Lamentaciones 2 - Tayta Diospa Wilakuynin

Ishkay kaq poesía Álef

Álef

¹ Fiyupa rabyakushpanmi Siónta Tayta Dios llëvasish. Jana pasachöno kuyaylapaq kaykaptinpis chipyaqmi ushakäsish. Ajanash karmi tänan templutapis mana kuyapaypa ushakäsish.

Bet

Bet

² Tayta Dios seqaypa ajanashpanmi Jacobpita miraq runakunapa wayinkunatapis ushakäsish. Lapantapis chipyaqmi ushaypa ushar juchusish. Judá nacioncho lapan murallash markakunatapis chipyaqmi juchusish. Saynöpami mandaqkunata y mandäsiqkunatapis penqayman churash.

Guímel

Guímel

³ Chikimaqninsi runakuna intumashqapis Tayta Dios fiyupa ajanashpanmi soldädunsikunata yanapashsu. Saynöpami lapan soldädunsikunatapis elaqäsish. Imayka nina rupar chipyaq ushaqnömi Israel runakunata ushakäsish.

Dálet

Dálet

⁴ Imayka contransi japuymi Tayta Dios flëchakunanta ali sutarkur flëchamashkansi. Lapan kuyaylapaq kaqkunatapis chikimaqninsinömi chipyaq ushakäsish. Ajanaynin imayka ninano kaptinmi pasaypa ushakäsimashkansi.

He

He

⁵ Chikimaqninsi japuymi Israel nacionninsita Tayta Dios ushakäsish. Palaciunsikunatapis lapantami juchusish. Amparakunansi següru perqash markansikunatapis lapantami ushakäsish. Kuyaylapaq Judácho taq runakunatapis fiyupa lakikuymanmi churash.

Vav

Vav

⁶ Suklata ras ushakärasiqnölami templuntapis Tayta Dios ushakäsish. Ushakäsiptinmi pipis kannasu Sióncho fiestakunata rurananpaq ni jamay junaqkunacho jamananpaqpis. Fiyupa rabyar llëvasiptinmi reypis y cürakunapis ushakäyash.

Zayin

Zayin

⁷ Altarnintawan templuntapis Tayta Dios manami rikaytapis munannasu. Marka murällakunatapis juchusiyänanpaq chikiqninkunapa munayninmanmi kachaykush. Saymi Tayta Diospa templunman yaykur fiestata ruraqnöraq shakuypa shakur qayaräyash.

Jet

Jet

⁸ Kikin Tayta Diosmi kachapariykush Siónpa murällankunata juchusiyänanpaq. Juchusiyänanpaq wilanakuyashqannölami chipyaq ushakäsiyash. Kananqa Jerusalénpa murällankunapis tumaypa juchush kaptinmi rumikunalana qoturaykäyan.

Tet

Tet

⁹ Markaman yaykuna punkunkunapis manami kannasu. Cerröjunkunapis pakir ushashqami jitaraykäyan. Mandamaqninsi reytapis y autoridäninsikunatapis juklä nacionkunamanmi prësu apakuyash. Tayta Diospa leyninkunata yachasiq runakunapis mananami kayannasu. Profëtankunatapis Tayta Dios mananami revelannasu.

Yod

Yod

¹⁰ Sióncho mayor runakunapis upälami pasacho jamaraykäyan. Seqaypa lakikurmi lütuta jatikurkur umankunaman alpata winakuyan. Jerusalén jipashkunapis pasaypa lakikuyashpanmi urkunkunatapis pasaman töpasiypa lätaraykäyan.

Caf

Caf

¹¹ Waqaylawanmi nawïpis sakaykanna. Qasqüpis fiyupami nanaykan. Marka mayïkuna nakaykäyaqta rikar shonqüpis nanayparaqmi lakikun. Chuchuykaq wamrakunapis cällicho mikanaypita wanuykäyaqta rikar pasaypami lakikü.

Lámed

Lámed

¹² Say wamrakunami mamankunata manakuyan ima mikuylatapis qarananpaq. Fiyupa malaqäyashpan mamankunapa melqaynilanchömi wanuykäyan. Guërracho pelyaq runakunanömi Jerusalén cällikunacho wanuykäyan.

Mem

Mem

¹³ Sión, pasaypa nakaptiki ¿imataraq nïman? Kayjinanpa nakaykashqaykita ¿imamanraq tinkusïman? ¿Imaman tinkusiypa parlaparraq qamta shoqäman? Juchu aywaqnöraqmi desgracia päsashushkanki. Sayno kaykaqta ¿piraq yanapäshunki?

Nun

Nun

¹⁴ <> nir profëtaykikuna wilayäshushqaykipis manami rasunpaypasu kash. Rasunpa profëta karqa jusalikuyashqaykita wanakuyänaykipaqmi wilayäshunkiman karqan. Jusalikuyta wanakuyaptikiqa manami juk nacionman prësu apayäshunkimansu karqan. Rasun kaqta wilayäshunaykipa trukan manakaqkunatami criyisiyäshushkanki.

Sámej

Sámej

¹⁵ Nänipa päsaqkunapis kushipäyäshurnikimi paqchipäyäshunki. Manakaqman churayäshushpayki shukar umankunatapis awirraqmi niyäshunki: <<¡Atatalay! ¿Taqaychi may markapitapis mas kuyaylapaq marka karqan? ¿Taqay markapitachi maysaychöpis runakuna kushikuyarqan?>>

Pe

Pe

¹⁶ Lapan chikishuqnikikunami washaykita rimayan. Kirunkunatapis uchurraq ajanapäyäshushpaykimi ninakuyan: <>.

Ayin

Ayin

¹⁷ Yarpashqannölami Tayta Dios castigamashkansi. Lapan nishqankunatami cumplish. Nawpapita pasa yarpashqannölami Jerusalénta mana kuyapaypa ushakäsish. Chikimaqninsikuna kushipämänansipaq y makincho sararämänansipaqmi kamakäsish.

Tsade

Tsade

¹⁸ Sión, yanapäshunaykipaq Tayta Diosta ruwakuy. Sakaypapis junaqpapis weqiki yakunöraq aywasun. Mana chawaypa nawikipis pukayashqanyaq waqay.

Qof

Qof

¹⁹ Sakaykunapapis makikita soqpakurkur Tayta Diosta ruwakuy. Lakikuykashqaykitapis lapan shonquykiwan waqapar wilapay. Mikanaypita wamraykikuna cällikunacho mana wanuyänanpaq makikita joqarkur ruwakuy.

Resh

Resh

²⁰ Tayta Dios, ima päsaykäyämashqantapis tantiyakuykulay. ¿Alisuraq kaykan kuyar ashmayashqan wawankunata warmikuna mikuyashqan? ¿Alisuraq kaykan cürakunata y profëtakunata templucho wanusiyashqan?

Sin/Shin

Sin/Shin

²¹ Wamrakunapis awkinkunapis cällikunachömi wanush jitaraykäyan. Maqtakunata y jipashkunatapis espädawanmi wanusishkanki. Seqaypa rabyashpaykimi mana kuyapaypa wanusishkanki.

Tav

Tav

²² Tukuy niraq nakaykuna chämunanpaqmi kamakäsishkanki. Fiestaman runakuna maysaypitapis shamuqnöraqmi nakaykuna shamush. Rabyakur castigaptiki manami juklaylapis kawaykar quëdashsu. Wamra kashqanpita ashmayashqätapis conträkunami chipyaq wanusiyash.