Isaías 64 - Tayta Diospa Wilakuynin

¹ 1 (63.19b) ¡Ima aliraq kaykunman jana pasata kichaskir shamuptiki! Shamuptikiqa jirkakunapis pasaypami suksukyäyanman.

² 2 (1) Shatakunata nina rupar ushashqanno y manka timpushqannömi shamuptiki nacionkunapis suksukyäyanman. Munayyuq kashqaykitami contraykikunapis tantiyayanman.

³ 3 (2) Unay urämushpayki fiyupa mansariypaq kaqkunatami rurarqayki. Sayno ruraptikimi jirkakunapis fiyupa suksukyäyarqan.

⁴ 4 (3) Manami pipis wiyashsu ni rikashsu qamno munayyuq Dios kashqantaqa. Qamman yärakamuqkuna raykumi espantaypaq kaqkunata ruranki.

⁵ 5 (4) Munashqaykino kushish kawaqkunata yanapankimi. Sayno kaptikipis manami munashqaykinösu kawaykäyä. Unaypita pasa kananyaqpis jusalikuylacho kawayaptïmi fiyupa rabyakurkushkanki. Saynöla kawarqa ¿imanöparaq salvakuyäman?

⁶ 6 (5) Noqakunaqa qanrano melanaypaqmi kaykäyä. Alita rurayashqäpis warmipa killa qeshyanwan qanratash ratashnömi kaykan. Lapäkunapis qarwashtaykar rapra ushakaqnömi ushakaykäyä. Imaykatapis wayra apaqnömi mana ali yarpaynïkuna jusalikuyman apaykäyäman.

⁷ 7 (6) Manami pipis manakayämushunkisu ni yärakayämushunkisu. Saymi noqakunapita pakakushkanki. Jusalikuylacho kawayaptïmi kachariykayämashkanki.

⁸ 8 (7) Tayta Dios, imano kash kayaptïpis Taytäkunami kaykanki. Noqakunaqa mitunölami kaykäyä. Qamnami manka ruraqno kaykanki. Lapäkunapis makiki rurashlanmi kaykäyä.

⁹ 9 (8) Tayta Dios, sayjinanpanaqa amana ajanaykuynasu ari. Jusalikuyashqätapis amana yarparaykuynasu. Kuyashqayki runakuna kaykäyaptïqa kuyapaykayälämay.

¹⁰ 10 (9) Santu markaykikunatapis sunyäsiypami ushakäsiyash. Sión lömata ushakäsiyaptin Jerusalén markapis raqälanami rikakush.

¹¹ 11 (10) Unay ayllükuna adorayäshushqayki kuyaylapaq templuykitapis chipyaqmi rupasiyash. Wakin kuyaylapaq kaqkunatapis lapantami ushakäsiyash.

¹² 12 (11) Tayta Dios, sayno rurayashqanta rikaykarqa ¿manasuraq paykunata castigankiman? ¿Manasuraq yanapäyämankiman? ¡Imayyaqraq fiyupa lakikasiyämanki!