Efesios 3 - Tayta Diospa Wilakuynin

¹ Saymi noqa Pablo, Jesucristupa ali wilakuyninta qamkunata y wakin mana Israel runakunatapis wilapashqäpita prësu wichqarashqächo...

Mana Israel runakunatapis wilapänanpaq Pabluta churashqan

² Tayta Dios kuyakuq karmi churamash qamkunaman y wakin mana Israel runakunamanpis ali wilakuyninta apanäpaq. Say wilakuytaqa musyaykäyankinami.

³ Ali wilakuyninta mana musyash kayaptinpis Tayta Diosmi tantiyasimash say wilakuy ima kashqantapis. Sayno tantiyasimashqantami kay cartacho wilaykä.

⁴ Saymi kay cartata liyir tantiyakuyanki Jesucristupa wilakuyninta wilakushqäta.

⁵ Say ali wilakuyta manami unay runakuna musyayashsu. Kananraqmi santu apostolkunata y profëtakunatapis Espíritu Santu tantiyasiyämash.

⁶ Say wilakuy kaynömi nikan: Tayta Diospa ali wilakuyninta chaskikurmi mana Israel runakunapis salvacionta tariyanqa. Saymi Israel runakunata Tayta Dios promitishqankunata paykunapis chaskiyanqa. Saynöpami lapansipis say ayllunölana kaykansi.

⁷ Say ali wilakuyninta wilakunäpaqmi Tayta Dios kuyakuq kar munayninwan churamash.

⁸ Tayta Diosman lapan yärakuqkunapita mana väliqnin kaykaptïpis Tayta Diosmi kuyamar churamash Jesucristupa ali wilakuyninta mana Israel runakunaman chäsinäpaq. Say ali wilakuymanqa manami ima riquëzapis tinkunsu.

⁹ Unaypita mana musyayashqan wilakuyta pïmaytapis wilapänäpaqmi lapantapis kamaq Tayta Dios churamash.

¹⁰ Saynöpami Jesucristuman yärakuqkuna salvakuyaptin supaykunapis y jana pasacho kaykaq lapan angilkunapis tantiyaykäyan Tayta Dios shumaq yachayyuq kashqanta.

¹¹ Sayno tantiyaykäyan Tayta Dios unaypita pasa yarpashqanno Señor Jesucristo noqansi rayku wanush kaptinmi.

¹² Saymi Jesucristuman yärakur Tayta Diosta mana mansapaypana manakunsi.

¹³ Jesucristo salvamashqansita musyaykarqa mana Israel runakunata wilapashqäpita prësu wichqaraptïpis ama lakikuyaysu. Lakikuyänaykipa trukanqa salvakuyänaykipaq wilakushqäpita kushikuyay.

Jesucristo selläma kuyamashqansi

¹⁴ Saymi qonqurpakuykur [Señor Jesucristupa] Papänin Tayta Diosta manakü.

¹⁵ Paymi kamash jana pasacho kaqkunata y kay pasacho kaqkunatapis.

¹⁶ Paytami manakü gloriacho riquëzankuna kashqanman tupu Espïritunwan poderta qoyäshunaykipaq.

¹⁷ Saynöpis manakü shumaq yärakuyaptiki Jesucristo shonquykikunacho tänanpaqmi. Saynöpami shumaq jaqwäkush jachano y ali cimientush wayino kar paypa kuyakuynilancho kawayankipaq.

¹⁸ Kuyakuynincho kawarmi lapan yärakuq mayinsikunawan tantiyakuyanki Jesucristo selläma kuyamashqansita. Pay kuyakuq kashqanqa selläma anchumi, largumi, altumi y jundumi kaykan.

¹⁹ Saymi Tayta Diosta manakü kuyakuyninta tantiyasiyäshunaykipaq. Saynöpami Tayta Dios qamkunacho kar pay munashqanno kawayänaykipaq imaypis yanapäyäshunki.

²⁰ ¡Tayta Diosta alabaykuläshun! ¡Seqaypa munayyuq karmi manakushqansipita y yarpashqansipitapis masraq yanapämansi!

²¹ ¡Iglesian kanansipaq Jesucristo salvamashqansipita lapansi mana ajayaypa imaypis alabaykuläshun! Amén.