Joel 1 - Tayta Diospa Wilakuynin

Chakracho mikuykunata chukluskuna ushayashqan

¹ Tayta Dios revelashqantami Petuelpa surin Joel wilakur nirqan:

² Mayor runakuna, kanan nishqäta shumaq wiyayämay. Judá nacioncho taq runakunapis, kanan wilakushqäta wiyayämay. Kay castïgutano ¿imaylapis rikayashkankiku? Taytaykikuna kawayashqan wisan kayno mansariypaq castïgu ¿imaylaqa kashsuraq?

³ Kay castïgu imano kashqantapis surikikunata wilapäyanki. Surikikunapis surinkunata wilapäyanqa. Saynöla wilkaykikunapis surinkunata wilapäyanqa.

⁴ Jatusaq chukluskuna katuyashqantapis akapa chukluskunami ushakurkuyash. Akapa chukluskunapita qeshpiqlantapis malumyakunami mikukurkuyash. Saypita pusuqlantapis shiwrikunami ushakurkuyash.

⁵ Upyalaman churakash runakuna, tantiyakuyay. Shinkashqaykipita kachakarkur waqayay. Chukluskuna üvata ushaptin upyayänaykipaq vïnupis manami kannasu.

⁶ Yupaytapis mana atipaypaq soldädukunanömi say chukluskuna markansiman juntaykayämush. Kirunkunapis waqunkunapis leonpanöraqmi kaykan.

⁷ Lapan üvakunatapis chakranpami ushayash. Hïgustapis pasaypami ushayash. Yürantapis rämankunatapis tululantami kachaykuyash.

⁸ Majasakänanpaq promitishqan maqta wanuykuptin doncëlla jipash lütu mödanata jatikurkur waqashqanno iksuypa iksur waqayay.

⁹ Cürakunapis waqakuykäyan saki mikuy ofrendata ni vïnutapis Tayta Diospa templunman pipis manana apaptinmi.

¹⁰ Trïgupis manami kannasu. Üvakunapis sakishqami kaykäyan. Olïvu jachakunapis ushakashqami kaykäyan. Lapan chakrakunapis pasaypa qaralanami kaykäyan.

¹¹ Chakracho aruqkuna, üvata cosechaqkuna, makilaykikunata soqpakurkur waqayay. Trïgutapis cebädatapis walälami muruyashkanki.

¹² Üvapa yürankunapis sakikäkuyashnami. Hïguskunapis ushakäyashnami. Granädakunapis, palmërakunapis, manzänapa yürankunapis y lapan plantakunapis sakishnami kaykäyan. Saymi runakunapis pasaypa mansakash kaykäyan.

¹³ Tayta Diosta altarcho sirviq cürakuna, qachqa mödanata jatikurkur waqayay. Saki mikuypis ni vïnupis Tayta Diosninsipa wayinman apayämunanpaq mananami kannasu.

¹⁴ Mayor runakunata y común runakunata Tayta Diosninsipa wayinman shuntakäyänanpaq qayasiyay. Tayta Diosta manakur lapayki ayunayay.

¹⁵ ¡Tayta Dios juzganan junaq chaykämunnami! Say junaq chämuptin ¡imanöraq runa nakaykuyälanqa! Say junaqmi lapanpaq munayyuq Tayta Dios saysika runakunata ushakäsinqa.

¹⁶ Mikuyninsi ushakaptin pasaypa muchuychönami kaykansi. Saymi Tayta Diosninsipa templunman aywarpis kushikunsinasu.

¹⁷ Murushqansi trïgupis manami winamushnasu. Mikuy pirwakuna wayikunachöpis wayralami tumaykan.

¹⁸ Qewata maychöpis mana tarirmi wäkakunapis pasaypa kuyapaypaq waqaykäyan. Saynölami uyshakunapis cabrakunapis wanur ushakaykäyan.

¹⁹ ¡Tayta Dios, yanapaykayälämay! Jirkacho qewatapis y munti jachakunatapis ninami rupar ushash.

²⁰ Raqrapa aywaq yakupis sakikäkushqami. Sunyaq jirkacho qewakunatapis ninami ushash. Saymi jirka uywakunapis waqapaykäyäshunki.