Josué 11 - Tayta Diospa Wilakuynin

Rey Jabínta y paypa yanapaqninkunata Josué vincishqan

¹ Israel runakuna sayno rurayashqanta musyaykurmi Hazor markapa mandaqnin rey Jabín propiuta kacharqan Madón markapa mandaqnin rey Jobabman, Simrón markapa mandaqnin reyman y Acsaf markapa mandaqnin reymanpis aywar Israel runakunata atacäsiyänanpaq.

² Saynöpis kacharqan norti kaqlä jalqakunacho kaykaq markakunapa mandaqnin reykunaman, Cineret qochapita sur kaqlä Arabá pampacho kaykaq markakunapa mandaqnin reykunaman, Sefelacho kaykaq markakunapa mandaqnin reykunaman y Dorlächo kaq markakunapa mandaqnin reykunamanpis. Dor markaqa inti jeqanan kaqlä costachömi kaykan.

³ Saynölami kacharqan Jordán mayu wak simpancho y kay simpancho taq cananeo runakunapa mandaqnin reykunaman, amorreo runakunaman, heteo runakunaman, ferezeo runakunaman, jalqakunacho taq jebuseo runakunaman y Mizpacho kaq Hermón punta chakincho taq heveo runakunamanpis.

⁴ Yanapäsiyänanpaq qayasiptinmi lapan reykuna aywayarqan soldädunkunawan, cawallunkunawan y guërrapaq rurasiyashqan carrëtankunawanpis. Lamar kuchuncho aqushanöraqmi yupaytapis mana atipaypaq say aywaq runakuna kayarqan.

⁵ Lapan say soldädukunami Israel runakunata atacayänanpaq Merom raqra nawpanman shuntakäyarqan.

⁶ Saymi Josuéta Tayta Dios nirqan: <>.

⁷ Sayno niptinmi Josuéqa soldädunkunawan Merom raqracho contrankunata elaqpita atacayarqan.

⁸ Atacayaptinmi Tayta Dios yanaparqan lapanta ushakäsiyänanpaq. Saymi qatikachäyarqan jatun Sidón markayaq y Misrefot-maimyaq. Saynöpis inti jeqamunan kaqläpa qatikachäyarqan Mizpa pampayaq. Sayno pelyar manami juklaylatapis kawaykaqta kachaykuyarqansu.

⁹ Tayta Dios nishqannölami contrankunapa cawallunkunapa ankunkunata kachariykasiyarqan y guërra carrëtankunatapis rupasirmi ushayarqan.

¹⁰ Saypita Josué kutiykamurnami Hazor markata atacar mandaq reyta espädawan wanusirqan. Nawpataqa Hazor markapa mandaqnin reypa munayninchömi wakin reykunapis kayarqan.

¹¹ Hazorcho taq runakunata lapanta wanuskasirmi markatapis rupasir ushayarqan.

¹² Saynölami wakin markakunamanpis yaykushpan mandaqnin reykunata Josué wanusir usharqan. Lapantapis rurarqan Tayta Diospa sirviqnin Moisés nishqannölami.

¹³ Lömakuna janancho sharkasishqan kaq markakunataqa manami rupasirqansu, sinöqa Hazorlatami rupasirqan.

¹⁴ Say markakunacho taq runakunataqa lapantami Israel runakuna espädawan wanusiyarqan. Nirkurmi uywankunata y lapan imaykantapis kikinkunapaq apakuyarqan.

Moisés nishqankunata Josué cumplishqan

¹⁵ Sirviqnin Moisésta Tayta Dios nishqannölami lapantapis Josué cumplirqan.

¹⁶ Saymi Neguevman, Gosén partiman, Sefelaman, Arabá pampaman y Israelcho lapan jalqakunaman Israel runakunawan Josué yaykuyarqan.

¹⁷ Saynöpis Seirlächo kaykaq Halac puntapita hasta Líbano pampacho kaykaq Baal-gadyaq yaykurmi lapan markakunapa mandaqnin reyninkunatapis wanusiyarqan. Baal-gadqa Hermón punta chakinchömi kaykan.

¹⁸ Paykunata vincinanpaqqa aska watami pelyayarqan.

¹⁹ Pactuta rurash karmi Gabaóncho taq heveo runakunataqa Josué wanusirqansu. Saypita kaqtaqa lapantami asular usharqan.

²⁰ Puntataqa saycho taq runakunapa shonqunkunata Tayta Diosmi chukruyäsirqan Israel runakunapa contran sharkur pelyayänanpaq. Sayno kaptinmi Moisésta Tayta Dios nishqannöla say runakunata mana kuyapaypa asulayarqan.

²¹ Saynölami anaceo runakunapa markankunatapis Josué chipyaq usharqan: Hebrónta, Debirta, Anabta, Israel jalqakunacho kaq markakunata y Judá jalqakunacho kaq markakunatapis.

²² Saynöpami intëru Israelcho anaceo runakuna chipyaq ushakäyarqan. Gaza, Gat y Asdod markakunalachönami anaceo runakuna kayarqan.

²³ Moisésta Tayta Dios nishqannölami lapan markakunata y chakrakunata Josué shuntaykur Israel trïbukunata aypurqan. Saypitaqa guërra manana kaptin Israel runakuna jawkalanami kawakuyarqan.