Cantares 1 - Tayta Diospa Wilakuynin

¹ Kaychömi qelqaraykan lapanpitapis mas kuyaylapaq kaq cantukuna. Kay cantukunaqa Salomónpami.

Punta kaq cantu Jipash:

² ¡Shumaq musarkamankiman isanqa! Kuyamar musamashqaykiqa vïnupitapis masmi mishkin.

³ Perfümikipa mushkuynin maypis mushkuräkuy munaymi. Jutikipis perfüminöraqmi kuyaylapaq kaykan. ¡Saymi jipashkunapis seqaypa kuyayäshunki!

⁴ ¡Cuartuykiman jukla pushakalämay, tayta rey! Saychömi seqaypa kushish qoyäshun. Vïnuta upur kushikushqansipitapis masmi kuyanakur kushikushun. ¡Rasuntachir jipashkuna kuyayäshunki!

⁵ Jerusalén jipashkuna, yanala karpis Cedar runakunapa toldunno kuyaylapaqmi kaykä. Salomón rurasishqan cortïnakunano kuyaylapaqmi kaykä.

⁶ Shanaywan yanayash kashqätaqa ama rikapäyämaysu. Turïkunami rabyapäyämashpan üva chakrakunata täpanäpaq churayämarqan. Saymi kikïpa üva chakräta cuidashkäsu.

⁷ Kuyaynï, wilaykalämay. Uyshaykikunata ¿maychötaq misikunki? Pulan junaq fiyupa shanaptin ¿may lantumantaq qatinki? Wilamaptikiqa manami amïguykikuna misikuyashqancho qamta ashir pantakash purishaqsu.

Yanasankuna:

⁸ Lapan jipashkunapitapis mas kuyaylapaq jipash, ashishqayki maqta maycho kashqantapis mana musyashpaykiqa tarishqaykiyaq uyshakunapa yupilanpa ayway. Misikuqkunapa suklankuna kaqman chaykur cabraykikunata misikuy.

Maqta:

⁹ Kuyaynï, Faraónpa carrëtanta qarachaq fïna yëwanömi kuyaylapaq kaykanki.

¹⁰ Zarcïlluykita jatikurkuptikiqa qaqlaykipis kuyaylapaqmi. Perlasyuq walqaykita walqakurkuptikiqa kunkaykipis kuyaylapaqmi.

¹¹ Qellaywan adornash qori zarcïllutami rurapäshayki.

Jipash:

¹² Perfümïpa mushkuyninqa kuyaynï rey jamaraykashqanyaqmi chan.

¹³ Taksha walqiwan sararashqä mïrra perfümi qasqulächo kashqannömi kuyaynïpis qasqulächo warati punun.

¹⁴ En-gadi parti üva chakracho kaykaq kuyaylapaq alheña waytanömi kuyaynïqa kaykan.

Maqta:

¹⁵ Selläma kuyaylapaqmi kaykanki, kuyaynï. Maypis kuyaykuy munaymi kaykanki. Nawikipis ishkay palumano kuyaylapaqmi kaykan.

Jipash:

¹⁶ Kuyaynï, seqaypa kuyaylapaqmi kaykanki. Kamaraqla karmi munapaypaq kaykanki. Verdiraykaq taqta qewami cämansipis kaykan.

Maqta:

¹⁷ Cedru jachami wayinsi. Ciprés jachami qataraqninpis.