Apocalípsis 15 - Tayta Diospa Wilakuynin

Qanchis angilkuna runakunata nakasiyänanpaq nishqan

¹ Saypitanami jana pasacho juk mansariypa señalta rikarqä. Say señal karqan castïgukunata apamuq qanchis angilkunami. Say angilkunawan castigaskasiptinraqmi Tayta Diospa rabyakuynin päsanqa.

² Saynöpis rikarqä ninawan talush vidriuno lamartami. Say lamar jananchömi Tayta Diosman yärakuqkuna arpankuna aptash ichiraykäyarqan. Say arpakunata Tayta Diospitami chaskiyarqan. Paykuna manami anticristuta chaskikuyarqansu, ni ïdulunta adorayarqansu ni jutinpa nümeruntapis churakuyarqansu.

³ Tayta Diospa sirviqnin Moisés cantashqanta y Carnish cantashqanta cantarmi niyarqan: <

⁴ ¿Piraq mana mansapakuykushunkimansu? ¿Piraq mana alabaykushunkimansu? Qam japalaykimi santu kaykanki. Runakunata rurayashqanman tupu juzgashqaykita pïmaymi musyayan. Saymi lapan nación runakunapis puntaykiman shamur adorayäshunki>>.

⁵ Saypitanami jana pasacho kaq Pactu Tolducho Lugar Santïsimu kicharaykämuqta rikarqä.

⁶ Saypitami yarqayämurqan castïgukunata apamuq qanchis angilkuna. Paykunaqa lïnupita rurash chipipiykaq limpiu mödanan jatishqami kayarqan. Qasqunkunachömi qoripita rurash wachkuta wataraykarqan.

⁷ Saymi Tayta Diospa trönuncho kaykaq chusku kawaykaqkunapita juk yarqamurqan. Paymi qanchis angilkunata aypurqan qoripita rurash cöpata. Say cöpakunachömi imayyaqpis kawaq Tayta Diospa rabyaynin junta winaraykarqan.

⁸ Jana pasacho kaq templuman Tayta Diospa chipipiynin juntaptinmi qoshnipis juntarqan. Qanchis castïgukunata angilkuna tikwamuyta ushayashqanyaq say templuman manami pipis yaykuyta kamäpakurqansu.