Apocalípsis 1 - Tayta Diospa Wilakuynin

Libru qalaykunan

¹ Kay libruchömi qelqaraykan Jesucristuta Tayta Dios revelashqan. Jesucristumi angilninta kachamur say revelacionta sirviqnin Juanta revelarqan. Sayno revelarmi sirviqninkunata imapis päsananpaqna kaqkunata tantiyasirqan.

² Juannami say revelacionta qelqar Tayta Dios nishqankunata, Jesucristo nishqankunata y lapan rikashqankunata qelqash.

³ Kushishqami kayanqa kay qelqaraykaqkunata liyiqkuna y liyipashqanta wiyar cäsukuqkunaqa. Kay qelqaraykaqkuna cumplikänanpaqnami kaykan.

Qanchis iglesiakunacho shuntakaykaq wawqi panikunata winchikushqan

⁴ Asia provinciacho kaykaq qanchis iglesiakunacho shuntakaq wawqi panikuna: Noqa Juanmi qamkunaman qelqaykämü. Unaypita kawaq, kananpis kaykaq y shamunanpaq kaykaq Tayta Dios y trönunpa nawpancho kaykaq qanchis espïritukunapis kuyapäyäshushpayki ali kawayänaykipaq yanapaykuyäläshunki.

⁵ Jesucristupis ali kawayänaykipaq qamkunata yanapaykuyäläshunki. Paymi Tayta Dios munashqannöla wilakuyninta wilakush y wanushkunapita puntata kawarimush. Kay pasacho lapan reykunapitapis mas munayyuqmi kaykan. Paymi kuyamashpansi yawarninta jichar lapan jusansita maylamashkansi.

⁶ Mandamaqninsi rey kashpanmi makincho kanansipaq shuntamashkansi. Saynöpis Papänin Tayta Diosta sirviq cürakuna kanansipaqmi churamashkansi. ¡Jesucristo imaypis alabash kaykuläsun! ¡Pay japalan mandamaqninsi kaykuläsun! Amén.

⁷ ¡Pukutay jananchömi Jesucristo kutimunqa! Kutimuqtami lapan runakuna rikayanqa. Payta tuksir wanusiqkunapis rikayanqami. Kutimuqta rikarmi maysaychöpis runakuna waqayanqa. Saynömi kanqa. Amén.

⁸ Unaypita kawaq, kananpis kaykaq y shamunanpaq kaykaq munayyuq Tayta Diosmi nin: <>.

Jesucristuta Juan rikashqan

⁹ Noqaqa Jesucristuman yärakuq mayiki Juanmi kaykä. Qamkunanölami Jesucristo mandaykashqancho kaykä. Nakasiyäshushqaykinölami noqatapis Jesucristuman yärakushqäpita nakasiyäman. Qamkunanölami mana ajayaypa shuyakuykä paypa nawpanman chänäpaq. Tayta Diospa wilakuyninta wilakushqäpita y Jesucristo salvamaqninsi kashqanta wilakushqäpitami Patmos islacho prësu kaykä.

¹⁰ Saycho kaykarmi domingu junaq Espíritu Santupa munaynincho kashpä wiyarqä cornëta tukamuqnöraq qepächo kayno nimuqta:

¹¹ <<[Alfa y Omegami noqa kaykä. Qalaykunan y ushananmi kaykä.] Revelacioncho rikasishqäkunata juk rölluman qelqarkur apasiy [Asia provincia] qanchis markakunacho kaykaq iglesiakunaman. Say markakuna kaykäyan Éfeso, Esmirna, Pérgamo, Tiatira, Sardis, Filadelfia y Laodiceami>>.

¹² Qepächo sayno parlamuqta wiyarmi tikrarqä pï kashqantapis rikanäpaq. Saychömi rikarqä qoripita rurash qanchis candelabrukuna sariraykäyaqta.

¹³ Say candelabrukuna chawpinchömi rikarqä runapa surin niraq kaykaqta. Paymi chaki puntanyaq mödanan jatish kaykarqan. Qasqunpami qoripita rurash wachkuwan wataraykarqan.

¹⁴ Aqsanpis yuraq milwano y rashtano yuraqmi karqan. Nawinnami ninanöraq asikyarqan.

¹⁵ Chakinkunapis waylash broncinöraqmi chipipirqan. Parlashqanpis aska yaku aywar qaparaqnöraqmi karuman wiyakarqan.

¹⁶ Aluq kaq makinchömi qanchis qoyllarkunata sarararqan. Shiminpitanami ishkan lädunpa afilash espäda yarqamurqan. Qaqlanpis intinöraqmi chipipirqan.

¹⁷ Payta rikaykurmi puntanman wanushno ishkiskirqä. Saymi aluq kaq makinwan yataykamar nimarqan: <

¹⁸ Imayyaqpis kawaqmi kaykä. Imayyaqpis kawanäpaqmi wanusiyämashqanpita kawarimushkä. [Amén.] Noqami sararaykä wanushkunapa almankuna kaykäyashqan llävita.

¹⁹ Lapan rikashqaykita qelqay. Kanan päsaykashqanta y päsananpaq kaqkunatapis lapanta qelqay.

²⁰ <>.