Hebreos 9 - Tayta Diospa Wilakuynin

Nawpa kaq pactu imano kashqanpis

¹ Nawpa kaq pactu kashqan wisanmi runakunata Tayta Dios tantiyasirqan Sagrädu Tolduta imano rurayänanpaq kashqanta y saycho payta imano adorayänanpaq kashqantapis.

² Saymi Sagrädu Tolduta rurayarqan ishkay cuartuyuqta. Punta kaq cuartuchömi karqan candelabru, Tayta Diospaq churayashqan tanta y tanta churakuna mësapis. Say cuartupa jutinmi karqan Lugar Santu.

³ Ruri kaq cuartupa jutinmi karqan Lugar Santïsimu. Say ishkay cuartukunaqa rakta cortïnawanmi rakirarqan.

⁴ Lugar Santïsimuchömi karqan inciensuwan qoshnisiyänanpaq qoripita rurash altar. Saynöpis saychömi karqan Pactu Babul. Say babulmi jananpa rurinpa qoriwan enchapash karqan. Saychömi winararqan qoripita rurash tazón. Say tazonchömi maná nishqan mikuy churararqan. Saynöpis say babulchömi winararqan Aarónpa chinkimuq tukrun y parara rumikunacho qelqaraykaq pactupis.

⁵ Say babulpa sapanan jananchönami kaykäyarqan qoripita rurash chipipiykaq querubinkuna. Say querubinkunami babul janancho riprankuna mashtash kaykäyarqan. Maspis kaykanraqmi saykunapita tantiyasinäpaq.

⁶ Sagrädu Tolduta ruraskiyaptinnami leykuna nishqanno lapanta rurayänanpaq punta kaq cuartuman cürakuna waran waran yaykuyaq.

⁷ Lugar Santïsimumanmi isanqa mandaq cürala watacho juk kuti yaykuq. Uywapa yawarninta apakurkurmi yaykuq kikinpa jusanpita y runakunapis mana tantiyakuypa jusalikuyashqanpita perdonta manakunanpaq.

⁸ Lugar Santïsimuman mandaq cürala yaykuptinmi Espíritu Santu tantiyasimansi Sagrädu Toldu kashqanyaqqa Tayta Diospa nawpanman mana chänansipaq kashqanta.

⁹ Sayno kaptinqa shumaq tantiyakushun: Saki mikuy ofrendakunata y uywakunata altarcho cürakuna rupasiyaptinpis manami saykunawanqa runakuna perdonta tariyansu.

¹⁰ Nawpa kaq pactuchöqa qelqaraykan imata mikunansipaq imata mana mikunansipaqpis, imata upunansipaq imata mana upunansipaqpis y jukno jukno purificakunansipaqpis. Saykunataqa runakuna cumpliyänan karqan Tayta Dios mushuq pactuta rurashqanyaqlami.

Mushuq pactu imano kashqanpis

¹¹ Mushuq pactuchöqa Jesucristunami mandaq cüra kaykan. Payqa manami kay pasacho templumansu yaykurqan, sinöqa kikin Tayta Dios rurashqan jana pasacho kaykaq templumanmi.

¹² Jana pasacho kaykaq Lugar Santïsimuman yaykunanpaqqa manami kay pasacho cürakuna rurayashqanno chïvupa y becërrupa yawarninta aparkur cada watasu yaykurqan, sinöqa kikinpa yawarninta jicharmi juk kutila yaykurqan. Saynöpami rantimashkansi imayyaqpis salvash kanansipaq.

¹³ Törukunapa y chïvukunapa yawarninwan runakunata saqsupäyaptin y ternërata rupasiyashqan uchpata yakuman winarkur saqsupäyaptinmi janalanpa runakuna purificash rikakuyaq.

¹⁴ Jesucristo yawarninta cruzcho jichash kaptin manami janalansipasu purificash kaykansi, sinöqa manakaqkunata rurashqansipita shonqunsipis purificashnami kaykan. Sayno purificash karmi imayyaqpis kawaq Tayta Diosta sirvinsi. Jesucristuqa Espíritu Santupa munayninwan Tayta Dios munashqan sacrificiuno kar noqansi rayku wanuptinmi sayno purificash kaykansi.

¹⁵ Saymi Jesucristo garantiansi kaykan Tayta Dios mushuq pactuta cumplinanpaq. Paymi wanurqan nawpa kaq pactuta mana cumplishqansipita perdonash kanansipaq. Saynöpami lapanpis Tayta Dios qayashqan kaqkunaqa promitishqan herenciata chaskiyanqa.

¹⁶ Tayta Dios rurashqan pactuqa testamentunömi kaykan. Testamentupis välin testamentu rurasiq runa wanuptinraqmi.

¹⁷ Testamentu rurasiq manaraq wanuptinqa testamentu manami välinraqsu. Wanuskiptinnami isanqa välin.

¹⁸ Saynölami punta kaq pactupis välinanpaqqa uywakunapa yawarninta jichasiyarqan.

¹⁹ Saymi runakuna shuntakäyaptin leykunacho lapan mandamientukunata Moisés liyiparkur becërrukunapa y chïvukunapa yawarninta shuntarqan. Say yawarman yakuta yaparkurmi hisöpu jachapa rämankunata puka jïluwan juk qeruman wataparqan. Sayta yawarman jatirpurmi qelqaraykaq leykunata y lapan runakunatapis saqsuparqan.

²⁰ Nirkurmi nirqan: <>.

²¹ Saynölami Sagrädu Toldutapis y lapan manëjunkunatapis say yawarlawan Moisés saqsuparqan.

²² Moisés qelqashqan leykunachöqa nikan purificash kananpaqqa yawarwanraq imapis saqsupash kananpaqmi. Yawarta mana jichaptinqa manami runakunata jusankunapita Tayta Dios perdonansu.

²³ Saymi jana pasacho kaykaq templu niraq Sagrädu Toldutapis y lapan manëjunkunatapis uywapa yawarninwanraq purificarqan. Jana pasacho kaq templutami isanqa mas väliq yawarwan purificarqan.

Jesucristo wanushqanpita Tayta Dios perdonamashqansi

²⁴ Jana pasacho kaq templu niraq kaptinpis Jesucristo manami runa rurashqan templumansu yaykurqan, sinöqa jana pasacho kaykaq templumanmi. Kananqa Tayta Diospa nawpanchömi noqansipaq manakuykan.

²⁵ Sayman yaykunanpaq juk kutilami kikinpa yawarninta jichar wanurqan. Kay pasacho mandaq cüraqa uywakunapa yawarninta apakurkur wata watami Lugar Santïsimuman yaykun.

²⁶ Paykunanöla rurarqa kay pasata kamashqanpita kananyaqqa Jesucristo ayka kutishi wanunman karqan. Isanqa aska kuti wanunanpa trukan juk kutilami wanurqan. Jusansipita perdonash kanansipaqmi kay ultimu tiempucho sacrificiuno kikin wanurqan.

²⁷ Saynölami lapan runakunapis juk kutila wanuyan y saypitaqa juzgashnami kayanqa.

²⁸ Jesucristupis juk kutilami askaq runakunapa jusankunapita wanurqan. Kay pasaman kutimurqa manami runakunapa jusankunapita yapay wanunanpaqsu kutimunqa, sinöqa payta shuyakuqkunata salvananpaqmi.