Filipenses 4 - Tayta Diospa Wilakuynin

Kushish kawanansipaq nishqan

¹ Kuyay wawqi panikuna, qamkunapaq imaypis yarpararmi watukaq shamuyta munaykä. Qamkunami premiuta chaskishqä corönäno kaykäyanki. Yachasishqäno kawayaptikimi japanla kushikü. Señor Jesucristo munashqanno imaypis kawayay.

² Evodiata y Síntiquitami ruwakü Señor Jesucristuta chaskikushna kaykarqa juk shonqula kawayänanpaq.

³ Wilakuq mayï, qamtapis ruwämi paykunata amistasinaykipaq. Jesucristupa wilakuyninta Clementiwan y wakin wilakuq mayïkunawanpis wilakuptï say warmikuna alimi yanapäyämash. Libru de la Vïdachömi paykunapa jutinkunapis qelqaraykäyan.

⁴ Jesucristupa makincho kawaykarqa imaypis kushikuyay. Yapaymi nï: ¡Kushikuyay!

⁵ Ali runa kayashqaykita pïmaypis musyayäsun. Señor Jesucristo kutimunqanami.

⁶ Imapaqpis ama lakikuyaysu. Saypa trukanqa Tayta Diosta agradëcikur lapanchöpis yanapäyäshunaykipaq manakuyay.

⁷ Sayno manakuyaptikimi Tayta Dios ali kawayta qoyäshunki. Paymi shonquykikunatapis yarpaynikikunatapis cuidanqa Jesucristuman yärakur mana lakikuyänaykipaq. Saymi imanir kushish kawayashqaykita pipis tantiyanqasu.

⁸ Wawqi panikuna, rasun kaqkunapaq, ali ruraykunapaq y ali kawaypaq imaypis yarpachakuyay. Imapis ali kaptin o alabanansipaq kaptinqa saykunapaqpis yarpachakuyay.

⁹ Yachasiyashqänöla, tantiyasiyashqänöla, wiyayämashqaykinöla y imano kawashqätapis rikayämashqaykinöla imaypis kawayay. Saymi imaypis ali kawayänaykipaq Tayta Dios yanapäyäshunki.

Pablo agradëcikushqan

¹⁰ Wawqi panikuna, apasikayämushqaykita chaskir Tayta Diostami agradëcikü. Manaraq chaskirpis musyashkämi mana qonqaykayämashqaykita. Apasikamuyta munarpis karucho karmi kamäpakayämushkankisu.

¹¹ Manami pishïpakursu sayno nï. Imäpis kashlanwan kushish kawakuytami yachakushkä.

¹² Noqa musyämi rïcu kay y muchuq kay imano kashqantapis. Imano kawarpis contentakuytami yachakushkä. Saymi kushish kawaykä pacha junta karpis, mikanarpis, rïcu karpis o pobri karpis.

¹³ Imano karpis Jesucristo yanapämaptinmi ali kawaykä.

¹⁴ Sayno kaptinpis nistaykashqä höra apasikayämushqaykita chaskir fiyupami kushikushkä.

¹⁵ Filipos wawqi panikuna, musyayashqaykinöpis Jesucristupa ali wilakuyninta wilakunäpaq Macedonia provinciapita aywakuptï wakin iglesiakuna mana yanapäyämaptinpis qamkunalami yanapäyämashkanki.

¹⁶ Tesalónica markacho kaykaptïpis yapay yapaymi nistashqäkunapaq apasikayämushkanki.

¹⁷ Manami yapay apasikayämunaykita munarsu sayno nï, saypa trukanqa yanapäkuq kayashqaykipita mas bendicionta chaskiyänaykita munarmi.

¹⁸ Epafrodituwan apasikayämushqayki lapan nistashqäkunapaq aypaptinmi imatapis pishipaküsu. Say apasikayämushqaykimi Tayta Diospaq mushkuq sacrificiuno kaykan.

¹⁹ Jesucristo noqansi rayku wanush kaptinmi gloriacho riquëzankunapita Tayta Dios qamkunatapis lapan munayashqaykita kamaripäyäshunki.

²⁰ ¡Papäninsi Tayta Dios imaypis alabash kaykuläsun! Amén.

Carta ushanan

²¹ Qamkuna kaqcho lapan wawqi panikunata salüdü qoykuyälanki. Noqawan kaykaq wawqi panikunapis salüduntami apasikayämun.

²² Saynölami kay markacho yärakuq mayinsikunapis salüdunta apasikayämun. Mas mandaq Césarpa wayincho aruq wawqi panikunapis salüdunta apasikayämunmi.

²³ Señor Jesucristo lapaykita kuyapaykuyäläshunki. [Amén.]