Hebreos 12 - Tayta Diospa Wilakuynin

Mana ajayaypa Jesucristuman yärakunansipaq yäsishqan

¹ Say unay runakunami yupaytapis mana atipaypaq jiruruparaykämansi. Sayno kaykaptinqa cörriq runa qepinta kachaykuqno lapan jusalikushqansita kacharishun. Yalinakuqkuna chäyänanpaq kaqman cörriyashqanno noqansipis Tayta Dios munashqanno wanushqansiyaq kawashun.

² Salvamaqninsi y tantiyasimaqninsi Jesucristo imano kawashqantapis tantiyakushun. Paymi runakunata salvar kushikunanpaq kashqanta musyashpan penqayta jitaykur cruzcho wanurqan. Saymi kananqa Tayta Diospa trönun aluq kaq nawpancho jamaraykan.

³ Tayta Diosman yärakuyashqaykipita qepaman mana kutikuyänaykipaq Jesucristo imano nakashqantapis tantiyakuyay. Payqa jusasapa runakuna contran sharkuyaptinpis Tayta Dios munashqannömi imaypis kawarqan.

⁴ Qamkunapa contrayki sharkurpis manami mayqaykitapis wanusiyäshunkiraqsu.

⁵ ¿Qonqaykuyashkankiku Tayta Dios wamrankunapaq palabrancho kayno nikashqanta? <

⁶ Kuyashqan kaqtaqa Tayta Dios corriginmi. Wamran kananpaq shuntakushqan kaqtaqa yachakunanpaq astanmi>>.

⁷ Pï runapis wamrantaqa corriginmi. Saynölami wamran kaptiki Tayta Diospis corrigiyäshunki. Saymi Tayta Dios corrigiyäshuptiki chaskikuyänayki.

⁸ Wamran kaqtaqa lapantami Tayta Dios corrigin. Mana corrigiyäshuptikiqa manami wamrankunasu kaykäyanki.

⁹ Papäninsipis mana cäsukuq kashqami corrigimashkansi. Corrigimashqapis jaqayänansipa trukan cäsukushkansimi. Sayno kaykaptinqa Tayta Dios corrigimaptinsi masraq cäsukushun. Cäsukurqa mana ushakaq kawaytami tarishun.

¹⁰ Papäninsipis makincho kashqansiyaqlami munashqanno kawanansipaq corrigimansi. Tayta Diosmi isanqa corrigimansi pay jusaynaq kashqanno jusaynaq kanansipaq.

¹¹ Corrigimashqansi höra fiyupa lakikurpis wiyakurqa Tayta Dios munashqannömi kawashun.

¹² Sayno kaykaptinqa makiki warkakaqno desanimädu karpis y qonqurniki watakaqno qajakarpis valorta sariyay.

¹³ Nänipita mana yaqaypa aywaqno imaypis alilata rurayay. Saynöpami weqru runa ishkiq japuy kayankinasu, sinöqa aliyash runanöna kayanki.

Tayta Diosta mana wasqipänansipaq yäsishqan

¹⁴ Pïmaywanpis kuyanakur ali kawayay. Saynöpis mana jusalikuypa Tayta Dios munashqanno kawayay. Jusalikur kawaqkunaqa manami pipis Tayta Diospa nawpanman chanqasu.

¹⁵ Shumaq tantiyakuyay. Mayqaykipis jusalikuyta mana wanakurqa manami salvakuyankisu. Jaqayash ama puriyaysu. Jaqayash purirqa venënuyuq iwjiq jachano karmi wakinkunatapis jaqayäsiyanki.

¹⁶ Fornicación jusata ama mayqaykipis jusalikuyaysu. Saynöpis Esaúno Tayta Diosta mana cäsukuq ama kayaysu. Esaúqa pachan raykulami qechpa kay derëchunta juk plätu mikuylapaq wawqinta rantikurqan.

¹⁷ Musyayashqaykinöpis say bendicionta taytanpita chaskiyta munar mayjina waqarpis manami chaskirqannasu.

¹⁸ Qamkunaqa manami Sinaí jirkaman chaqnösu kaykäyanki. Say jirkachöqa ninapis, sakaypis y fiyupa wayrapis karqanmi.

¹⁹ Cornëta waqamushqanta y Tayta Dios mansariypaq parlamushqanta wiyarmi fiyupa mansariyashpan ruwakuyarqan manana parlapänanpaq.

²⁰ Saynöpis fiyupami mansariyarqan Tayta Dios kayno niptin: <>.

²¹ Fiyupa mansariypaq kaptinmi Moiséspis nirqan: <>.

²² Qamkunaqa Sión lömaman y jana pasacho kaykaq Jerusalénman chashnönami kaykäyanki. Say markaqa imayyaqpis kawaq Tayta Diospa markanmi. Saychömi yupaytapis mana atipaypaq saysika angilkuna Tayta Diosta kushish alabaykäyan.

²³ Tayta Diosman lapan yärakuqkunawan shuntakashnömi kaykäyanki. Qechpa wamra herenciata chaskiqno kayaptikimi jutikikunapis jana pasacho qelqaraykan. Saynöpis pïmayta juzgaq Tayta Diospa nawpanman y jana pasacho kaykaq lapan salvashkunapa nawpanman chashnönami kaykäyanki.

²⁴ Saynölami Jesucristupa nawpancho kaykaqnöna kaykäyanki. Paymi wanurqan Tayta Dios mushuq pactuta rurar salvamänansipaq. Jesucristo yawarninta jichashqan manami Abel yawarninta jichashqannösu kaykan. Abel yawarninta jichar wanushqanqa wanusiq runa castigash kananpaqmi karqan. Jesucristo yawarninta jichar wanushqanmi isanqa perdonash kanansipaq kaykan.

²⁵ Sayno kaykaptinqa Tayta Dios niyäshushqaykita ama yupaytupäyaysu. Sunyaq jirkacho Moisés nishqanta mana cäsukuqkunata Tayta Dios castigaykarqa jana pasapita pasa nimashqansita mana cäsukush peormi castigamäshun.

²⁶ Sinaí jirkacho Tayta Dios parlamuptin say jirkapis seqaypami suksukyarqan. Kananpis Tayta Dios palabrancho nikanmi: <>.

²⁷ <> nirqa lapan kamashqankunata suksukyäsir elaqäsinanpaq kashqantami musyasimansi. Sayno ruraptinmi mana ushakaqkunalana quëdayanqa.

²⁸ Tayta Dios mandaykashqanqa imaypis manami ushakanqasu. Say mandaykashqantaqa chaskiykansinami. Sayno kaykaptinqa agradëcikushpansi lapan shonqunsiwan payta alabashun. Payta mansapakur munashqanno imaypis kawashun.

²⁹ Imatapis nina rupar ushashqannömi mana wiyakuqkunataqa Tayta Diosninsi ushakäsinqa.