Hebreos 8 - Tayta Diospa Wilakuynin

Mushuq pactuta Tayta Dios rurashqan

¹ Shumaq tantiyakuyay: Mandaq cüra Jesucristo lapanpaq munayyuq Tayta Diospa trönun aluq kaq nawpanchömi jamaraykan.

² Kananqa jana pasacho kaq Sagrädu Tolduchömi mandaq cüra kaykan. Say toldutaqa manami runakunasu sharkasiyash, sinöqa kikin Tayta Diosmi.

³ Kay pasacho mandaq cüra saki mikuy ofrendakunata y sacrificiukunata Tayta Diospaq apashqannömi mandaq cüra Jesucristupis noqansi rayku wanur Tayta Diospaq sacrificiuno karqan.

⁴ Kay pasalacho karqa Jesucristo manami cüra kanmansu karqan. Kay pasachöqa Moisés qelqashqan leykunacho nishqanno maynami cürakuna kaykäyan ofrendakunata y sacrificiukunata altarcho rupasiyänanpaq.

⁵ Paykunaqa jana pasacho kaykaq Sagrädu Toldu niraqta rurayashlanchömi Tayta Diosta sirviyan. Sayta musyansi Moisésta Tayta Dios kayno nish kaptinmi: <>. Payta sayno nirqan Sagrädu Tolduta sharkasinanpaq rikasirmi.

⁶ Jesucristumi isanqa kay pasacho kaq cürakuna Tayta Diosta sirviyashqanpitapis mas ali sirviykan. Saynölami favorninsi rurashqan mushuq pactupis nawpa kaq pactupita mas ali kaykan. Say mushuq pactuchömi mas ali kaqkunata Tayta Dios promitimansi.

⁷ Nawpa kaq pactucho imapis mana pishiptinqa manami juk pactuta Tayta Dios ruranmansu karqan.

⁸ Isanqa nawpa kaq pactuta runakuna cumpliyta mana kamäpakuyaptinmi Tayta Dios nirqan: <

⁹ Say pactuqa manami unay ayllunkunata Egiptupita jorqamur rurashqä pactunösu kanqa. Unay ayllunkuna say pactuta mana cumpliyaptinmi paykunata cäsupashkänasu. Noqa Tayta Diosmi sayno nï.

¹⁰ Say junaqkuna päsarkuptinmi Israel runakunawan pactuta rurashaq. Sayno rurarmi leynïkunata yarpayninkunaman churashaq. Shonqunkunamanpis leynïkunata qelqashaq. Paykunapa Diosninmi kashaq. Paykunanami kuyashqä runakuna kayanqa. Noqa Tayta Diosmi sayno nï.

¹¹ Say wisanqa pobripis rïcupis lapanmi reqiyämanqa. Saymi reqimänanpaq runa mayintapis ni wawqintapis pipis yäsinqanasu.

¹² Paykunapa lapan jusankunatapis perdonashaqmi. Imata jusalikuyashqantapis manami yarparäshaqnasu>>.

¹³ Mushuq pactupita sayno parlarmi Tayta Dios tantiyasimansi nawpa kaq pactu rukuyashna kashqanta. Rukuyarnaqa ushakanqami.