Hebreos 11 - Tayta Diospa Wilakuynin

Tayta Diosman yärakuyashqan

¹ Tayta Diosman yärakurmi musyansi pay promitimashqansikunata cumplinanpaq kashqanta. Saymi promitimashqansikunata manaraq rikarpis chaskikunansipaq shuyaraykansi.

² Tayta Diosman yärakuq unay runakunapis Diospa shonqunpaqnömi kawayarqan.

³ Tayta Diosman yärakurqa tantiyansi pay niptilan kay pasapis jana pasapis yuriskishqanta. Lapan rikaykashqansitapis imapis mana kashqanpitami kamarqan.

⁴ Abelpis Tayta Diosman yärakurmi wawqin Caínpita mas alinnin kaq sacrificiuta Tayta Diospaq rupasirqan. Abel rupasishqanta chaskirmi Tayta Dios musyasirqan ali runa kashqanta. Abel unayna ushakäkush kaykaptinpis rurashqanta kananyaqmi yarpansi.

⁵ Enoctapis Tayta Diosman yärakuptinmi kawaykaqta Tayta Dios pushakurqan. Tayta Diospa palabranchöpis nikan Tayta Dios munashqanno Enoc kawashqantami.

⁶ Yärakuyninsi mana kaptinqa manami imanöpapis Tayta Dios munashqanno kawashunsu. Tayta Diosman yärakurqa pay kashqanta criyishunmi. Saynöpis criyishun payta ashiqkunata yanapashqantami.

⁷ Noépis Tayta Diosman yärakurmi arcata rurarqan diluviupita surinkunawan y lumsuyninkunawan salvakuyänanpaq. Diluviu kananpaq kashqanta Tayta Dios wilaptinmi diluviuta manaraq rikarpis arcata rurarqan. Saymi mana yärakuq runakunata Tayta Dios ushakäsirpis Noéta salvar jusaynaqta chaskirqan.

⁸ Abrahampis Tayta Diosman yärakurmi markanta kachariykur Tayta Dios qoykunanpaq kaq nacionman aywakurqan. May nacionman chänanpaq kashqantapis mana musyaykarmi aywakurqan.

⁹ Tayta Dios promitishqan nacionman charpis payman yärakurmi toldukunalacho jäpa runanöla tarqan. Abrahamtano Tayta Dios promitiptinmi Isaacpis y Jacobpis saynöla täyarqan.

¹⁰ Abraham sayno tarqan Tayta Dios sharkasishqan mana ushakaq markaman chänanpaq kashqanta musyarmi.

¹¹ Sarapis Tayta Diosman yärakurmi chakwanyashqanyaq qoluq kaykarpis qeshyaq rikakurqan. Pay criyirqan Tayta Dios promitishqanta cumplinanpaq kashqantami.

¹² Saynöpami Abraham pasaypa awkinna kaykaptinpis surin yurirqan. Nirkurnami paypa surin y surinpita miraqkunapis jatun nación kashqanyaq mirayarqan. Paykunami yupaytapis mana atipaypaq qoyllarnöraq y lamar kuchuncho aqushanöraq saysika kaykäyan.

¹³ Tayta Dios promitishqanta manaraq chaskirpis Abraham, Sara, Isaac y Jacob payman yärakuykälarmi wanuyarqan. Manaraq chaskirpis Tayta Dios cumpliykashqanta rikarmi kushikuyarqan. Paykunaqa kay pasacho qorpanöla kayashqantami tantiyakuyarqan.

¹⁴ Sayno tantiyarmi jana pasacho kaykaq markaman aywakuyänanpaq shuyakuykäyarqan.

¹⁵ Paykuna manami yarpäyarqansu unay täyashqan markanman kutiyta. Markanpaq lakikurqa imaykanöpapis kutikuyanmanmi karqan.

¹⁶ Markanpaq lakikuyänanpa trukanqa jana pasacho kaykaq mas ali kaq markapaqmi yarparäyarqan. Saymi paykunapa Diosnin kayta Tayta Dios penqakunsu. Say markataqa kamarishlatanami paykunata shuyaraykäsin.

¹⁷ Abrahampis Tayta Diosman yärakurmi juklayla surin Isaacta altarcho rupasinanpaq Tayta Dios niptin rupasinanpaq pusharqan.

¹⁸ Sayno pusharqan Isaacpita askaman mirananpaq Tayta Dios promitish kaykaptinpis.

¹⁹ Saymi yarparqan wanusiptinpis Isaacta kawarisimunanpaq kashqanta. Rasunpaypami kawarimushtano Abraham payta chaskirqan.

²⁰ Isaacpis Tayta Diosman yärakurmi Jacobta y Esaúta bendicionninta qorqan.

²¹ Jacobpis Tayta Diosman yärakurmi Josépa surinkunata bendicionninta qorqan. Wanunanpaqna kaykar bendicionninta qoshpanmi tukrunman tuknakuykur Tayta Diosta adorarqan.

²² Josépis Tayta Diosman yärakurmi Israel mayinkunata wilarqan Egiptupita yarquyänanpaq kayashqanta. Wanunanpaqna kashqanta musyarmi paykunata nirqan: <>.

²³ Moiséspa maman taytanpis Tayta Diosman yärakurmi Faraón mandashqanta wiyakuyarqansu. Saymi Moisés yuriptin kuyaylapaq kashqanta rikaykur kimsa killantin pakaräsikuyarqan.

²⁴ Moiséspis Tayta Diosman yärakurmi poqukarkurnaqa Faraónpa warmi surinpa wawan kayta munarqansu.

²⁵ Saymi Faraónpa wayincho jusalikular kawananpa trukanqa Israel mayinkunawan nakar kawarqan.

²⁶ Tayta Diospita premiuta chaskinanpaq kashqanta musyarmi Egiptucho rïcu kayta munarqansu, sinöqa Cristo nakananpaq kashqanno nakashqan mas ali kashqantami tantiyarqan.

²⁷ Tayta Diosman Moisés yärakurmi Faraónta mana mansaypa Tayta Diosta rikaykaqno Egiptupita aywakurqan.

²⁸ Tayta Diosman yärakurmi Israel runakunata nirqan Pascua fiestata rurar punkupa quiciunninkunata yawarwan lushiyänanpaq. Sayno lushisirqan wanusikuq ángel yawarta rikar Israel runakunapa wayinkunacho qechpa surinkunata mana wanusinanpaqmi.

²⁹ Israel runakunapis Tayta Diosman yärakurmi Puka Lamarta sakilapa päsayarqan. Egipto runakunami isanqa qepanta yaykuyashqancho shenqaypa wanuyarqan.

³⁰ Tayta Diosman yärakur Israel runakuna Jericó markata qanchis junaq tumapaykäyaptinmi murällanpis juchurqan.

³¹ Prostitüta warmi Rahabpis Tayta Diosman yärakurmi rikapakuq Israel runakunata kushish chaskikurqan. Saynöpami mana cäsukuq runakuna ushakäyaptinpis payqa ushakarqansu.

³² Tayta Diosman yärakuqkunaqa maspis kaykäyanraqmi. Isanqa tiempumi kansu Gedeónpita, Baracpita, Sansónpita, Jeftépita, Davidpita, Samuelpita y profëtakunapita wilapänäpaq.

³³ Tayta Diosman yärakurmi wakinqa nacionkunata sarikurkuyarqan, wakinqa runakunata ali juzgayarqan y wakinnami Tayta Dios promitishqanta chaskiyarqan. Wakintaqa leonkunapis manami mikuyarqansu.

³⁴ Wakintaqa ninapis manami ruparqansu. Wakinnami espädawan wanusiyänanpaq kaykaptinpis qeshpiyarqan. Valorniynaqkunatapis valurayänanpaqmi Tayta Dios yanaparqan. Saymi juk nacionpita shamuq soldädukunatapis Tayta Diosman yärakur vinciyarqan.

³⁵ Saynölami Tayta Diosman yärakuq warmikunapis rikayarqan wanush sutaraykaq wawankuna kawariyämushqanta. Wakintanami nakasiypa wanusiyarqan. Tayta Diosta ñëgasiyänan kash nakasiyaptinpis Tayta Dios kawarisimunanpaq kashqanta musyar manami ñëgayarqansu.

³⁶ Saynölami wakin nakayarqan runakuna ashliyaptin, astayaptin y carcilman wichqayaptin.

³⁷ Wakintami samqaypa wanusiyarqan. Wakintami serruchuwan kusuypa wanusiyarqan. Wakintanami espädawan wanusiyarqan. Wakinnami pasaypa pobri kar uysha qarasalapita y cabra pirqashlapita mödanankuna jatish markan markan chikiytukush puriyarqan.

³⁸ Runakuna chikiyaptinmi saki jirkakunapa y sunyaq raqrakunapa purir machaykunaman pakakuyaq. Tayta Diosman mana yärakuqkunaqa manami mayqanpis paykunano ali kayarqansu.

³⁹ Yärakuyashqanpita Tayta Dios paykunata ali rikaptinpis kay pasacho manami mayqanpis Tayta Dios promitishqanta chaskiyarqansu.

⁴⁰ Saypa trukanqa mas ali kaqta chaskikuyänantami Tayta Dios munarqan. Saynöpami paykunapis y noqansipis promitishqan salvacionta iwal chaskishun.