Filipenses 3 - Tayta Diospa Wilakuynin

Jesucristuman yärakur salvakunansipaq nishqan

¹ Wawqi panikuna, Tayta Diospa makincho kawaykarqa kushikuyay. Noqa manami ajayäsu saylata yapay yapay qelqamurpis. Sayno qelqamushqä qamkunapaq alimi kaykan.

² Lutan yachasikuqkunapita cuidakuyay. Say alqukunaqa nikäyan: <>.

³ Cuerpunsita mana señalakurpis Espíritu Santu yanapämashqami Tayta Diosta sirviqkunaqa shonqunsicho señalashna kaykansi. Manami leykunata cumplirraqsu salvakunsi, sinöqa Jesucristuman yärakurmi.

⁴ Leykunata cumplir salvakunansi kaptinqa noqapis leykunata cumplirmi salvaküman karqan. Noqanöqa manami pipis leykunata cumplishsu.

⁵ Leykuna nishqannölami yurishqäpita puwaq junaqyuq kaykaptï señalayämarqan. Saynöpis Benjamín trïbupita kaq Israel runami kä. Manami mayqan hebreo mayïpis noqanöqa leykunata cumplishsu. Fariseo karmi Tayta Diospa leyninkunata imaypis cumplirqä.

⁶ Tayta Diospa shonqunpaqno ruraykashqäta yarparmi Jesucristuman yärakuqkunatapis qatikachaq kä. Say leykuna nishqanta lapantami cumplishkä.

⁷ Sayno cumplirmi yarparqä alita ruraykashqäta. Kananmi isanqa noqansi rayku Jesucristo wanushqanta musyar tantiyakü say cumplishqäkuna manakaqlapaq kashqanta.

⁸ Señornï Jesucristuta reqishqämanqa manami imapis tinkunsu. Saymi nawpata rurashqäkunaman yärakunäpa trukan Jesucristumanna yärakü. Nawpata rurashqäkunaqa manami imapaqpis välimansu.

⁹ Manami leyninkunata cumplishqäpitasu munashqanta ruraqtano Tayta Dios chaskimash, saypa trukanqa Jesucristuman yärakushqäpitami.

¹⁰ Jesucristuta masmi reqiyta munä. Payta Tayta Dios munayninwan kawarisimushqanno noqatapis say munayninwan yanapämänantami munä. Saymi Jesucristo nakashqanno nakarpis y payta wanusiyashqanno wanusiyämaptinpis pay cäsukushqanno noqapis cäsukushaq.

¹¹ Saymi shuyaraykä Jesucristuta Tayta Dios kawarisimushqanno noqatapis wanukuptï kawarisimänanta.

Tayta Dios munashqanno kawanansipaq nishqan

¹² Manami jusaynaq ni santuna kashqätasu nikä. Saypa trukanqa Jesucristo munashqanno kawanäpaqmi waran waran yarpachakü. Sayno kawanäpaqmi Jesucristo salvamash.

¹³ Wawqi panikuna, manaraqmi Tayta Dios munashqannösu lapanta ruraykä. Isanqa unay kawashqäta yarparänäpa trukanqa waran waranmi yarpachakü Tayta Dios munashqanno kawanäpaq.

¹⁴ Premiuta chaskinanpaq yalinakur cörriqnömi noqapis Tayta Diospa nawpanman chänäpaq pay munashqanno kawaykä. Sayman chänäpaqmi Jesucristo kayninpa Tayta Dios qayamash.

¹⁵ Jesucristuman shumaq yärakuqkuna, nishqäkunata tantiyakuyay. Tantiyayta mana kamäpakuyaptiki Tayta Diosmi tantiyasiyäshunki.

¹⁶ Imano kaptinpis Jesucristo munashqannöla kawashun [y juk yarpayla kashun.]

¹⁷ Wawqi panikuna, imano kawashqätapis rikakayämay. Noqakuna kawayashqäno kawaqkunatapis rikakuyay.

¹⁸ Wakin runakunaqa mana ali kawarmi Jesucristo cruzcho wanushqanta manakaqman churayan. Sayno kayashqanta aska kutinami qamkunata nishkä. Kananpis weqïpawanraqmi wilaykä.

¹⁹ Say runakunaqa Jesucristo munashqanno kawayänanpa trukan shonqun yarpashqannölami kawakuyan. Lutankunata rurayashqanpita penqakuyänanpa trukanqa sumäsiyanraqmi. Kay pasacho kawayänalanpaqmi yarpachakuyan. Paykunaqa infiernuman qaykushqami kayanqa.

²⁰ Noqansipa markansimi isanqa gloria kaykan. Saymi salvamaqninsi Señor Jesucristo gloriapita kutimunanta shuyakuykansi.

²¹ Lapanpaq munayyuq karmi kay ushakaq cuerpunsita mushuq cuerpuman tikrasinqa. Say mushuq cuerpunsimi kikinpa cuerpunno mana ushakaq kanqa.