Hebreos 7 - Tayta Diospa Wilakuynin

Melquisedec pï kashqantapis tantiyasishqan

¹ Melquisedec karqan Salem markapa mandaqnin rey y poderyuq Tayta Diosta sirviq cürami. Guërracho reykunata vincishqanpita Abraham kutiykämuptinmi Melquisedec taripar Abrahamta bendicionta qoshpan Tayta Diosta manakurqan.

² Abrahamnami guërracho vincir lapan shuntamushqankunapita Melquisedecta diezmuta qoykurqan. Melquisedec ninanqa <> ninanmi. Salem ninanqa <> ninanmi. Saymi Melquisedecqa ali kawayta tarisiq rey karqan.

³ Manami musyakansu Melquisedec mayqan ayllu kashqan ni maman ni taytan pï kashqanpis. Saynöpis manami musyakansu imay yurishqan ni imay wanushqanpis. Saymi Diospa Surinno imayyaqpis cüra kaykan.

Abrahampita Melquisedec mas munayyuq kashqan

⁴ Melquisedecman diezmuta taytansi Abraham apash kaptinmi tantiyakunsi Abrahampitapis Melquisedec mas munayyuq kashqanta.

⁵ Leví trïbu cürakunaqa Moisés qelqashqan leykunacho nishqannömi Israel mayinkunapita diezmuta chaskiyan. Sayno chaskiyan Israel mayinkuna paykunanöla Abrahampita miraq kaptinpis.

⁶ Melquisedecmi isanqa Leví trïbu mana kaykarpis Abraham apashqan diezmuta chaskirqan. Diezmuta chaskirkurmi Abrahamta bendicionta qoshpan Tayta Diosta manakurqan. Tayta Dios promitishqanta Abraham chaskish kaptinpis payta Melquisedec bendicionta qoptinmi Abrahampita mas munayyuq kashqanta musyansi.

⁷ Musyashqansinöpis bendicionta qoq kaqmi bendicionta chaskiqpitapis mas munayyuq kaykan.

Leví trïbu cürakunapita Melquisedec mas munayyuq kashqan

⁸ Saynöpis Tayta Diospa palabrancho manami imaypis ninsu Melquisedec wanushqanta. Diezmuta chaskiq cürakunami isanqa wanukuqla kaykäyan. Sayno kaptinmi tantiyansi Leví trïbu cürakunapitapis Melquisedec mas munayyuq kashqanta.

⁹ Melquisedecta Abraham diezmuta qoptinmi Leví trïbu cürakunapis Melquisedecta diezmuta entregaqno kayarqan.

¹⁰ Leví trïbu cürakuna Abrahampita miraq kayashpanmi manaraq yurirpis Melquisedecta entregaqno kayarqan. Saymi Melquisedecta Abraham diezmuta qoptin tantiyansi Leví trïbu cürakunapitapis Melquisedec mas munayyuq kashqanta.

Melquisedecno Jesucristo mandaq cüra kashqan

¹¹ Moisés qelqashqan leykunacho nishqannöla sacrificiuta cürakuna rupasiyashqanpita salvación kaptinqa Jesucristuta cüra kananpaq Tayta Dios manami churanmansu karqan. Cüra kananpaq churaptinmi Jesucristo Aarónnösu cüra kaykan, sinöqa Melquisedecnömi.

¹² Cüra kayta Tayta Dios sayno trukasirmi Moisés qelqashqan leykunatapis trukasirqan.

¹³ Cüra kananpaqqa Jesucristo manami Leví trïbupitasu karqan, sinöqa juk trïbupitami. Paypa trïbun kaqpitaqa manami pipis altarcho sirvinanpaq cüra karqansu.

¹⁴ Señor Jesucristuqa Judá trïbupitami yurish. Say trïbupita cüra kananpaq kaqtaqa Moisés qelqashqan leykunacho manami imatapis ninsu.

¹⁵ Moisés qelqashqan leykunata Tayta Dios trukasishqanta musyansi Melquisedec cüra kashqanno Jesucristupis cüra kananpaq shamush kaptinmi.

¹⁶ Leví trïbupita mana kaptinpis cüra kananpaq payta Tayta Dios churarqan imayyaqpis kawaq kaptinmi.

¹⁷ Paypitami Tayta Diospa palabrancho kayno qelqaraykan: <>.

¹⁸ Mandaq cüra kananpaq Jesucristuta churarmi leycho cürakunapaq nishqankunata Tayta Dios trukasirqan. Say leykuna niyashqanno Leví trïbu cürakuna cumpliyaptinpis manami say leykunachösu runakuna perdonta tariyan.

¹⁹ Say leykunaqa manami pitapis salvansu. Jesucristumi isanqa salvamashpansi Tayta Diospa nawpanman chäsimansi.

Jesucristo imayyaqpis cüra kananpaq Tayta Dios jurashqan

²⁰ Jesucristuta imayyaqpis cüra kananpaq churarmi Tayta Dios juraypa promitirqan. Leví trïbu cürakunata churarqa manami juraypasu promitirqan.

²¹ Jesucristutami isanqa kayno nir promitirqan: <. Sayno promitishushqaykita cumplinanpaqmi jurarqan. Promitishqantaqa manami qonqanqasu>>.

²² Sayno nir jurash kaptinmi Tayta Dios mushuq pactuta cumplinanpaq Jesús garantiansi kaykan. Mushuq pactuqa mas alimi kaykan Israel runakunawan punta kaq rurashqan pactupitapis.

²³ Punta kaq pactuchöqa mandaq cüra wanuptin juknami trukan yaykuq.

²⁴ Jesucristumi isanqa mana ushakaq kar imayyaqpis mandaq cüra kaykan.

²⁵ Saymi payman yärakuqkunata imaypis salvan Tayta Diospa nawpanman chäyänanpaq. Saynöpis salvash kaqkunapaqmi Tayta Diosta imaypis manakuykan.

²⁶ Jesucristo mandaq cüra kaptin kushikunsimi. Paymi jusaynaq santu kar Tayta Dios munashqanno kawarqan. Jusalikur kawaq runakunawan purirpis manami imaypis jusalikurqansu. Jana pasachöpis lapanpita mas respitashqami kaykan.

²⁷ Kay pasacho mandaq cürakunaqa kikinkunapa y wakin runakunapa jusankuna perdonash kananpaqmi waran waran uywata pishtarkur altarcho rupasiyan. Jesucristumi isanqa jusansipita perdonash kanansipaq juk kutila kikin wanurqan.

²⁸ Nawpataqa Moisés qelqashqan leykunacho nishqanno ushakaq y jusayuq runakunalami mandaq cürakuna kayarqan. Saypitanami Tayta Dios jurashpan kikinpa Surinta mandaq cüra kananpaq churarqan. Pay manami ushakaq ni jusayuq runasu kaykan, sinöqa imayyaqpis kawaq y jusaynaq mandaq cürami.