Isaías 59 - Tayta Diospa Wilakuynin

Jusalikuq kashqansi

¹ Ama yarpäyaysu salvayäshunaykipaq Tayta Dios munayniynaq kashqanta. Payqa manami upayashsu kaykan manakuyashqaykita mana wiyayäshunaykipaq.

² Saypa trukanqa jusaykikunami imayka jatun tapianöpis paypita rakiykäyäshunki. Saymi jusalikuyashqaykipita Tayta Diosninsi rikäriyäshunkinasu. Manakuyaptikipis manami wiyayäshunkinasu.

³ Wanusikuq kayaptikimi makikikunapis yawarlana kaykan. Dëduykikunapis runa wanusiqmi kaykan. Shimikikunapis pasaypa lulatami parlan. Qalluykikunapis mana alilatami riman.

⁴ Manami pipis alita rurananpaq yarpachakunsu. Demandakuqpis manami rasun kaqtaqa parlansu. Autoridäkunapis lulakuqtami mas criyiyan. Manami pipis rasun kaqtaqa parlansu. Jusalikuyman churakashqami kaykäyan.

⁵ Likanta pachka awaqno y culebrapa runtunta oqlaqnömi kaykäyan. Say runtukunata mikuq kaqqa wanunmi. Runtuta pakiptinqa culebrakunami yarqayämun.

⁶ Mödanata rurayänanpaq pachkapa likan mana välishqannömi say runakuna lapan rurayashqanpis mana ali kaykan. Mana ali ruraykunalami paykunata gustan.

⁷ Saymi mana alita rurayänanpaq ras cörriyan. Jusaynaq runata wanusiyänanpaqpis shiwyaraylami aywayan. Mana alita rurayänalanpaqmi yarpachakuykäyan. Maypa aywarpis lutankunata ruralarmi puriyan.

⁸ Ali kaway imano kashqantapis manami musyayansu. Manami imatapis alitaqa rurayansu. Paykuna kawayashqanno kawarqa manami pipis ali kawayta tarinqasu.

⁹ Saymi salvakuyta munarpis kamäpakunsisu. Runa mayinsiwan ali kawaytapis puëdinsisu. Asikyayta shuyarashqapis sakaqlami kaykan. Aksichöno kawayta munarpis sakaychönölami kawaykansi.

¹⁰ Qaprakuna perqata yataylapa puriqnömi kawaykansi. Nawiynaq runa lamkaylapa puriqnömi kaykansi. Pulan junaqpis sakaypa tinkakaykaqnömi kaykansi. Kawaykarpis wanushnömi kaykansi.

¹¹ Pasaypa lakikur ukumaryanömi waqaykansi. Paluma waqaqnömi lakish ataykansi. Ali kawayta shuyakushqapis manami chämunsu. Salvakuyta munarpis manami salvakunsisu.

¹² Imaypis jusalikurmi Tayta Diosta rabyanäsinsi. Lapan rurashqansipis jusayuq kashqansitami wilakun. Jusalikuyta kachariyta mana kamäpakurmi musyansi jusayuq kashqansita.

¹³ Tayta Diosninsita imapaqpis mana cuentarmi nishqankunata cäsunsisu. Lutanta ruranansipaq y runa mayinsita engañanalansipaqmi wilanakunsi.

¹⁴ Juezkunapis ali runapa contranmi rikakuyan. Alita rurananpaq manami pipis yarpannasu. Rasuntanöraq parlarmi pïmaytapis criyirasiyan. Pïmaypis suwapänakularmi kawayan.

¹⁵ Lapanpis lulakuyanmi. Ali runakunatapis carcilmanmi wichqayan. Sayta rikarmi Tayta Dios fiyupa rabyanan.

¹⁶ Mana alikunata rurayaptin pipis mana michaqta rikarmi Tayta Dios fiyupa rabyakun. Saymi nakaqkunapa favornin kikin Tayta Dios sharkush.

¹⁷ Pelyacho sapakuna chalëcutami jatikush. Say chalëcuqa ali rurayninkunami kaykan. Saynöpis umanman jatikushqan cascumi salvación kaykan. Runa mayinta nakasiqkunata castigananpaq fiyupa rabyarmi yarqush.

¹⁸ Lutanta rurayashqanman tupumi llëvasinqa. Fiyupa rabyakur contrankunata merëcishqanman tupumi castiganqa. Lamar kuchun markakunacho taqkunatapis castiganqami.

¹⁹ Jakash mayu bötiypa bötir shamuqnöraqmi castigananpaq Tayta Dios shamunqa. Saymi inti jeqamunanpita inti jeqananyaq Tayta Diosta mansapakuyanqa.

²⁰ Tayta Diosmi nin: <>.

²¹ Tayta Diosmi nin: < >>.