Efesios 1 - Tayta Diospa Wilakuynin

Carta qalaykunan

¹ Éfeso markacho kaykaq salvash kaqkuna: Noqa Pablo, Jesucristupa apostolnin kanäpaq Tayta Dios akramash kaptinmi qamkunapaq kay cartata cartakaykämü. Jesucristo munashqanno kawayashpaykimi Tayta Diospana kaykäyanki.

² Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki.

Tayta Diosta agradëcikushqan

³ ¡Señor Jesucristupa Papänin Tayta Dios alabash kaykuläsun! Jesucristucho kashqami gloriacho kaykaq imaykaläya bendicionninkunata qomashkansi.

⁴ Kay pasata manaraq kamarmi Jesucristuman churamashpansi Tayta Dios akramashkansi paypa nawpancho jusaynaq y santu kanansipaq.

⁵ Kuyamashpansimi kikin munashqanno destinamarqansi Jesucristo kayninpa wamran kanansipaq.

⁶ Kuyashqan Surinwan sayno destinamashqansipitami imaypis payta alabashun.

⁷ Kuyapäkuq karmi Surinpa yawarninwan rantimashpansi lapan jusansikunata perdonamashkansi.

⁸ Seqaypa kuyapämashpansimi y yachayta qomashpansimi

⁹ runakuna mana musyayashqanta Tayta Dios musyasimashkansi.

¹⁰ Saymi musyasimashkansi jana pasacho kaqkunata y kay pasacho kaqkunatapis pay destinashqan junaq Jesucristupa makinman lapanta churananpaq kashqanta.

¹¹ Kikin yarpashqanno lapantapis ruraq karmi noqansitapis Jesucristucho kaptinsi Tayta Dios destinamashkansi herenciansita chaskinansipaq.

¹² Paymi kamakäsish Israel runakuna Jesucristuman puntata yärakur payta alabayänanpaq.

¹³ Qamkunapis ali wilakuyninta wiyarmi Jesucristuman yärakur salvakuyashkanki. Saynöpami promitishqan Espíritu Santuwan Tayta Dios shonquykikunata sëllayäshushkanki.

¹⁴ Espíritu Santuta qomashpansimi Tayta Dios musyasimansi herenciansita qomänansipaq kashqanta y wamran kanansipaq rantimashqansita. Sayno salvamashqansipitami imaypis payta alabashun.

Wawqi panikunapaq Tayta Diosta manakushqan

¹⁵ Saymi Señor Jesucristuman shumaq yärakuyashqaykita musyar y wawqi panikunawan kuyanakuyashqaykita musyar

¹⁶ Tayta Diosta qamkunapaq manakur imaypis payta agradëcikü.

¹⁷ Saynöpis Señorninsi Jesucristupa Papänin munayyuq Tayta Diostami manakü Espíritu Santuwan tantiyasiyäshuptiki payta reqiyänaykipaq.

¹⁸ Shonquykikunacho sayno tantiyasiyäshuptikimi musyayanki Tayta Dios qayashushpayki imapaq salvayäshushqaykita, seqaypa ali herenciata chaskiyashqaykita

¹⁹ y payman yärakuqkunata munayninwan shumaq yanapashqanta.

²⁰ Say munayninwanmi Jesucristuta kawarirkasimur gloriacho aluq kaq nawpanman jamasish.

²¹ Saynöpami Jesucristuta Tayta Dios churash kay vïdacho y juk vïdachöpis munayyuq kananpaq. Saymi angilkunapitapis, supaykunapitapis y pïmay runapitapis mas munayyuq kaykan.

²² Sayno munayyuq kaptinmi lapan imaykatapis paypa munayninman Tayta Dios churash. Iglesiata kuyarmi payta churash lapanpapis mandaqnin kar uman kananpaq.

²³ Noqansinami iglesian kar cuerpun kaykansi. Saymi pay munashqanno kawanansipaq imaypis yanapaykämansi. Paypa makinchömi lapan imaykapis kaykan.