Hebreos 5 - Tayta Diospa Wilakuynin

¹ Mandaq cürataqa Tayta Diosmi akran saki mikuy ofrendakunata y sacrificiukunata altarcho rupasiptin jusankunapita runakuna perdonash kayänanpaq.

² Cüraqa runala kar imachöpis jusalikurmi runa mayinkuna mana tantiyakuypa jusalikuyaptin kuyapan.

³ Saymi kikinpa jusankunapita y runa mayinkunapa jusankunapitapis sacrificiuta rupasin.

⁴ Kikinpa munaylanpitaqa manami pipis mandaq cüra kayman yaykunsu. Saypa trukanqa Tayta Dios churaptinraqmi mandaq cüra kayman pipis yaykun. Aarónpis mandaq cüra karqan Tayta Dios churaptinraqmi.

⁵ Manami Jesucristupis kikinpa munaylanpitasu mandaq cüra karqan, saypa trukanqa Tayta Dios churaptinraqmi. Paytami Tayta Dios nirqan: <>.

⁶ Tayta Dios palabrancho mastapis kaynömi nirqan: <>.

⁷ Jesucristo kay pasacho kawanan wisan waqapayparaq y qayakuyparaqmi Tayta Diosta manakurqan. Sayno manakurqan wanuypita salvananpaq Tayta Dios munayyuq kashqanta musyarmi. Tayta Dios nishqanta Jesucristo cumpliq kaptinmi ruwakushqanta wiyarqan.

⁸ Tayta Diospa Surin karpis nakarraqmi cäsukuyta yachakurqan.

⁹ Sayno yachakurmi munayyuq kaykan payta cäsukuqkunata salvananpaq.

¹⁰ Saymi Tayta Dios payta churarqan Melquisedecno mandaq cüra kananpaq.

Qepaman mana kutiypa kawayänanpaq yäsishqan

¹¹ Saypita tantiyasinäpaqqa askaraqmi kaykan. Sayno kaptinpis ajataraq tantiyayaptikimi mastaqa yachasishaykiraqsu.

¹² Kananyaqqa maynami yachasikuqna kaykäyankiman. Sayno kaptinpis yapay qalaykunanpitaraqmi yachakuyta munaykäyanki. Pishi wamra mikuyta manaraq yachakur lichilataraq upuqnömi kaykäyanki.

¹³ Chuchuykaq wamrakuna japuymi tantiyakuyankiraqsu Tayta Dios munashqanno kawayänaykipaq kashqanta.

¹⁴ Qamkunaqa mikuyta mikuqnöna kayankiman. Sayno karqa ali kaqta y mana ali kaqta tantiyarmi Tayta Dios munashqanno kawayankiman.