Hebreos 13 - Tayta Diospa Wilakuynin

Tayta Dios munashqanno kawanansipaq yäsishqan

¹ Say ayllunöla imaypis kuyanakur kawayay.

² Saynöla wayikiman posädakuq pï chämuptinpis kushishla posädasiyanki. Sayno posädasiyashqanchömi wakin runakuna mana musyayashpan angilkunata posädasiyarqan.

³ Carcilcho wichqaraykäyashqaykiman cuentaskir carcilcho kaykaqkunata yarpäyanki. Saynöla nakaykäyashqaykiman cuentaskir nakasish kaqkunatapis yanapäyanki.

⁴ Majayuqkuna majaykiwan kuyanakur ali kawayay. Majaykikunata ama jarukuyaysu. Fornicación jusata jusalikuqkunata y majanta jarukuqkunataqa Tayta Dios juzganqami.

⁵ Saynöpis qellaylapaqqa ama wachakash kayaysu. Saypa trukanqa sararäyashlaykiwan contentakuyay. Tayta Dios kaynömi nin: <>.

⁶ Sayno nikämashqaqa payman yärakushpansi kushish nishun: <>.

⁷ Tayta Diospa palabranta yachasishuqnikikunata yarpäyay. Tayta Diosta sirvir alikunata rurayashqanta tantiyakur paykuna yärakuyashqanno qamkunapis Tayta Diosman yärakuyay.

⁸ Jesucristuqa unaypis, kananpis y imayyaqpis kashqannölami kaykan.

⁹ Lutan yachasikuqkuna yachasiyashqanta ama chaskipäyaysu. Manami paykuna niyashqannösu reqish mikuykunalata mikur Tayta Dios munashqanno kawansi, saypa trukanqa Tayta Dios yanapämashqami.

¹⁰ Noqansipa altarninsiqa manami Sagrädu Tolducho kaykaq altarnösu kaykan. Altarninsipita mikushqapis Sagrädu Tolducho Tayta Diosta sirviq cürakunaqa manami saypita mikuyänanpaq derëchun kansu.

¹¹ Nawpa kaq pactuchöqa runakuna jusalikuyashqanpita mandaq cürakunami uywakunapa yawarninta Lugar Santïsimuman apayaq. Say uywakunapa aysantanami campamentupita jorqurir rupasiyaq.

¹² Saynölami Jesucristutapis markapita jorquskir wanusiyarqan. Yawarninta jichar wanushqanpitami jusansikunata Tayta Dios perdonamansi.

¹³ Jesucristo sayno nakaykaptinqa noqansipis campamentupita yarqushun. Payta nakasiyashqanno nakasimashqapis o payta jamuräyashqanno jamurämashqapis payman imaypis yärakur kawashun.

¹⁴ Noqansipa markansiqa manami kay pasachösu kaykan. Saypa trukanqa kay pasacho qorpanöla karmi mana ushakaq markataraq shuyakuykansi.

¹⁵ Sayno kaykaptinqa Jesucristuman yärakur sacrificiuta altarman churaqno Tayta Diosta imay hörapis alabashun. Paypa jutinta joqarir alabashqansimi ali kaykan.

¹⁶ Saynöpis mana qonqaypa alikunata rurayay. Jukniki jukniki imalawanpis yanapänakuyay. Sayno kawarmi Tayta Dios munashqan sacrificiukunata payman apaqno kaykansi.

¹⁷ Mayor wawqikunata cäsukuyay. Paykunaqa shumaq rikayäshunaykipaqmi waran waran yarpachakuykäyan. Saynöpis ali o mana ali rikayäshushqaykipitami Tayta Diosta cuentata qoyanqa. Sayno kaykaptinqa ama lakikasiyaysu, saypa trukanqa shakya shakyala rikayäshunaykipaq yäsiyäshushqaykita chaskikuyay. Lakikasiyaptikiqa manami qamkunapaqpis alisu kanqa.

¹⁸ Noqakunapaqpis Tayta Diosta manakuyay. Musyayämi lutanta mana rurayashqäta. Tayta Dios munashlantami imaypis rurayta munayä.

¹⁹ Saynöpis payta manakuyay qamkunaman yapay kutiyämunäpaq.

Carta ushanan

²⁰ Tayta Diostami qamkunapaq manakü. Paymi ali kawayta qomansi. Señor Jesucristutapis kawarisimushqami. Uyshankunatapis shumaqmi misin. Yawarninta jicharmi imaypis mana ushakaq pactuta noqansiwan rurash.

²¹ Jesucristupa jutinchömi payta manakuyä imaypis yanapaykuyäshunaykipaq. Munashqanta rurayänaykipaq imayka ali kaqkunata kamaripaykuyäläshunki. Payqa imayyaqpis alabash kaykuläsun. [Amén.]

²² Wawqi panikuna, walkalatapis kay cartacho yäsimushqäta chaskikuykuyälay.

²³ Wawqinsi Timoteupis carcilpita yarqamushnami. Qamkunaman manaraq shamuptï noqa kaqman chämuptinqa ishkäkunami shayämushaq.

²⁴ Salüdüta qoykuyälanki mayor wawqikunata y wakin wawqi panikunatapis. Italia nacionpita kaq wawqi panikunapis saynölami salüdunta apasikayämun.

²⁵ Tayta Dios kuyapar yanapaykuyäläshunki. [Amén.]