. Mananami kushikuytapis kamäpakünasu.

¹⁸ Pasaypa lakikurmi walälapaq Tayta Diosman yärakushqäta yarpashkä.

Zayin

Zayin

¹⁹ Tayta Dios, lakikushqäta y fiyupa nakashqäta rikar kuyapaykalämay. Pasaypa iwjiq ajenjuta y venënuta upushnömi nakaykä.

²⁰ Kayjinanpa nakar yarpachakuptï shonqü pasaypami lakikun.

²¹ Sayno kaptinpis kuyapäkuq kashqaykita tantiyakur qammanmi yärakamü.

Jet

Jet

²² Tayta Dios imaypis kuyamansimi. Kuyapäkuq kaynin manami ushakansu.

²³ Waran waranmi mana ajayaypa kuyamansi. Promitimashqansitaqa imaypis cumplinmi.

²⁴ Saymi shonqulächo nï: <>.

Tet

Tet

²⁵ Lapan shonqunsiwan yärakur ruwakushqaqa Tayta Dios yanapämansimi.

²⁶ Sayno kaptinqa Tayta Dios salvamänansipaq mana ajayaypa shuyaräshun.

²⁷ Maqta kashqansipita pasa Tayta Dios corrigimashqansita chaskikushun.

Yod

Yod

²⁸ Tayta Dios castigamashqaqa upälala chaskikushun. Runakunapita witikur payta manakushun.

²⁹ Qonqurpakur soqpakushqaqa capazchi kuyapaykamashwanpis.

³⁰ Maqamashqapis qaqlansita kamapäshun. Imata qayapämashqapis upälala chaskikushun.

Caf

Caf

³¹ Tayta Diosqa kacharimashpansipis yapaymi kuyapämäshun.

³² Astarkamashpansipis kuyapäkuq kashpanmi yanapämäshun.

³³ Shonqun nanaykaptinmi payqa nakasimansipis y lakikasimansipis.

Lámed

Lámed

³⁴ Tayta Diosqa rikaykanmi prësukunata nakasiyashqanta.

³⁵ Saynöpis rikaykanmi pï runata alquysakuyashqanta.

³⁶ Musyaykanmi demanducho jusayuqpa favornin sharkuyashqantapis. Sayno ruraqkunataqa juzganqami.

Mem

Mem

³⁷ Tayta Dios mana kamakäsiptinqa imapis manami päsanmansu.

³⁸ Jawka kawaypis o nakaycho kawaypis poderyuq Tayta Dios niptinraqmi kaykan.

³⁹ Jusalikushqansipita astamashqapis kawaykarraqqa ¿imanirraq jaqayashwan?

Nun

Nun

⁴⁰ Imano kawashqansitapis shumaq yarpachakur jusalikuyta wanakushun. Tayta Diosta ashir pay munashqannöna kawashun.

⁴¹ Makinsita joqarir jana pasacho kaykaq Tayta Diosta lapan shonqunsiwan kayno nir manakushun:

⁴² <>.

Sámej

Sámej

⁴³ Fiyupa rabyakushpaykimi mana kuyapaypa qati qatiykur wanusiyämashkanki.

⁴⁴ Ruwakayämushqäta mana wiyanaykipaqmi pukutay rurinman pakakushkanki.

⁴⁵ Lapan runakunapa nawpanmanmi qanratano jitariyämashkanki.

Pe

Pe

⁴⁶ Chikimaqnïkunapis imaykatami qayapäyäman.

⁴⁷ Mutiypa mutir wanusiyämaptin y imaykäkunatapis ushakäsiyaptinmi mansakashla kawaykäyä.

⁴⁸ Kuyashqä markata sayno ushakäsiyaptinmi weqïpis mayunöraq aywan.

Ayin

Ayin

⁴⁹ Mana chawaypami waqaykä. Kushikuytapis manami tarïsu

⁵⁰ jana pasacho kaykaq Tayta Dios mana yanapämaptinqa.

⁵¹ Jerusalén markächo jipashkuna nakaykäyaqta rikaptïmi shonqüpis pasaypa nanäman.

Tsade

Tsade

⁵² Manapis wajupaykaptïmi chikimaqnïkuna qatikachäyämash. Pishquta sariqnömi prësu sariyta munayämash.

⁵³ Kawaykaqtami pözuman kacharpayämash. Nirkurmi jatun läja rumiwan sapaykayämash.

⁵⁴ Yaku ultakarkamaptinmi yarparqä wanukunäpaqna kashqäta.

Qof

Qof

⁵⁵ Tayta Dios, pözucho winararmi jutikita joqar qamta manakamushkä.

⁵⁶ Manakamushqäta wiyamashkankimi. Ruwakamushqäta imaypis wiyamankimi.

⁵⁷ Qayakamuptï shamurmi <> nimashkanki.

Resh

Resh

⁵⁸ Tayta Dios, qammi ima desgraciapitapis sapämashkanki. Wanuypitapis qammi salvamashkanki.

⁵⁹ Rikaykankimi imano nakasiyämashqantapis. ¡Say nakasimaqkunata castigaykulay!

⁶⁰ Vengayämashqanta y conträ imano rurayashqantapis rikashkankimi.

Sin/Shin

Sin/Shin

⁶¹ Tayta Dios, wiyashkankimi conträkuna ashliyämashqanta y atacayämänanpaq wilanakuyashqantapis.

⁶² Washäta rimaykälarmi conträkuna qoyarkuyanpis.

⁶³ Imachöpis asikuyänalanpaqmi jutïta joqariyan. Lapan niyashqantapis shumaq wiyaykulay.

Tav

Tav

⁶⁴ Tayta Dios, paykunataqa jusalikuyashqanman tupu castigaykulay.

⁶⁵ Mana tantiyakuyänanpaq upatakäsishpayki maldicionaykulay.

⁶⁶ Tayta Dios, rabyash astashpayki kay pasapita paykunata elaqaykasilay.