Efesios 4 - Tayta Diospa Wilakuynin

Juk shonqula kawanansipaq nishqan

¹ Sayno kaykaptinqa Jesucristupa wilakuyninta wilakushqäpita prësu kashpä qamkunata ruwä Tayta Dios munashqanno imaypis kawayänaykipaqmi. Sayno kawayänaykipaqmi Tayta Dios qayayäshushkanki.

² Mana yachaq tukuypa kawayay, pïmaypaqpis ali shonqu kayay y kuyanakur pacienciakuyay.

³ Espíritu Santu yanapäyäshushqaykinöla yärakuq mayikikunawan juk shonqula jawka kawayay.

⁴ Jesucristuman yärakuq kaqqa lapansimi juk cuerpula kaykansi. Juklaylami Espíritu Santupis. Juk salvacionlata chaskinansipaqmi Tayta Dios qayamashkansi.

⁵ Juklaylami Señorninsipis. Juklaylamanmi yärakuykansi. Juklaylami bautismu.

⁶ Juklaylami Tayta Diospis. Paymi lapansipa Taytansi, lapansitami makincho sararaykämansi, lapansitami yanapaykämansi y lapansiwanmi kaykan.

⁷ Juk cuerpula kashqapis cada ünunsitami Jesucristo kuyakuq kar churamashkansi payta sirvinansipaq.

⁸ Saymi Tayta Diospa palabranchöpis nikan: <>.

⁹ Wisashqanta niptinmi tantiyansi Jesucristo puntata kay pasaman urämushqanta.

¹⁰ Kay pasaman urarkamurmi jana pasaman kutikush. Lapanpaq munayyuq karmi lapantapis makincho sararaykan.

¹¹ Paymi wakinta churash apóstol kayänanpaq, wakinta profëta kayänanpaq, wakinta ali wilakuyninta wilakuyänanpaq y wakintana pastor kar yachasikuq kayänanpaq.

¹² Paykunata Jesucristo churash yärakuq mayinkunata shakyäsir yachasiyänanpaqmi. Sayno yachasiyaptinmi kamarikush kaykäyanqa Tayta Dios munashqanta rurar Jesucristupa cuerpun iglesiata lapanchöpis yanapäyänanpaq.

¹³ Sayno kaptinqa lapansi juk shonqula kar y Tayta Diospa Surinman yärakur Jesucristo kawashqanno noqansipis kawashun.

¹⁴ Sayno kawar manami pishi wamranönasu kashun pipis manakaqkunata yachasir lutankunata criyisimänansipaq. Saynöpis manami punshata wayra wakman kayman apashqannönasu kashun.

¹⁵ Saypa trukanqa jukninsi jukninsipis kuyanakur rasun kaqlata imaypis parlashun. Saynöpami Jesucristo kawashqanno noqansipis kawashun. Jesucristo umansi kaptin

¹⁶ y noqansi cuerpun kaptinsimi jukninsi jukninsi yanapänakunansipaq churamansi. Saymi moqunsikuna sararänakushqanno yanapänakur kuyanakunansipaq tantiyakushun.

Mushuq kawayta chaskikushqansi

¹⁷ Sayno kaptinmi Señor Jesucristupa apostolnin kar qamkunata yäsï Tayta Diosta mana chaskikuq runakunano mana kawayänaykipaq. Paykunaqa toqshun sakish karmi

¹⁸ manakaqkunata yarpachakular kawayan. Juiciuynaq karmi y shonqunkuna chukruyash kaptinmi Tayta Dios munashqannösu kawayan.

¹⁹ Paykuna shonqunkuna munashlanta rurarmi penqakuyninkunapis kansu. Jukwan jukwan kakurmi tukuyläya melanaypaq jusakunata jusalikuyan.

²⁰ Qamkunaqa manami sayno kawayänaykipaqsu Jesucristupa wilakuyninta yachakuyashkanki.

²¹ Jesucristupa ali wilakuyninta rasunpaypa chaskikush kaykarqa y pay munashqanno kawayänaykipaq yachakuykarqa

²² nawpata kawayashqaykino amana kawayaynasu, sinöqa makwa mödanata jitariqno unay kawayashqaykita kachariyay. Nawpataqa alita rurayashqaykita yarparpis lutan ruraykunaman umaykikuna churakashqami kayarqayki.

²³ Kananqa Espíritu Santu tantiyasiyäshushqaykinöla kawayay.

²⁴ Tayta Dios kashqanno qamkunapis kayänaykipaqmi mushuq kamash runana kaykäyanki. Sayno kaykarqa Tayta Dios munashqanno mana jusalikuypa kawayänaykipaq mushuq kawaytana kawayay.

²⁵ Ama lulapänakuyaysu. Lapaykipis juk ayllunöla kaykarqa rasun kaqlata parlayay.

²⁶ Rabyakurpis ama jusalikuyaysu. Qoyayninpaqa ama rabyashla kakuyaysu.

²⁷ Rabyashla karqa shonquykikunatami diabluta kichapaykäyanki.

²⁸ Nawpata suwakush karqa amana suwakuyaynasu. Suwakuyänaykipa trukanqa arukuyay. Saynöpami imalaykipis kanqa muchuqkunata yanapäyänaykipaq.

²⁹ Ama imatapis lutankunata parlayaysu. Saypa trukanqa runa mayikita shakyäsiyänaykipaq ali kaqkunalata parlayay.

³⁰ Lutankunata rurar Espíritu Santuta ama lakikasiyaysu. Paymi shonquykikunata sëllayäshushkanki Jesucristo kutimunan junaq salvash kayänaykipaq.

³¹ Pitapis ama nanaparäyaysu, rabyapäyaysu ni qayapäyaysu. Ama pipa washantapis rimayaysu ni manakaqkunata parlayaysu.

³² Sayno kawayänaykipa trukanqa jukniki juknikipis kuyapänakur kawayay. Jesucristo wanushqanpita Tayta Dios perdonayäshushqaykinöla perdonanakuyay.