Ezequiel 10 - Tayta Diospa Wilakuynin

Templupita Tayta Dios aywakushqan

¹ Saypitanami rikarqä querubinkunapa junaqnincho zafiro rumipita rurash trönu niraqta.

² Lïnu mödanash kaykaq runatanami Tayta Dios nirqan: <>. Niptinmi rikaraykaptï Tayta Dios nishqannöla say runa yaykurqan.

³ Templupa patiun sur kaqlä kuchunchömi querubinkuna say höra kaykäyarqan. Ruëdakuna kashqanman lïnu mödanash runa yaykuptinmi altar kashqan kaq patiuman pukutay juntaskirqan.

⁴ Saymi Tayta Diospa chipipiynin querubinkuna jananpita joqarikarkur aywashpan Lugar Santuman yaykuna punkuchöna takyaskirqan. Templuman pukutay juntaskiptinmi altar kashqan kaq patiuman Tayta Diospa chipipiynin juntarqan.

⁵ Querubinkunapa riprankuna sapsapyashqan templupa jatun kaq patiunyaqmi wiyakarqan. Lapanpaq munayyuq Tayta Dios parlashqannöraqmi say sapsapyashqan wiyakarqan.

⁶ Querubinkunapa chakincho kaykaq ruëdakunapita ninata jorqamunanpaq Tayta Dios nish kaptinmi lïnu mödanash runa ruëdakuna kaqman aywar ichikuykurqan.

⁷ Juk querubinnami ruëdakuna chawpincho kaykaq shanshata jorqaramur lïnu mödanash runata makyarqan. Chaskirkurmi yarqur aywakurqan.

⁸ Querubinkunapa riprankuna rurinchömi runapa makinno rikakämurqan.

⁹ Nirkurnami querubinkunapa jawancho chusku ruëdakuna kaykaqta rikarqä. Cada querubinpa jawanchömi juk ruëda kaykarqan. Imayka crisólito ruminömi say ruëdakuna kuyaylapaq chipipirqan.

¹⁰ Say tamäñulami chuskun ruëdakuna kayarqan. Cada ruëda chawpinchömi juk ruëda cruzaypa ichiraykarqan.

¹¹ Mayqanläpapis aywarqa say ruëdakuna manami tikrayaqraqsu, saypa trukanqa punta kaq ruëda aywashlanpami mana tikraypa aywayaq.

¹² Querubinkunapa waqtankunacho, makinkunacho, riprankunacho y intëru cuerpunchömi nawinkuna karqan. Saynölami ruëdankunachöpis nawinkuna karqan.

¹³ Wiyaykaptïmi say ruëdakuna <> jutin kashqanta niyarqan.

¹⁴ Say querubinkunaqa chusku qaqlayuqmi kayarqan. Juk qaqlanmi querubinpano karqan, jukaq qaqlanmi runapano karqan, jukaq qaqlanmi leonpano karqan y jukaq qaqlannami ankapano karqan.

¹⁵ Say querubinkuna pajarmi aywakuyarqan. Quebar mayu kuchuncho runa niraqkunata rikashqäkunalami say querubinkuna kayarqan.

¹⁶ Querubinkuna aywayaptinqa ruëdankunapis aywayaqmi. Pajayänanpaq riprankunata kichayaptinpis ruëdakuna manami paykunapita kachakäyaqsu.

¹⁷ Pajaykäyashqancho ichiyaptinqa ruëdankunapis takyaskiyaqmi. Pajar qalaykuyaptinqa ruëdankunapis joqarikäyaqmi. Sayno karqan querubinkunapa jaynin ruëdakunacho kaptinmi.

¹⁸ Saypitanami Tayta Diospa chipipiynin Lugar Santu punkucho kaykashqanpita joqakashpan querubinkuna jananman churakarqan.

¹⁹ Rikaraykaptïmi querubinkuna riprankunata kicharkur pampapita pajar inti jeqamunan kaqlä templu punkuman aywakuyarqan. Pajayaptin ruëdankunapis mana kachakaypami aywayarqan. Say punkucho ichiskiyaptinmi Tayta Diospa chipipiyninpis querubinkunapa janancho kaykarqan.

²⁰ Say querubinkunaqa Quebar mayu kuchuncho runa niraqkunata rikashqäkunalami kayarqan. Quebar mayu kuchuncho rikashqä höra Israel runakunata kuyaq Tayta Diospa chakinchömi kayarqan. Saymi tantiyakurqä querubinkuna kayashqanta.

²¹ Paykuna chusku qaqlayuq y chusku riprayuqmi kayarqan. Riprankuna rurinchöpis runapa makinnömi rikakämurqan.

²² Qaqlankunapis Quebar mayu kuchuncho rikashqänölami kaykarqan. Say querubinkuna mana tikraypami aywaykäyarqan.