Filemón 1 - Tayta Diospa Wilakuynin

Carta qalaykunan

¹ Wilakuq mayï kuyay Filemón: Noqa Pablumi, Jesucristupa wilakuyninta wilakushqäpita carcilcho kaykar Timoteuwan kay cartata cartakayämü.

² Salüdüta qoykulanki paninsi Apiata, wilakuq mayinsi Arquiputa y wayikicho shuntakaykur Tayta Diosta alabaq wawqi paninsikunatapis.

³ Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki.

Yärakuq mayinkunawan Filemón ali kawashqan

⁴ Wawqi Filemón, imaypis manakushqä hörami qampaq Tayta Diosta agradëcikü.

⁵ Señor Jesucristuman yärakuykashqaykita y yärakuq mayinsikunawan kuyanakuykäyashqaykitami wilayämash.

⁶ Saymi manakuykä Jesucristuman yärakunaykipaq y noqansi rayku wanushqanpita ali kaqkunata ruranaykipaq.

⁷ Wawqi Filemón, kuyakuq kashpayki yärakuq mayinsikunata shakyaykäsishqaykita musyarmi noqapis fiyupa kushikü.

Onésimuta Filemón chaskinanpaq Pablo ruwakushqan

^8-10 Wawqi Filemón, Jesucristupa wilakuyninta wilakushqäpitami carcilcho wichqaraykä. Saynöpis awkinnami kaykä. Prësu kaykashqäman ashmayniki Onésimo chämuptin ali wilakuyta wilapaptïmi Jesucristuta chaskikush. Saymi kananqa surïnöna kaykan. Sayno kaptinmi qamta ruwakü Onésimuta kachamuptï ali chaskinaykipaq. Jesucristupa apostolnin kar qamta obligarpis obligämanmi. Sayno kaptinpis manami obligayta munäsu, sinöqa kuyakuq kaptikimi Onésimuta ali chaskinaykipaq ruwakuykä.

¹¹ Ashmayniki karpis nawpata manami shumaqsu yanapäshurqayki. Kananmi isanqa Jesucristuta chaskikushna kar ishkansitana yanapämäshun.

¹² Saymi seqaypa lakirpis Onésimuta kutiykäsimü. [Payta kikïtano chaskiykulay.]

¹³ Ali wilakuyta wilakushqäpita prësu wichqarashqäyaq trukayki yanapämänanpaq quëdasikuptïpis alimi kanman karqan.

¹⁴ Sayno kaptinpis ashmaynikitaqa manami sararäkümansu, saypa trukanqa kikikiraqmi yanapämänanpaq o mana yanapämänanpaqpis ninayki.

¹⁵ Capazchir Tayta Dios kamakäsish Onésimo juk tiempula qampita yarqamunanpaq. Saymi kananqa Jesucristuta chaskikur imayyaqpis wawqikina kaykan.

¹⁶ Kananpita mananami ashmaylaykinasu kanqa, saypa trukanqa kuyay wawqinsinami. Sayno kaykaptinqa noqa kuyashqänöla makikiman kutimuptin qampis kuyaykulay.

¹⁷ Saymi yärakuq mayï kaptiki ruwakü noqata chaskikamaq japuyla paytapis chaskiykunaykipaq.

¹⁸ Ashmayniki Onésimo imaykitapis suwakush kaptinqa o jaqayki kaptin imaptinqa wilaykamay noqa päganäpaq.

¹⁹ Päganäpaq kaqtaqa kikïmi qelqaykämü. Isanqa ama qonqaysu Jesucristupa ali wilakuyninta wilapashqäpita qampis jaqä kashqaykita.

²⁰ Wawqi Filemón, yärakuq mayï kaptikimi ruwakü kay nishqäta ruranaykipaq. Ruwakushqäta ruraptikiqa kushikushaqmi.

²¹ Imatapis nishqäno ruranaykipaq kashqanta musyarmi kay cartata cartakamü. Nishqäpita mastaraq ruranaykipaq kashqantapis musyämi.

²² Tayta Diosta manakushqaykino carcilpita yarqamurqa rajakuq shamushaqmi. Chämuptï posädasimänaykipaq puestukuykälay.

Carta ushanan

²³ Epafrasmi salüdunta qampaq apasikamun. Paypis Jesucristupa ali wilakuyninta wilakushqanpitami noqawan juntu prësu wichqaraykan.

²⁴ Saynölami wawqinsi Marcos, Aristarco, Demas y Lucaspis salüdunkunata apasikayämun. Paykunami lapanchöpis yanapaykäyäman.

²⁵ Señor Jesucristo kuyapäshushpayki imaypis yanapaykuläshunki. [Amén.]