Hebreos 6 - Tayta Diospa Wilakuynin

¹ Jesucristupita yachakurqa ama qalaykunan kaq yachasikuykunalataqa yachakushunsu, sinöqa qalaykunanpita ushananyaq shumaq yachakushun. Saynöpami wamranöla kanansipa trukan poqukash runanöna kashun. Manami yaparir yaparir yachakushwansu Jesucristuta chaskikur jusalikuykunata wanakunansipaq kashlanta, Tayta Diosman yärakunansipaq kashlanta,

² bautizakunansipaq kashlanta, jukpa umanman makinsita churanansipaq kashlanta, wanushkuna kawariyämunanpaq kashlanta y kay pasa ushakaptin Tayta Dios runakunata juzgananpaq kashlantaqa.

³ Tayta Dios yanapämaptinsiqa mas juk yachasikuykunatapis yachakushunmi.

⁴ Jesucristuman yärakushna kaykar, Tayta Diospa kuyakuyninta musyaykar, Espíritu Santuta chaskikushna kaykar,

⁵ Tayta Diospa wilakuyninta wiyakushna kaykar y juk vïdapa poderninkunata rikashna kaykar

⁶ Tayta Diosta ñëgaptinqa Tayta Diosman yapay kutisiyta manami kamäpakunsisu. Jesucristuta yapay crucificaqno say runa kaptinmi wakin runakunapis Jesucristuta manakaqman churayan.

⁷ Tamyawan ushmash chakraman murupakuyaptinqa alimi wayun. Say chakraqa Tayta Diospa bendicionnintami chaskin.

⁸ Kashayuq mana ali jachakunala winashqan chakrami isanqa alisu. Sayno chakrataqa maldicionashpan rupaykasiyanmi.

⁹ Kuyay wawqi panikuna, sayno nirpis manami mana ali chakrano kayashqaykitasu yarpäyä. Saypa trukanqa yarpäyä salvashna kayashpayki Tayta Dios munashqanno kawayänaykipaq kashqantami.

¹⁰ Tayta Diosqa manami qonqanqasu payta kuyar yärakuq mayikikunata yanapaykäyashqaykita.

¹¹ Jukniki juknikipis wanuyashqaykiyaq sayno kawayänaykitami munayä. Sayno kawarqa Tayta Dios shuyaraykäsiyäshushqaykita chaskiyankimi.

¹² Saynöpis sayno kawarqa manami qelanäyankipaqsu, saypa trukanqa Tayta Diosman wakin yärakuqkuna kawayashqannömi qamkunapis payman yärakur imaypis kawayankipaq. Sayno kawarqa pay promitishqankunatami chaskiyanki.

Tayta Dios promitishqanta cumplishqan

¹³ Abrahamta promitir Tayta Dios kikinpa jutinchömi cumplinanpaq jurarqan. Kikinpa jutincho sayno jurarqan paypita mas munayyuq pipis mana kaptinmi.

¹⁴ Jurarmi nirqan: <>.

¹⁵ Sayno promitiptinmi Abraham mana ajayaypa shuyakur Tayta Dios promitishqanta chaskirqan.

¹⁶ Promitishqanta cumplinanpaq pipis jurarqa kikinpita mas munayyuqpa jutinchömi juran. Sayno jurarqa imaykanöpapis cumplinanmi.

¹⁷ Saymi Tayta Diospis Abrahamta promitishqanta cumplinanpaq jurarqan. Sayno jurarqan imaypis cumplinanpaq kashqanta musyanansipaqmi.

¹⁸ Tayta Dios juraypa promitishqanta musyar y imaypis mana lulakushqanta musyarmi promitishqanta imaypis cumplinanpaq kashqantapis musyansi. Saymi payman yärakur kushish kawansi.

¹⁹ Payman yärakushqansiqa büqui mana kuyukunanpaq sararaq anclanömi kaykan. Gloriacho kaykaq Lugar Santïsimuta saparaykaq cortïnapa päsasimashpansimi Tayta Diospa nawpanman chäsimansi.

²⁰ Perdonash kanansipaqmi Jesucristo imayyaqpis mandaq cüra kar noqansipita mas puntata sayman yaykurqan. Paymi Melquisedecno imayyaqpis mandaq cüra kaykan.