Gálatas 6 - Tayta Diospa Wilakuynin

Runa mayinsiwan yanapänakunansipaq nishqan

¹ Espíritu Santu munashqanno kawaq wawqi panikuna, yärakuq mayiki jusalikuykashqanta musyarqa mana jamuraylapa tantiyasiyanki. Cuidätaq kikikikunapis jusalikuyankiman.

² Jukniki juknikipis shakyäsinakur yanapänakuyay. Saynöpami Jesucristo yachasimashqansi mandamientunta cumpliykäyanki.

³ Imatapis mana musyaykar runa tukurqa kikilaykikunami engañakuykäyanki.

⁴ Runa tukuyänaykipa trukanqa kikikikuna imano kawaykäyashqaykitapis tantiyakuyay. Saynöpami ali tukur kushikuyänaykipa trukanqa Tayta Dios munashqanno kawayashqaykipita kushikuyanki.

⁵ Lapansimi imano kawashqansipitapis Tayta Diosta cuentata qoshun.

⁶ Jesucristupa wilakuyninta yachakuqkunaqa yachasiqninta imalawanpis yanapäyäsun.

⁷ Shumaq tantiyakushun. Tayta Diosta manami engañayta kamäpakunsisu. Imatapis murushqansitaqa cosechansimi.

⁸ Saynölami jusata rurarqa wanur ushakäshun. Espíritu Santu munashqanno kawarmi isanqa mana ushakaq kawayta tarishun.

⁹ Sayno kaykaptinqa mana ajayaypa ali kaqkunalata rurashun. Sayno kawashqami Tayta Dios imay karpis premiuta qomäshun.

¹⁰ Sayta musyaykarqa puëdishqansiman tupu pïmaytapis yanapäshun. Jesucristuman yärakuq mayinsi kaptinqa masraq yanapäshun.

Carta ushanan

¹¹ Kay cartapa ushanantaqa kikïmi jatusaq letrakunawan qelqaykämü.

¹² Señalakuyänaykipaq yachasishuqnikikunaqa Israel mayinkuna ali rikayänanta munalarmi yachaykäsiyäshunki. Qatikachäyänanta mansarirmi Jesucristo cruzcho wanushqanpita salvakushqansitaqa yachasiyansu.

¹³ Paykuna señalakurpis Moisés qelqashqan leykunata manami cumpliyansu. Sayno karpis leyta cumplisiyashqanpita alabakuyänalanpaqmi señalakuyänaykita munaykäyan.

¹⁴ Noqaqa manami imapitapis alabaküsu. Alabakunäpa trukanqa Señor Jesucristo noqansi rayku cruzcho wanushqanpitami kushikü. Cruzcho wanush kaptinmi kay mundu noqapaq crucificashnöna kaykan y noqapis kay mundupaq crucificashnöna kaykä.

¹⁵ Saymi [Jesucristucho kashqaqa] señalakush kashqansisu ni mana señalakush kashqansisu välin. Mushuq kamash runana kashqansimi isanqa rasunpaypa välin.

¹⁶ Sayta tantiyakuqkunataqa Tayta Dios kuyapar ali rikaykuläsun. Paykunaqa Tayta Dios kuyashqan Israel runakunami kaykäyan.

¹⁷ [Señor] Jesucristupa ali wilakuyninta wilakushqäpita maqayämashqan seräkuna kanmi. Sayno kaykaptinqa yachasishqäta pipis manakaqman amana churasunsu.

¹⁸ Wawqi panikuna, Señorninsi Jesucristo kuyapäyäshushpayki imaypis yanapaykuyäläshunki. Amén.