Hechos 14 - Tayta Diospa Wilakuynin

Iconio markacho wilakuyashqan

¹ Saypitanami Iconio markacho Pabluwan Bernabé sinagögaman yaykuyarqan. Shonqunkunaman chaqpaq wilapäyaptinmi Israel runakuna y mana Israel runakunapis Jesucristuman yärakuyarqan.

² Mana yärakuq kaq Israel runakunami isanqa wakin mana Israel runakunata shimita qoyarqan Jesúsman yärakuqkunapa contran sharkuyänanpaq.

³ Contran sharkuyaptinpis Pabluwan Bernabé Tayta Diosman yärakur aska junaqmi mana mansakuypa wilakuyarqan. Salvamänansipaq kaq wilakuynin rasunpaypa kashqanta musyayänanpaqmi Tayta Dios paykunata yanaparqan milagrukunata rurayänanpaqpis.

⁴ Sayno kaptinpis say markacho taq runakuna kikinpura apänakuyashpan wakinqa Israel runakunapa favornin sharkuyarqan y wakinnami apostolkunapa favornin sharkuyarqan.

⁵ Saymi Israel runakuna y mana Israel runakunapis autoridäkunawan wilanakuyarqan apostolkunata samqaypa wanusiyänanpaq.

⁶ Sayta musyaykurmi Pabluwan Bernabé qeshpikuyarqan Listraman, Derbiman y Licaoniacho kaq wakin markakunamanpis.

⁷ Say markakunachönami Tayta Diospa ali wilakuyninta wilakuyarqan.

Listra markacho Pabluta samqayashqan

⁸ Listra markachömi yurishqanpita pasa mana puriq weqru runa karqan. Paymi jamaraykarqan

⁹ Pablo parlashqankunata wiyar. Pablo payta rikärir aliyänanpaq Tayta Diosman yärakuykashqanta tantiyarmi

¹⁰ sinchipa nirqan: <<¡Sharkur shumaq ichiy!>> Sayno niptinmi jukla ichirkushpan puriyta qalaykurqan.

¹¹ Sayta rikaykurmi runakuna kikinkunapa idiömancho niyarqan: <<¡Dioskunami runa tukular noqansiman shayämush!>>

¹² Saymi Bernabéta niyarqan Zeus kashqanta. Y Pablutana wilakuq kaptin Hermes kashqanta niyarqan.

¹³ Say marka yaykunachömi Zeus niyashqan diosta adorakuyänan templu karqan. Apostolkunata adorayänanpaq törukunata pishtar rupasiyta munayaptinmi say templucho sirviq cüra waytan walqash törukunata marka punkuman qatirqan.

¹⁴ Sayta tantiyaskirmi apóstol Pabluwan apóstol Bernabé mödanankunata rachiriykuyashpan runakuna kaqman cörriyla aywaykur niyarqan:

¹⁵ <<¡Taytakuna, ama sayta rurayaysu! Noqakunapis qamkunano runalami kayä. Shayämushkä manakaq dioskunata kacharir imayyaqpis kawaq Tayta Diostana adorayänaykipaq tantiyasiqmi. Paymi jana pasata, kay pasata, lamarta y lapan imaykatapis kamash.

¹⁶ Nawpataqa kikinkuna munayashqannöla kawakuyänanpaqmi runakunata Tayta Dios kachapariykurqan.

¹⁷ Sayno kachaparirpis pïmaytami tantiyasin rasunpaypa kaq Dios kashqanta y kuyakuq kashqanta. Paymi mikuynikikuna ali wayunanpaq tamyatapis tamyasimun y kushish kawanansipaq mikuytapis kamaripämansi>>.

¹⁸ Sayno nir tantiyasiptinpis Pabluta y Bernabéta mana adorayänanpaq ajataraqmi tantiyayarqan.

¹⁹ Saypitanami apostolkunata chikiq Israel runakuna Antioquíapita y Iconiupitapis Listraman chäyarqan. Pablupa contran sharkuyänanpaq shimita qoyaptinmi runakuna Pabluta pitiqpaq samqayarqan. Nirkurmi wanushna kashqanta yarpar qarachash apaykur marka waqtanman jitaskiyarqan.

²⁰ Saycho discïpulukuna juntaparaykäyaptin kawarirkamurmi markaman Pablo kutirqan. Saypita warayninnami Derbe markaman Bernabéwan aywakuyarqan.

Pabluwan Bernabé Siriaman kutiyashqan

²¹ Derbiman chaykur ali wilakuyta wilakuyaptinmi aska runakuna Jesúsman yärakuyashpan discïpulunkuna rikakuyarqan. Saypitanami kutiyarqan Listra, Iconio y Antioquía markakunaman.

²² Say markakunaman chaykurmi Jesúspa discïpulunkunata mana ajayaypa yärakuyänanpaq shakyäsir niyarqan: <>.

²³ Saynöpis wawqi panikunata rikayänanpaqmi cada iglesiacho mayor wawqikunata churayarqan. Nirkurnami ayunar y Tayta Diosta manakur yärakuyashqan Señor Jesucristupa makinman kachakuyarqan.

²⁴ Pisidia provinciapita kutirnami Panfilia provinciamanna chäyarqan.

²⁵ Perge markachöpis Tayta Diospa wilakuyninta wilakuskirmi Atalia markaman aywayarqan.

²⁶ Nirkurmi büquiwan Antioquíaman kutikuyarqan. Antioquíapitami puntatapis wawqi panikuna paykunata kachash kayarqan wilakur puriyänanpaq. Kacharmi Tayta Diosta manakuyarqan yanapaykunanpaq.

²⁷ Antioquíaman kutirnami wawqi panikuna shuntakäyaptin wilapäyarqan Tayta Dios ali yanapashqanta. Saynöpis wilapäyarqan mana Israel runakunapis Jesucristuman yärakuyänanpaq Tayta Dios kamakäsishqanta.

²⁸ Pabluwan Bernabé saycho unaylami discïpulukunawan täyarqan.