Gálatas 1 - Tayta Diospa Wilakuynin

Carta qalaykunan

^1-2 Galacia provinciacho kaykaq wawqi panikuna: Noqa Pablumi kay cartata qamkunapaq apaykäsimü. Apóstol kanäpaq manami runakunasu churayämash, sinöqa Jesucristo y payta kawarisimuq Tayta Diosmi. Kaycho kaykaq wawqi panikunami qamkunapaq salüdunta apasikayämun.

³ Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki.

⁴ Papäninsi Tayta Dios munashqannömi kay pasacho jusalikuypita salvamänansipaq Jesucristo wanurqan.

⁵ Tayta Dios imayyaqpis alabash kaykuläsun. Amén.

Wawqi panikuna lutan yachasikuyta chaskikuyashqan

⁶ Musyayashqaykinöpis Jesucristupa kuyakuyninwanmi Tayta Dios qayayäshurqayki. Sayta musyaykar ¿imanirtaq lutan yachasikuyta chaskikur manaraqpis aykäta Tayta Diospita witikuyashkanki? ¡Saytaqa manami imano tantiyakuytapis atipäsu!

⁷ Jesucristupa wilakuyninpita mas juk wilakuyqa manami salvakunansipaq kansu. Sayno kaptinpis wakin runakuna Jesucristupa wilakuyninman yaparkurmi lutanta yachaykäsiyäshunki.

⁸ Qamkunata yachasiyashqäta manakaqman churar lutanta pipis yachasiptinqa infiernuman Tayta Dios qaykusun. Noqakunatapis lutanta yachasiyaptïqa infiernuman qaykayämäsun. Jana pasapita shamuq angiltapis lutanta yachasiptinqa infiernuman qaykusun.

⁹ Yapaypis nï: Pipis Jesucristupa wilakuynin jananman lutan yachasikuyta takusiq kaqtaqa infiernuman qaykusun.

¹⁰ Sayno nishpä ¿runakuna alabayämänantasuraq ashiykä? ¿Runakunapita ali rikash kaytasuraq munaykä? Noqa manami runakuna alabayämänanpaqsu yachaykäsï, saypa trukanqa Tayta Dios: <> nimänanpaqmi. Runakuna alabayämänan raykula yachasirqa manami Jesucristupa sirviqninsu käman.

Apostolnin kananpaq Pabluta Jesucristo churashqan

¹¹ Wawqi panikuna, shumaq tantiyakuyay. Ali wilakuyta wilakushqä manami runakunapa yarpayninsu kaykan.

¹² Saynöpis manami say wilakuyta runasu yachasimash, saypa trukanqa kikin Jesucristumi revelacioncho tantiyasimash.

¹³ Qamkuna musyayankimi nawpata Israel runakunapa costumbrinkunata cumplir imano kashqätapis. Say wisanqa Jesucristuta chaskikuqkunapa contran sharkur qatikacharmi lapanta ushakäsiyta munarqä.

¹⁴ Wakin Israel mayïkunapitapis masmi costumbrïkunata välisirqä. Lapan winay mayïkunapitapis masraqmi Moisés qelqashqankunata cumplirqä.

¹⁵ Imano kaptinpis manaraq yuriptïmi Tayta Dios kuyapämashpan payta sirvinäpaq akramash.

¹⁶ Nirkurmi Jesucristuta chaskikunäpaq shumaq tantiyarkasimar mana Israel runakunata wilakuyninta wilapänäpaq kachamash. Sayno kachamaptinmi wilakuyninta tantiyasimänanpaq pitapis tapukurqänasu.

¹⁷ Saynöpis manami noqapita mas punta kaq apostolkunawan parlanäpaqpis Jerusalénman aywarqäsu. Saypa trukanqa Arabia partipami aywakurqä. Saypitanami Damasco markaman yapay kutirqä.

¹⁸ Saypita kimsa watataraqmi Pedruwan parlaq Jerusalénman aywarqä. Saychömi chunka pisqa junaq paywan qoyämurqä.

¹⁹ Saychömi reqirqä Señor Jesucristupa wawqin Santiaguta. Isanqa wakin apostolkunataqa manami tarirqäsu.

²⁰ Tayta Dios musyanmi mana lulakuykashqäta.

²¹ Saypitanami Siria y Cilicia provinciakunapa aywarqä.

²² Judea provinciacho wawqi panikuna manaraqmi mayqanpis reqiyämarqanraqsu.

²³ Paykuna kayno niqtashi wiyayänaq: <>.

²⁴ Sayno niqta wiyarshi Tayta Diosta alabayänaq.