Apocalípsis 20 - Tayta Diospa Wilakuynin

Kawarimuqkuna Jesucristuwan waranqa wata mandayänanpaq nishqan

¹ Saynöpis rikarqä jana pasapita juk ángel uraykämuqtami. Say angilmi wanwanyaykaq pasapa shiminpa llävinta y jatunkaray cadinata aptash urämurqan.

² Dragonta sariykurmi waranqa (1,000) wata wataränanpaq watarqan. Say dragonmi diablu niyashqan Satanás y unay culebra karqan.

³ Wanwanyaykaq pasapa shiminpa qarpurirmi pitapis manana engañananpaq punkunta wichqarkur sëllarkurqan. Waranqa wata cumpliskiptinnami pöcu tiempula libri kananpaq kacharinqa.

⁴ Saypitanami trönukunata rikarqä. Say trönukunamanmi juzgaqkuna jamakuyarqan. Saynölami saysika almakunatapis rikarqä. Say almakuna kayarqan Jesucristuman yärakur Tayta Diospa wilakuyninta wilakuyashqanpita umankunatapis jipiypa wanusiyashqan runakunapa almankunami. Paykuna manami anticristuta ni ïduluntapis adorayarqansu. Saynöpis manami anticristupa señalninwan urkunmanpis ni makinmanpis señalasikuyarqansu. Say runakuna kawarirkamur waranqa (1,000) watami Jesucristuwan mandayanqa.

⁵ Paykunaqa puntatami kawariyämunqa. Wakin wanuqkunami isanqa waranqa wata cumplirkuptinraq kawariyämunqa.

⁶ Puntata kawarimuqkunaqa kushishqami kayanqa. Paykunaqa Tayta Dios kuyashqan santu runakunami kayanqa. Saymi qepa kaq wanuyman chäyanqasu. Saypa trukanqa Tayta Diosta y Jesucristuta sirviq cürakuna kayashpanmi Jesucristuwan waranqa wata mandayanqa.

Satanásta infiernuman qaykunanpaq nishqan

⁷ Waranqa (1,000) wata päsarkuptinnami prësuraykaq Satanásta kacharinqa.

⁸ Saymi lapan nación runakunata engañananpaq maysaypapis purir Gog nacionpa y Magog nacionpa soldädunkunatapis guërrata rurayänanpaq shuntanqa. Lamar kuchuncho aqushanömi say soldädukunapis saysika kayanqa.

⁹ Say soldädukuna maysaypitapis shamurmi Dios kuyashqan markacho kaykaq yärakuq runakunapa campamentunta tumaypa juntapäyanqa. Sayno juntaparaykäyaptinmi Tayta Dios jana pasapita ninata ratasimur say soldädukunata ushakäsinqa.

¹⁰ Nirkurnami runakunata engañaq diabluta azufriyuq nina rupaykaq qochaman qaykunqa. Saychömi anticristo y lula profëtapis mayna qaykuraykäyanqa. Saychömi diablupis paqasta junaqta imayyaqpis paykunawan nakanqa.

Lapan runakunata Tayta Dios juzgananpaq nishqan

¹¹ Saypitanami rikarqä jatunkaray yuraq trönuncho Tayta Dios jamaraykaqta. Paypa nawpanpitami kay pasapis y jana pasapis elaqaskiyarqan. Mananami mas rikakäyarqannasu.

¹² Saynöpis rikarqä lapan wanuq runakuna, yachaqpis mana yachaqpis, Tayta Diospa puntancho ichiraykäyaqta. Saypitanami librukunata kichar Libru de la Vïdatapis Tayta Dios kicharqan. Say librukunata rikaykurmi alita o mana alitapis rurayashqanman tupu runakunata juzgarqan.

¹³ Say runakunami kayarqan lamarcho wanuqkuna, pamparaqkuna y maysaycho wanuqkunapis. Lapantami rurayashqanman tupu Tayta Dios juzgarqan.

¹⁴ Saypitanami wanuytapis Hadestapis nina qochaman qaykurqan. Say nina qochami qepa kaq wanuy kaykan.

¹⁵ Saymanmi Libru de la Vïdacho jutinkuna mana qelqaraq kaq runakunatapis qaykurirqan.